കോവിഡ് സമ്പർക്ക വിലക്ക് കാലത്താണ് വർക്ക് ഫ്രം ഹോം എന്ന ആശയത്തിന് പ്രചാരമേറുന്നത്. ഐ.ടി.കമ്പനികളും മാധ്യമ സ്ഥാപനങ്ങളും പോലും വർക്ക് ഫ്രം ഹോം അടിസ്ഥാനത്തിൽ ജീവനക്കാരെ വീട്ടിലിരുന്ന് ജോലി ചെയ്യാൻ അനുവദിച്ചു. കോവിഡ് സമ്പർക്കവിലക്കിന് ശേഷം എല്ലാ മേഖലകളും സജീവമായെങ്കിലും വർക്ക് ഫ്രം ഹോം ഇന്നും ഒട്ടേറെ കമ്പനികളാണ് തുടരുന്നത്. ഓഫീസ് ചെലവുകളും ജീവനക്കാർക്ക് നൽകേണ്ട യാത്രാ ആലവൻസുകളും കുറയ്ക്കാം എന്നതാണ് കമ്പനികൾക്കുണ്ടായ നേട്ടം. എന്നാൽ ഇപ്പോൾ സ്റ്റാർട്ടപ്പ് കമ്പനികൾ ഒരു പടി കൂടി കടന്ന് പരമ്പരാഗത ഓഫീസ് സങ്കൽപ്പത്തിൽ നിന്നും മാറി വിർച്വൽ ഓഫീസ് എന്ന ആശയം യാഥാർഥ്യമാക്കിയിരിക്കുകയാണ്.
ജീവനക്കാരെല്ലാം വിദൂരത്തിരുന്ന് സാങ്കേതിക വിദ്യയുടെ സഹായത്തോടെ പരസ്പരം സംവദിയ്ക്കുകയും തൊഴിലെടുക്കുകയും ചെയ്യുന്ന സാങ്കൽപിക ഓഫീസ് സംവിധാനമാണ് വിർച്വൽ ഓഫീസുകൾ. ഓഫീസ് കെട്ടിടം നിർമിയ്ക്കാനൊ സ്ഥലം വാടകയ്ക്ക് എടുക്കാനോ ബുദ്ധിമുട്ടേണ്ടതില്ല എന്നതാണ് വിർച്വൽ ഓഫീസ് കൊണ്ടുള്ള ഗുണം. ഗ്രൂപ്പായി ചർച്ചകൾ നടത്താനുള്ള ആപ്പുകൾക്കും മറ്റും പ്രചാരമേറിയതോടെ വിർച്വൽ ഓഫീസ് പ്രവർത്തനങ്ങൾ അനായാസമായിത്തീർന്നു. ഓഫീസ് , പാർക്കിങ്ങ് സ്പേസ് , ഭക്ഷണ സൗകര്യം, വൈദ്യുതിയ്ക്കായി ചെലവഴിക്കേണ്ടി വരുന്ന തുക തുടങ്ങിയവ ഒഴിവായിക്കിട്ടുമെന്നതിനാൽ സംരംഭകരും വിർച്വൽ ഓഫീസ് എന്ന ആശയത്തോട് മികച്ച രീതിയിലാണ് പ്രതികരിയ്ക്കുന്നത്. യു.എ.ഇ.യിലും മറ്റും വിർച്വൽ ഓഫീസുകൾക്കായി സർക്കാർ വ്യവസ്ഥളും ഏർപ്പെടുത്തിയിട്ടുണ്ട്.
