കൊച്ചി: പൊലീസിന്റെ മിന്നൽ പരിശോധനയിൽ പിടിയിലായത് 300 പേർ. കഴിഞ്ഞ ദിവസം അർദ്ധരാത്രിയാണ് കൊച്ചിനഗരം കേന്ദ്രീകരിച്ച് പൊലീസിന്റയും എക്സൈസിന്റെയും മിന്നൽ പരിശോധന നടന്നത്.
77-ഓളം കേസുകളാണ് ഇന്നലെ മാത്രം രജിസ്റ്റർ ചെയ്തത്. മയക്കുമരുന്ന് കടത്തിയവരും ഉപയോഗിച്ചവരുമാണ് പൊലീസിന്റെ പിടിയിലായത്.
മദ്യപിച്ച് വാഹനമോടിച്ചതിന് 193 പേരെ കസ്റ്റഡിയിലെടുത്തു. പൊതുയിടങ്ങളിൽ ഇരുന്ന് മദ്യപിച്ചതിന് 26 കേസുകളും രജിസ്റ്റർ ചെയ്തു. ക‍ഞ്ചാവ്, എംഡിഎംഎ, ഹാഷിഷ് ഓയിൽ എന്നിവ ഉൾപ്പെടെയുള്ള മയക്കുമരുന്നുകളും പിടിച്ചെടുത്തു.
സംസ്ഥാനത്തുടനീളം ഇത്തരത്തിൽ പൊലീസിന്റെയും എക്സൈസിന്റെ മിന്നൽ പരിശോധന നടന്നുവരികയാണ്. കഴിഞ്ഞ ദിവസം മാത്രം നിരവധി കേസുകളാണ് സംസ്ഥാനത്ത് രജിസ്റ്റർ ചെയ്തത്.
ഹൈബ്രിഡ് കഞ്ചാവുമായി രണ്ട് സ്ത്രീകളെ കൊച്ചിയിൽ നിന്ന് പിടികൂടിയിരുന്നു. മുംബൈയിൽ നിന്ന് കേരളത്തിലേക്ക് ലഹരി എത്തിക്കുന്ന സംഘത്തിലുള്ളവരാണ് കൊച്ചിയിൽ പിടിയിലായത്. ബാങ്കോക്കിൽ നിന്ന് 44 ലക്ഷം രൂപയുടെ കഞ്ചാവുമായാണ് യുവതികൾ നെടുമ്പാശേരി വിമാനത്താവളത്തിൽ എത്തിയത്.
