ലോകാരോഗ്യസംഘടനയുടെ റിപ്പോർട്ട് പ്രകാരം ഒരോ വർഷവും അധിക അളവിലുള്ള ഉപ്പ് മൂലം ഏകദേശം 1.89 ദശലക്ഷമാളുകളാണ് മരണപ്പെടുന്നതെന്ന് റിപ്പോർട്ട്. ശരീരത്തിൽ ഉപ്പിന്റെ അളവ് വർധിക്കുന്നത്ന ഉ‍യർന്ന രക്തസമ്മർദം, ഹൃദ്രോഗങ്ങൾ ഉൾപ്പെടെയുള്ളവയിലേക്ക് നയിക്കുമെന്നാണ് ലോകാരോഗ്യ സംഘടന മുന്നറിയിപ്പ് നൽകുന്നു.
പേശികളുടെയും നാഡികളുടെയും സ്വാഭാവിക പ്രവർത്തനത്തിന് ശരീരത്തിൽ സോഡിയം ആവശ്യമാണ്. ടേബിൾ സാൾട്ട് എന്ന ഉപ്പിലാണ് ഇത് സാധാരണ കണ്ടുവരുന്നത്.
പാൽ, മാംസാഹാരം മുതലായവയിലും ധാരാളം സോഡിയം കണ്ടുവരുന്നുണ്ട്. ശരീരത്തിന് അത്യന്താപേക്ഷിതമാണ് സോഡിയം എങ്കിലും ഇതിന്റെ അളവ് കൂടുന്നത് ഹൃദ്രോഗം, പക്ഷാഘാതം, അകാലമൃത്യു എന്നിവയിലേക്ക് നയിക്കുമെന്നാണ് ലോകാരോഗ്യ സംഘടനയുടെ റിപ്പോർട്ടിലുണ്ട്.
ഹാർവാർഡ് മെഡിക്കൽ സ്‌കൂളിന്റെ റിപ്പോർട്ടിലും അധികമായി സോഡിയം ശരീരത്തിൽ എത്തുന്നത് രക്തസമ്മർദം ഉയർത്തുമെന്നും ഹൃദയാരോഗ്യത്തെ ബാധിക്കുമെന്നും വ്യക്തമാക്കിയിരുന്നു. നിലവിൽ ഹൃദ്രോഗങ്ങളുള്ളവരുടെ ആരോഗ്യത്തെയും ഇത് പ്രതികൂലമായി ബാധിക്കും.
ലോകാരോഗ്യ സംഘടന പറയുന്നത് പ്രകാരം മുതിർന്നവർക്ക് പ്രതിദിനം 2000 മില്ലി ഗ്രാം ഉപ്പ് വരെ ശരീരത്തിൽ ചെല്ലുന്നതിൽ പ്രശ്‌നമില്ല. അതായത് ഒരു ടീ സ്പൂണിൽ താഴെ മാത്രം.
കുട്ടികളെ സംബന്ധിച്ചിടത്തോളം അവരുടെ ഉന്മേഷത്തെയും കരുത്തിനെയും ആശ്രയിച്ചാണ് ഉപ്പിന്റെ അളവ് നിർദേശിക്കുന്നത്. അയഡിൻ ഉള്ള ഉപ്പ് ഉപയോഗിക്കുന്നത് തലച്ചോറിന്റെ ആരോഗ്യകരമായ വികാസത്തിന് ആവശ്യമാണെന്നും ലോകാരോഗ്യ സംഘടന പറയുന്നു.
ഉപ്പില്ലാത്ത ഭക്ഷണം കഴിക്കുക നമ്മളെ സംബന്ധിച്ചിടത്തോളം നടക്കാത്ത കാര്യമാണ്. രുചി എത്ര മോശമായാലും ഉപ്പും മുളകും ഉണ്ടെങ്കിൽ നമുക്ക് കഴിക്കാനാകും.
സംസ്‌കരിച്ച ഭക്ഷണ പദാർഥങ്ങൾ ഒഴിവാക്കുന്നതാണ് ശരീരത്തിൽ കൂടിയ അളവിൽ ഉപ്പ് എത്തുന്നത് ഒഴിവാക്കുന്നതിനുള്ള പ്രധാനപ്പെട്ട മാർഗമെന്ന് ലോകാരോഗ്യ സംഘടന പറയുന്നു.
