പത്തനംതിട്ട: മണ്ഡല കാലത്ത് ശബരിമലയിൽ സൗജന്യ വൈഫൈ സേവനവുമായി ബിഎസ്എൻഎൽ. ദേവസ്വംബോർഡും ബി.എസ്.എൻ.എലും ചേർന്നു നടപ്പാക്കുന്ന പദ്ധതിയാണിത്. പമ്പയിലും നിലയ്ക്കലും എല്ലായിടത്തും സന്നിധാനത്ത് ശരംകുത്തി മുതലുമായിരിക്കും സൗജന്യ വൈഫൈ കിട്ടുക.
സന്നിധാനത്ത് 22 ഉം, പമ്പയിലും നിലയ്ക്കലും 13 ഉം വീതമാണ് വൈഫൈ ഹോട്ട്സ്പോട്ടുകൾ ഉണ്ടാകുക. പമ്പയിലും നിലയ്ക്കലും എല്ലായിടത്തും വൈഫൈ ലഭ്യമാകും. സന്നിധാനത്ത് മരക്കൂട്ടം മുതലാണ് സേവനം ലഭിക്കുക. തീർഥാടന പാതയിൽ മൊബൈൽ കവറേജ് സുഗമമാക്കാൻ 21 മൊബൈൽ ടവറുകൾ സജ്ജമാക്കിയിട്ടുണ്ട്.
ആദ്യ അരമണിക്കൂർ നേരത്തേക്കാണ് വൈഫൈ സൗജന്യമായി ലഭിക്കുക. അരമണിക്കൂർ കഴിഞ്ഞ് പണം നൽകി സേവനം തുടരാം. ഫോണിൽ വൈഫൈ കണക്ട് ചെയ്യേണ്ട സ്റ്റെപ്പുകൾ വിശദമായി അറിയാം.
ഫോണിൽ വൈഫൈ ഓപ്ഷൻ ഓണാക്കി BSNL Wifi എന്ന വൈഫൈ അഡ്രസിൽ ക്ലിക്ക് ചെയ്യുക. ഇതിന് ശേഷം ഒടിപി ലഭ്യമാകാനായി മൊബൈൽ നമ്പർ നൽകണം. മൊബൈൽ നമ്പരിലേക്ക് വരുന്ന ഒടിപി നൽകുക. വൈഫൈ കണക്ടാകും. അരമണിക്കൂർ കഴിയുമ്പോൾ ഇൻ്റർനെറ്റ് ചാർജ് ചെയ്യാനുള്ള ഓപ്ഷൻ ലഭ്യമാകും.
ബി.എസ്.എൻ.എലിന്റെ വൈഫൈ റോമിങ് ഇക്കുറി മൂന്നിടത്തും ഉണ്ടാകും. ‘സർവത്ര’ എന്ന പേരിൽ പ്രഖ്യാപിച്ച പദ്ധതിയാണിത്. വീടുകളിൽ ബി.എസ്.എൻ.എൽ. ഫൈബർ കണക്ഷൻ എടുത്തിട്ടുള്ളവർക്ക് ശബരിമലയിൽ വൈഫൈ റോമിങ് സംവിധാനം ഉപയോഗിച്ച് വീട്ടിലെ ഇന്റർനെറ്റ് സേവനം ലഭ്യമാക്കും. ഇതിനായി http://portal.bnsl.in/ftth/wifiroaming എന്ന പോർട്ടലിലോ, ബി.എസ്.എൻ.എൽ. Wifi roaming എന്ന വൈഫൈ പോയിന്റിൽനിന്നോ രജിസ്റ്റർചെയ്യണം.
ശബരിമലയിലെ സേവനങ്ങൾക്കായി തീർഥാടകർക്ക് 9400901010 എന്ന മൊബൈൽ നമ്പരിലോ 18004444 എന്ന ചാറ്റ്ബോക്സിലോ bsnlebpta@gmail.com എന്ന മെയിൽ ഐഡിയിലോ ബന്ധപ്പെടാം.
