വിജയ് സിബിഐ ആസ്ഥാനത്ത്; കരൂർ ദുരന്തത്തിൽ ചോദ്യം ചെയ്യൽ തുടരുന്നു
കഴിഞ്ഞ വർഷം തമിഴ്നാട്ടിലെ കരൂരിൽ നടനും രാഷ്ട്രീയ നേതാവുമായ വിജയിയുടെ പാർട്ടിയായ ടിവികെ സംഘടിപ്പിച്ച സമ്മേളനത്തിനിടെ ഉണ്ടായ തിക്കിലും തിരക്കിലും 41 പേർ മരിച്ച സംഭവത്തിൽ സിബിഐ വിജയിയെ ചോദ്യം ചെയ്തു.
ഇന്ന് ഡൽഹിയിലെ സിബിഐ ആസ്ഥാനത്താണ് വിജയ് അന്വേഷണ സംഘത്തിന് മുന്നിൽ ഹാജരായത്.
നിശ്ചയിച്ച സമയത്തേക്കാൾ വൈകിയാണ് വിജയ് സമ്മേളന വേദിയിലെത്തിയതെന്നും, ഇതാണ് തിരക്ക് നിയന്ത്രണം വിട്ടതിലേക്ക് നയിച്ചതോയെന്നും സിബിഐ പരിശോധിക്കുന്നു.
സമ്മേളനത്തിന് എത്തുമെന്ന് പ്രതീക്ഷിച്ച ജനക്കൂട്ടത്തിന്റെ എണ്ണം, സ്ഥലത്തെ പരിമിതമായ സൗകര്യങ്ങൾ, സുരക്ഷാ ക്രമീകരണങ്ങളിലെ പോരായ്മകൾ തുടങ്ങിയ കാര്യങ്ങളെക്കുറിച്ച് വിജയിക്ക് മുൻകൂട്ടി അറിവുണ്ടായിരുന്നോയെന്നതും അന്വേഷണ വിഷയമാണ്.
തിരക്കിനിടെ ഒരു കുട്ടിയെ കാണാതായെന്ന വിവരത്തെ തുടർന്നുണ്ടായ ബഹളത്തെക്കുറിച്ച് വിജയ് അറിഞ്ഞിരുന്നോയെന്നും, ജനക്കൂട്ടത്തെ നിയന്ത്രിക്കാൻ പൊലീസ് ലാത്തിച്ചാർജ് നടത്തിയ സംഭവം അദ്ദേഹത്തിന്റെ ശ്രദ്ധയിൽപ്പെട്ടിരുന്നോയെന്നും സിബിഐ അന്വേഷിക്കുന്നു.
അപകടകരമായ സാഹചര്യം നിലനിന്നിരിക്കെ എന്തുകൊണ്ടാണ് വിജയ് വേദി വിട്ട് മടങ്ങിയതെന്നും ചോദ്യം ചെയ്യലിൽ ഉൾപ്പെടുത്തിയിട്ടുണ്ട്.
2025 സെപ്റ്റംബർ 27ന് കരൂർ–ഈറോഡ് ഹൈവേയിലെ വേലുസാമിപുരത്താണ് ദുരന്തമുണ്ടായത്. ഒൻപത് കുട്ടികളും പതിനെട്ട് സ്ത്രീകളും ഉൾപ്പെടെ 41 പേർ മരിക്കുകയും നൂറിലധികം പേർക്ക് പരിക്കേൽക്കുകയും ചെയ്തു.
സംഭവത്തിന്റെ ഗൗരവം കണക്കിലെടുത്ത് സുപ്രീം കോടതി കഴിഞ്ഞ ഒക്ടോബറിലാണ് അന്വേഷണം സിബിഐക്ക് കൈമാറിയത്.
English Summary:
The CBI questioned actor and political leader Vijay in connection with the 2025 Karur stampede during a TVK party conference that killed 41 people. Investigators are examining whether Vijay’s late arrival contributed to the chaos, his prior knowledge of crowd size and safety arrangements, and why he left the venue amid the dangerous situation. The probe was handed over to the CBI by the Supreme Court.
karur-stampede-case-cbi-questions-vijay
Vijay, TVK, Karur Stampede, Tamil Nadu News, CBI Probe, Political News, India News
