‘ജഗതിച്ചേട്ടൻ എപ്പോൾ ദേഷ്യപ്പെടുമെന്ന് പറയാൻ പറ്റില്ല; മുകേഷേട്ടൻ എല്ലാവരോടും തമാശ പറയും’ — ഉർവശി

‘ജഗതിച്ചേട്ടൻ എപ്പോൾ ദേഷ്യപ്പെടുമെന്ന് പറയാൻ പറ്റില്ല; മുകേഷേട്ടൻ എല്ലാവരോടും തമാശ പറയും’ — ഉർവശി

മലയാള സിനിമയിലെ പകരംവെക്കാനില്ലാത്ത അഭിനേത്രിയാണ് ഉർവശി. ഹാസ്യവും ഗൗരവവും കണ്ണീരും കുശുമ്പും—എന്ത് ഭാവമാകട്ടെ, കഥാപാത്രത്തെ തന്മയത്വത്തോടെ അവതരിപ്പിക്കാനുള്ള കഴിവാണ് അവരെ വേറിട്ടുനിർത്തുന്നത്.

ഇപ്പോൾ ജീവിതത്തിൽ സ്വാഭാവികമായി കോമഡി പറയാൻ കഴിവുള്ള നടൻ മുകേഷ് ആണെന്ന് ഉർവശി പറയുന്നു.

നിരവധി ചിത്രങ്ങളിൽ ഒരുമിച്ച് അഭിനയിച്ച മുകേഷിനെയും ജഗതി ശ്രീകുമാറിനെയും കുറിച്ചുള്ള അനുഭവങ്ങളാണ് പുതിയ അഭിമുഖത്തിൽ ഉർവശി പങ്കുവെച്ചത്. മുകേഷ് മികച്ച ടൈമിംഗോടെ തമാശ പറയുന്ന വ്യക്തിയാണെന്ന് അവർ പറയുന്നു.

“ജീവിതത്തിൽ നന്നായി പഞ്ചോടെ കോമഡി പറയുന്ന ആളുകൾ വളരെ കുറവാണ്. മുകേഷേട്ടൻ നമ്മളെ കളിയാക്കി പറഞ്ഞാലും ആദ്യം നമ്മൾ പൊട്ടിച്ചിരിക്കേണ്ടിവരും; പിന്നീട് മാത്രമേ പ്രതികരിക്കാൻ പറ്റൂ,” എന്ന് ഉർവശി പറയുന്നു.

ചിലപ്പോൾ മുകേഷ് ഗൗരവമായി സംസാരിക്കുമ്പോൾ അത്ഭുതം തോന്നാറുണ്ടെന്നും, തമാശയുടെയും ഗൗരവത്തിന്റെയും രണ്ട് അതിരുകൾ അദ്ദേഹത്തിനുണ്ടെന്നും അവർ കൂട്ടിച്ചേർത്തു. “തമാശ പറയുന്ന പലർക്കും ഈ രണ്ട് എക്സ്ട്രീം കാണാം,” എന്നും ഉർവശി അഭിപ്രായപ്പെട്ടു.

അതേസമയം, ജഗതി ശ്രീകുമാർ വ്യക്തിജീവിതത്തിൽ ഒരു കോമേഡിയൻ പോലെ പെരുമാറുന്ന ആളല്ലെന്ന് ഉർവശി പറഞ്ഞു. സ്റ്റേജിന് പുറത്തുള്ള അദ്ദേഹത്തിന്റെ സ്വഭാവം ഗൗരവമുള്ളതാണെന്നും, ചിലപ്പോൾ കടുത്ത വാക്കുകൾ ഉപയോഗിക്കാറുണ്ടെന്നും അവർ പറഞ്ഞു.

“ജഗതിച്ചേട്ടൻ എപ്പോൾ ദേഷ്യപ്പെടുമെന്ന് പറയാൻ പറ്റില്ല. ചിലപ്പോൾ ‘ഞാൻ ചത്താൽ പോലും നിങ്ങൾ വരരുത്’ പോലുള്ള വാക്കുകൾ വരെ പറയും. പക്ഷേ അദ്ദേഹത്തിന്റെ വായിൽ നിന്ന് അത്തരമൊരു വാക്ക് നമ്മൾ പ്രതീക്ഷിക്കില്ല,” എന്ന് ഉർവശി വ്യക്തമാക്കി.

ജഗതി മികച്ച വായനക്കാരനും വിദ്യാഭ്യാസമുള്ളയാളുമാണെന്നും, അതുകൊണ്ടാകാം അദ്ദേഹത്തിൽ ഗൗരവം കൂടുതലെന്നും അവർ പറഞ്ഞു.

അതേസമയം, മുകേഷ് ഏത് സാഹചര്യത്തിലും, എത്ര ഗൗരവമുള്ള ആളോടും തമാശ പറയാൻ കഴിയുന്ന വ്യക്തിയാണെന്നും ഉർവശി കൂട്ടിച്ചേർത്തു.

മൈൽസ്റ്റോൺ മേക്കേഴ്സിന് നൽകിയ അഭിമുഖത്തിലാണ് ഉർവശിയുടെ പരാമർശങ്ങൾ.

English Summary

Actress Urvashi, known for her versatile performances, spoke about actors Mukesh and Jagathy Sreekumar in a recent interview. She said Mukesh has a natural sense of humor and excellent comic timing, capable of making people laugh even in serious situations. In contrast, she described Jagathy as more serious in personal life, noting that he can sometimes use harsh words and is unpredictable in temperament. However, she also praised his intelligence and reading habits. The remarks were made during an interview with Milestone Makers.