തിരുവനന്തപുരം: ചില പ്രത്യേക സാഹചര്യങ്ങളിൽ നാട്ടാനകളെ ദയാവധത്തിന് വിധേയമാക്കുന്ന കാര്യം സംസ്ഥാന സർക്കാരിന്റെ സജീവ പരിഗണനയിലെന്ന് റിപ്പോർട്ട്. നാട്ടാന പരിപാലന നിയമത്തിലെ പുതിയ ചട്ടഭേദഗതിയുടെ കരടിലാണ് ആനകളുടെ ദയാവധം സംബന്ധിച്ച ശിപാർശയുള്ളത്. നാട്ടാന പരിപാലന നിയമത്തിലെ ചട്ടത്തിൽ ആദ്യമായാണ് ഇത്തരത്തിൽ ആനകളുടെ ദയാവധം സംബന്ധിച്ച ശുപാർശ ഉൾപ്പെടുത്തുന്നത്. നാട്ടാന അസഹനീയമായ വേദന അനുഭവിക്കുന്ന സാഹചര്യത്തിൽ ദയാവധത്തിന് വിധേയമാക്കാം എന്ന നിർദേശമാണ് കരടിൽ മുന്നോട്ട് വെക്കുന്നത്.
ശിപാർശ അംഗീകരിക്കപ്പെട്ടാൽ ചീഫ് വൈൽഡ് ലൈഫ് വാർഡന്റെ അനുമതിയോടെ മാത്രമേ ആനകളുടെ ദയാവധം നടപ്പാക്കാനാകൂ. ചീഫ് വൈൽഡ് ലൈഫ് വാർഡൻ നിയമിക്കുന്ന ഒരു സംഘമാണ് പരിശോധന നടത്തുക. ചുരുങ്ങിയത് നാല് അംഗങ്ങളാണ് ചീഫ് വൈൽഡ് ലൈഫ് വാർഡൻ നിയമിക്കുന്ന സംഘത്തിലുണ്ടാകുക. രണ്ട് വിദഗ്ധരായ വെറ്ററിനറി ഡോക്ടർമാർ, സൊസൈറ്റി ഫോർ പ്രിവൻഷൻ ഓഫ് ക്രുവൽറ്റി ടു ആനിമൽസ്, ആനിമൽ വെൽഫെയർ ബോർഡ് എന്നിവയിലെ ഓരോ അംഗവും അടങ്ങുന്നതായിരിക്കും ചീഫ് വൈൽഡ് ലൈഫ് വാർഡൻ നിയമിക്കുന്ന സംഘം. അപൂർവ സന്ദർഭങ്ങളിൽ ഇത് ഗുണകരമാകും എന്നാണ് മേഖലയിൽ ഉള്ളവർ പറയുന്നത്.
പലപ്പോഴും വയസ്സായതോ അസുഖം ബാധിച്ചതോ ആയ ആനകൾ തളർന്നു വീഴുന്ന സംഭവം ഉണ്ടാകാറുണ്ട്. വീണ്ടും അതിനെ എഴുന്നേൽപ്പിക്കാൻ സാധിക്കില്ലെന്ന് ഉറപ്പുള്ള ഘട്ടങ്ങളും വരാറുണ്ട്. അത്തരം സാഹചര്യങ്ങളിൽ വേദന അനുഭവിക്കുന്നതിനേക്കാൾ നല്ലതാണ് ദയാവധമാണെന്ന് ഈ മേഖലയിലുള്ളവർ തന്നെ പറയുന്നു. ഇതുകൂടാതെ വാഹനമിടിച്ചും മറ്റും ഗുരുതരമായി പരിക്കേൽക്കുന്ന ആനകളുടെ കാര്യത്തിലും ഇത് ഉപയോഗപ്രദമാണ്. ഒരു പരിധിയിൽ കൂടുതൽ എല്ലുപൊട്ടലുണ്ടായാൽ തിരിച്ചുവരുക പ്രയാസമാണ് എന്നതാണ് ഇതിന് കാരണം.
