തിരുവനന്തപുരം: സംസ്ഥാന എൻസിപിയിലെ പ്രശ്‌നങ്ങൾ തീർക്കാൻ കേന്ദ്ര ഇടപെടൽ. പരിഹാരം കാണുന്നതിനായി നേതാക്കളെ മുംബൈയിലേക്ക് വിളിപ്പിച്ചു. മന്ത്രി എ കെ ശശീന്ദ്രൻ, പി സി ചാക്കോ, തോമസ് കെ തോമസ് എംഎൽഎ എന്നിവരെയാണ് മുംബൈയിലേക്ക് വിളിപ്പിച്ചിരിക്കുന്നത്. ശരദ് പവാറിന്റെ നേതൃത്വത്തിൽ ഉച്ചയ്ക്ക് രണ്ട് മണിക്ക് ചർച്ച നടത്തും.
പി സി ചാക്കോ അനുകൂലികൾ ഒഴികെയുള്ളവരുടെ ആവശ്യം തോമസ് കെ തോമസിനെ പ്രസിഡന്റ് ആക്കണമെന്നാണ്. മന്ത്രിസ്ഥാനം ലഭിക്കില്ലെന്ന് ഉറപ്പായതോടെ എ കെ ശശീന്ദ്രനൊപ്പം ചേർന്ന് ആ വിഭാഗത്തിന്റെ പിന്തുണയോടെ പ്രസിഡന്റാകാൻ കഴിയുമെന്ന പ്രതീക്ഷയിലാണ് തോമസ് കെ തോമസ്. ഈ ആവശ്യം പവാറിനോട് തോമസ് കെ തോമസ് ഉന്നയിച്ചേക്കും.
എന്നാൽ പി സി ചാക്കോയുടെ രാജി പവാർ സ്വീകരിച്ചാൽ പി സി ചാക്കോ മറ്റ് പേരുകൾ നിർദേശിച്ചേക്കാം. എന്നാൽ എൻസിപി സംസ്ഥാന അധ്യക്ഷസ്ഥാനത്തേക്ക് ആര് വന്നാലും പിന്തുണക്കുമെന്ന നിലപാടിലാണ് എ കെ ശശീന്ദ്രൻ. ഉച്ചക്ക് നടക്കാൻ പോകുന്ന ചർച്ചക്ക് ശേഷം മാത്രമേ കാര്യങ്ങളിൽ വ്യക്തത ലഭിക്കൂ.
