നാട്ടുകാർക്ക് മുമ്പിൽ മൂർഖൻ പാമ്പിനെ പ്രദർശിപ്പിക്കുന്നതിനിടെ പാമ്പാട്ടിയെ മൂർഖൻ കടിച്ചു. സംഭവത്തിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലായി മാറുന്നുണ്ട്. തുടക്കത്തിൽ ഇയാൾ പാമ്പിനെ തൻറെ കഴുത്തിൽ അണിഞ്ഞ നിലയിലാണ്. ചുറ്റും നിൽക്കുന്നവരുമായി സംസാരിക്കുന്നതിനിടെ ആണ് പാമ്പ് ഇയാളുടെ കൈയിൽ കടിക്കുന്നത്.അപ്രതീക്ഷിതമായി കടിയേറ്റ പാമ്പാട്ടി ആദ്യമൊന്ന് പരുങ്ങിയെങ്കിലും സമചിത്തത കൈവിട്ടില്ല. അദ്ദേഹം കഴിയുന്നത്രവേഗം കൈയിൽ നിന്നും പാമ്പിൻറെ പല്ലുകൾ അടർത്തി മാറ്റി. പിന്നാലെ തറയിൽ ഇരുന്ന പാമ്പാട്ടിയുടെ കൈത്തണ്ടയിൽ, സമീപത്ത് നിന്ന ഒരു യുവാവ് ഒരു കയർ കൊണ്ട് നന്നായി മൂറുക്കി കെട്ടുന്നു. പാമ്പിൻറെ വിഷം ശരീരത്തിൻറെ മറ്റ് ഭാഗങ്ങളിലേക്ക് പടരാതിരിക്കാനായിരുന്നു അത്. ഇതിന് പിന്നാലെ പാമ്പാട്ടി ഒരു ബ്ലേഡ് ഉപയോഗിച്ച് പാമ്പ് കടിച്ച കൈയിൽ പല സ്ഥലത്തായി മുറിവുകളിടുന്നു.
കൈയിൽ അവിടിവിടായി രക്തം പൊടിയുന്നതും വീഡിയോയിൽ കാണാം. പാമ്പിൻറെ വിഷം പുറത്ത് കളയാനുള്ള ഏറ്റവും പ്രാകൃതമായ മാർഗ്ഗമായിരുന്നു അത്.അബ്ദുള്ള അൽ ബലൂഷി എന്ന ഇൻസ്റ്റാഗ്രാം ഉപയോക്താവ് പങ്കുവച്ച വീഡിയോ ദശലക്ഷക്കണക്കിന് പേർ ഇതിനകം കണ്ടു കഴിഞ്ഞു. വീഡിയോ കണ്ട നിരവധി പേർ അദ്ദേഹം ജീവിച്ചിരിപ്പുണ്ടോയെന്നാണ് ആദ്യമന്വേഷിച്ചത്. നിരവധി പേർ പാമ്പാട്ടിയുടെ പ്രവർത്തിയെ വിമർശിച്ചു. ഇക്കാലത്തും ഇത്രയും അശാസ്ത്രീയമായ രീതിയിലാണോ കാര്യങ്ങൾ കൈകാര്യം ചെയ്യുന്നത് എന്നായിരുന്നു മറ്റു ചിലരുടെ സംശയം. മറ്റൊരാൾ എഴുതിയത് ആ അനാവശ്യ മുറിവേൽപ്പിക്കലുകൾ ചെയ്യുന്നതിന് പകരം ആശുപത്രിയിൽ പോകണം എന്നായിരുന്നു.
Read Also : റാഗിങിനിടെ വിദ്യാർത്ഥിയ്ക്ക് ക്രൂരമർദ്ദനം; മർദ്ദിച്ചത് പതിനഞ്ചോളം സീനിയർ വിദ്യാർത്ഥികൾ
