77-ാം റിപ്പബ്ലിക് ദിനാഘോഷ നിറവില് രാജ്യം; കനത്ത സുരക്ഷ
ന്യൂഡൽഹി: രാജ്യം ഇന്ന് 77-ാമത് റിപ്പബ്ലിക് ദിനം ആഘോഷിക്കുന്നു. ഇന്ത്യയുടെ സൈനിക ശക്തിയും സാംസ്കാരിക വൈവിധ്യവും ലോകത്തിനു മുന്നിൽ അവതരിപ്പിക്കുന്ന റിപ്പബ്ലിക് ദിന പരേഡ് ഡൽഹിയിലെ കർത്തവ്യപഥിൽ ഇന്ന് നടക്കും.
രാവിലെ 9.30ഓടെ പ്രധാനമന്ത്രി നരേന്ദ്ര മോദിയും പ്രതിരോധമന്ത്രി രാജ്നാഥ് സിങ്ങും ദേശീയ യുദ്ധസ്മാരകത്തിലെത്തി പുഷ്പചക്രം അർപ്പിക്കുന്നതോടെയാണ് ഔദ്യോഗിക ചടങ്ങുകൾക്ക് തുടക്കമാകുന്നത്.
യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റയും യൂറോപ്യൻ കമ്മിഷൻ പ്രസിഡന്റ് ഉർസുല ഫോൺ ഡെർ ലെയ്നും ഇത്തവണത്തെ റിപ്പബ്ലിക് ദിനാഘോഷങ്ങളുടെ മുഖ്യാതിഥികളാണ്.
കേരളം ഉൾപ്പെടെ വിവിധ സംസ്ഥാനങ്ങളുടെ കലാപ്രകടനങ്ങളും 30 ടാബ്ലോകളും പരേഡിൽ അണിനിരക്കും.
രാവിലെ 10.30ന് ആരംഭിക്കുന്ന പരേഡ് ഏകദേശം 90 മിനിറ്റ് നീണ്ടുനിൽക്കും.
കരസേനയുടെ ഡൽഹി ഏരിയ ജനറൽ ഓഫീസർ കമാൻഡിങ് ലഫ്റ്റനന്റ് ജനറൽ ഭവ്നീഷ് കുമാർ പരേഡിന് നേതൃത്വം നൽകും. ദേശീയഗാനമായ ‘വന്ദേമാതരം’ രചിച്ചതിന്റെ 150-ാം വാർഷികം പ്രമാണിച്ച്, അതാണ് ഇത്തവണത്തെ റിപ്പബ്ലിക് ദിന പരേഡിന്റെ മുഖ്യപ്രമേയം.
‘വന്ദേമാതരം’ ഗാനത്തിന്റെ വരികൾ ആസ്പദമാക്കിയ അപൂർവ ദൃശ്യങ്ങളും ചിത്രങ്ങളും കർത്തവ്യപഥിൽ പ്രദർശിപ്പിക്കും.
‘ഓപ്പറേഷൻ സിന്ദൂറി’യിൽ ഉപയോഗിച്ച ആയുധങ്ങളുടെ മാതൃകകൾ ഉൾപ്പെടെ വിവിധ സൈനിക ഉപകരണങ്ങളും പരേഡിൽ അവതരിപ്പിക്കും.
കരസേനയുടെ യുദ്ധവ്യൂഹ മാതൃക ആദ്യമായാണ് റിപ്പബ്ലിക് ദിന പരേഡിൽ അണിനിരക്കുന്നത്. യൂറോപ്യൻ യൂണിയന്റെ സൈനികസംഘവും ആഘോഷങ്ങളിൽ പങ്കാളികളാകും.
റിപ്പബ്ലിക് ദിനാഘോഷങ്ങളുടെ പശ്ചാത്തലത്തിൽ ഡൽഹിയുൾപ്പെടെ രാജ്യവ്യാപകമായി കനത്ത സുരക്ഷ ഏർപ്പെടുത്തിയിട്ടുണ്ട്. കേന്ദ്ര സായുധ പൊലീസ് വിഭാഗങ്ങളെ വൻതോതിൽ വിന്യസിച്ചിരിക്കുകയാണ്.
English Summary:
India celebrates its 77th Republic Day today with a grand parade at Kartavya Path in New Delhi, showcasing the nation’s military strength and cultural diversity. Prime Minister Narendra Modi and Defence Minister Rajnath Singh will begin the ceremonies at the National War Memorial. European Council President Antonio Costa and European Commission President Ursula von der Leyen are the chief guests. The parade features 30 tableaux, state cultural performances, military displays, and special presentations marking the 150th anniversary of ‘Vande Mataram’, under tight security across the country.
india-77th-republic-day-parade-kartavya-path
Republic Day, India, Kartavya Path, New Delhi, Republic Day Parade, Indian Army, Vande Mataram, National Celebration
