തിരുവനന്തപുരം: ആഗോള സമുദ്രവ്യാപാര ഭൂപടത്തിൽ ഇന്ത്യയുടെ കരുത്ത് വിളിച്ചോതാൻ വിഴിഞ്ഞം അന്താരാഷ്ട്ര തുറമുഖം ഒരുങ്ങുന്നു.
പശ്ചിമേഷ്യയിലെ യുദ്ധസാഹചര്യങ്ങളും ചരക്കുനീക്കത്തിലെ അനിശ്ചിതത്വവും കണക്കിലെടുത്ത് വിഴിഞ്ഞത്തെ ഒരു തന്ത്രപ്രധാന ‘മാരിടൈം ഹബ്ബ്’ ആയി വികസിപ്പിക്കാനാണ് കേന്ദ്ര സർക്കാരിന്റെ തീരുമാനം.
പശ്ചിമേഷ്യൻ സംഘർഷവും വിഴിഞ്ഞത്തിന്റെ തന്ത്രപ്രധാനമായ വളർച്ചയും
ലോകത്തെ നടുക്കുന്ന പശ്ചിമേഷ്യൻ യുദ്ധസാഹചര്യങ്ങൾ ആഗോള ചരക്കുനീക്കത്തെ കാര്യമായി ബാധിച്ചിട്ടുണ്ട്.
ചെങ്കടലിലെയും സൂയസ് കനാലിലെയും സുരക്ഷിതത്വമില്ലായ്മ കപ്പൽ കമ്പനികളെ പുതിയ പാതകൾ തേടാൻ പ്രേരിപ്പിക്കുന്നു.
ഈ സാഹചര്യത്തിലാണ് ഇന്ത്യൻ മഹാസമുദ്രത്തിൽ സുരക്ഷിതമായ ഒരു താവളം എന്ന നിലയിൽ വിഴിഞ്ഞത്തിന് പ്രാധാന്യമേറുന്നത്.
പശ്ചിമേഷ്യൻ സംഘർഷങ്ങൾ ബാധിക്കാത്ത വിശ്വസ്തമായ ഒരു മാരിടൈം ഹബ്ബായി വിഴിഞ്ഞത്തെ മാറ്റാനാണ് പ്രധാനമന്ത്രിയുടെ ഓഫീസ് ലക്ഷ്യമിടുന്നത്.
സിംഗപ്പൂരിനും ദുബായിക്കും ബദലായി ഭാരതത്തിന്റെ സ്വന്തം ട്രാൻസ്ഷിപ്പ്മെന്റ് ഹബ്ബ്
നിലവിൽ കിഴക്കും പടിഞ്ഞാറും തമ്മിലുള്ള കപ്പൽ ഗതാഗതത്തിന് സിംഗപ്പൂർ, കൊളംബോ, ദുബായ് തുറമുഖങ്ങളെയാണ് ലോകം പ്രധാനമായും ആശ്രയിക്കുന്നത്.
എന്നാൽ വിഴിഞ്ഞത്തിന്റെ ആഴവും അന്താരാഷ്ട്ര കപ്പൽ ചാലുമായുള്ള (International Shipping Lane) അടുപ്പവും ഈ വിദേശ തുറമുഖങ്ങൾക്ക് വലിയ ഭീഷണിയാകും.
ആഗോള ചരക്കുനീക്കത്തിന്റെ 40 ശതമാനവും വിഴിഞ്ഞത്തിന് തൊട്ടടുത്തുകൂടിയാണ് കടന്നുപോകുന്നത്.
ഈ കപ്പലുകളെ വിഴിഞ്ഞത്തേക്ക് ആകർഷിക്കുന്നതിലൂടെ കോടികളുടെ വിദേശനാണ്യമാണ് ഇന്ത്യ ലക്ഷ്യമിടുന്നത്.
കല്യാണി–പ്രണവ് വിവാഹം? അഭ്യൂഹങ്ങൾക്ക് ‘വ്യാജ വാർത്ത’ എന്ന് ലിസിയുടെ മറുപടി
മാരിടൈം അമൃത്കാൽ വിഷൻ 2047: ഭാവിയുടെ വികസനരേഖ
രാജ്യത്തെ തുറമുഖ വികസനത്തിനായി കേന്ദ്രം വിഭാവനം ചെയ്ത ‘മാരിടൈം അമൃത്കാൽ വിഷൻ 2047’-ന്റെ ഭാഗമായാണ് വിഴിഞ്ഞത്തിന്റെ രണ്ടാം ഘട്ട വികസനം നടപ്പിലാക്കുന്നത്.
ഇതിനായി കേന്ദ്ര ഷിപ്പിങ് മന്ത്രാലയ ഉദ്യോഗസ്ഥർ വിസിലുമായും (VISL) സംസ്ഥാന തുറമുഖ വകുപ്പുമായും പ്രാഥമിക ചർച്ചകൾ പൂർത്തിയാക്കി.
വെറുമൊരു ട്രാൻസ്ഷിപ്പ്മെന്റ് ടെർമിനൽ എന്നതിലുപരി, ലോജിസ്റ്റിക്സ്, സ്റ്റോറേജ്, പ്രോസസിംഗ് സൗകര്യങ്ങളുള്ള ഒരു സമ്പൂർണ്ണ ഹബ്ബായി വിഴിഞ്ഞം മാറും.
അഞ്ചു കിലോമീറ്റർ ബെർത്തും ആഗോള നിക്ഷേപകരുടെ വരവും
രണ്ടാം ഘട്ടം പൂർത്തിയാകുമ്പോൾ വിഴിഞ്ഞത്തെ ബെർത്തിന്റെ നീളം രണ്ട് കിലോമീറ്ററാകും.
എന്നാൽ ഒരു ആഗോള ഹബ്ബ് എന്ന പദവി കൈവരിക്കാൻ കുറഞ്ഞത് അഞ്ച് കിലോമീറ്റർ നീളമുള്ള ബെർത്ത് ആവശ്യമാണ്.
നിലവിൽ അദാനി ഗ്രൂപ്പാണ് നിർമ്മാണം നടത്തുന്നതെങ്കിലും, ഇത്രയും വലിയ വികസനത്തിനായി കൂടുതൽ സ്വകാര്യ നിക്ഷേപകരെ കേന്ദ്രം സ്വാഗതം ചെയ്യും.
കപ്പലുകൾക്ക് ഇന്ധനം നിറയ്ക്കാനുള്ള ബങ്കറിങ് സൗകര്യം, ഫ്രീ ട്രേഡ് സോൺ, അത്യാധുനിക അറ്റകുറ്റപ്പണി കേന്ദ്രങ്ങൾ എന്നിവയും ഇതിന്റെ ഭാഗമാകും.
English Summary
The Indian government is set to elevate Vizhinjam International Seaport into a major global maritime hub, viewing it as a safer alternative to Middle Eastern routes amid rising regional tensions. Directed by the PMO, the Shipping Ministry is drafting a vision document to compete with giants like Singapore and Dubai. The plan includes extending berths to 5km, establishing bunkering units, and creating free trade zones, aiming to capture 40% of global sea traffic passing nearby.
