സഞ്ജു സാംസൺ… നിങ്ങൾ വെറുമൊരു ക്രിക്കറ്ററല്ല, ഒരു വികാരമാണ്! പൊട്ടിയ ഫോണുമായി സെൽഫി എടുക്കാൻ ചെന്ന ആരാധകന് നൽകിയത് മറക്കാനാവാത്ത സമ്മാനം

സഞ്ജു സാംസൺ… നിങ്ങൾ വെറുമൊരു ക്രിക്കറ്ററല്ല, ഒരു വികാരമാണ്! പൊട്ടിയ ഫോണുമായി സെൽഫി എടുക്കാൻ ചെന്ന ആരാധകന് നൽകിയത് മറക്കാനാവാത്ത സമ്മാനം

പാലക്കാട്: ഇന്ത്യൻ ക്രിക്കറ്റ് താരം സഞ്ജു സാംസൺ നൽകിയ അപൂർവ സമ്മാനത്തിന്റെ സന്തോഷത്തിലാണ് കടമ്പഴിപ്പുറം സ്വദേശി ടി. ശബരീഷ്. ക്രിക്കറ്റ് കളിക്കാൻ പോകുന്നതിനിടെ ബസ് സ്റ്റോപ്പിന് സമീപം സഞ്ജുവിനെ കണ്ടുമുട്ടിയതാണ് ഈ അനുഭവത്തിന് തുടക്കമായത്.

വൈകിട്ട് പുഞ്ചപ്പാടം മൈതാനത്തേക്ക് പോകുന്ന വഴിയിലായിരുന്നു ശബരീഷും സുഹൃത്തുക്കളും കറുത്ത റേഞ്ച് റോവർ കാറിനരികിൽ നിൽക്കുന്ന സഞ്ജുവിനെ കാണുന്നത്. സഞ്ജുവിനോട് സെൽഫി എടുക്കാമോ എന്ന് ചോദിച്ചപ്പോൾ താരം സന്തോഷത്തോടെ സമ്മതിച്ചു.

സെൽഫി എടുക്കുന്നതിനിടെ ശബരീഷിന്റെ ഫോണിന്റെ സ്ക്രീൻ പൊട്ടിയതും ചിത്രം വ്യക്തമല്ലാത്തതും സഞ്ജുവിന്റെ ശ്രദ്ധയിൽപ്പെട്ടു. ഉടൻ കാറിൽ നിന്ന് ഒരു പുതിയ മൊബൈൽ ഫോൺ എടുത്ത് “ഇത് നിനക്കിരിക്കട്ടെ” എന്ന് പറഞ്ഞു ശബരീഷിന് സമ്മാനിച്ചു. കൂടാതെ, “നന്നായി ക്രിക്കറ്റ് കളിക്കണം” എന്ന ഉപദേശവും നൽകി.

ഈ പുതിയ ഫോണിൽ തന്നെയാണ് ശബരീഷ് സഞ്ജുവിനൊപ്പമുള്ള ചിത്രം പകർത്തിയത്. ഡിഷ് ആന്റിന ടെക്നീഷ്യനായ ശബരീഷ് ഒരു പ്രാദേശിക ക്ലബ്ബിൽ വിക്കറ്റ് കീപ്പറായി ക്രിക്കറ്റ് കളിക്കുന്ന ആളാണ്.

അതേസമയം, മുണ്ടൂരിലെ ഒരു ചായക്കടയിലും സഞ്ജു എത്തി ആരാധകരുമായി സൗഹൃദപരമായി സമയം ചെലവഴിച്ചതും ശ്രദ്ധേയമായി. കുട്ടികൾക്ക് ഫോട്ടോ എടുക്കാൻ അവസരം നൽകി, ചായ കുടിച്ച ശേഷമാണ് താരം യാത്ര തുടർന്നത്.

English Summary

Cricketer Sanju Samson gifted a new mobile phone to a fan in Palakkad after noticing his broken phone screen during a selfie. The fan, Shabareesh, was on his way to play cricket when he spotted Samson and approached him.

Impressed by the fan’s passion, Samson not only took a selfie but also gifted him a phone and encouraged him to play cricket well.