റാങ്‌പോ: സിക്കിമില്‍ ഏകീകൃത സിവില്‍ കോഡ് (യുസിസി) നടപ്പാക്കില്ലെന്ന് മുഖ്യമന്ത്രിയും ബിജെപി സഖ്യകക്ഷി സിക്കിം ക്രാന്തികാരി മോര്‍ച്ച നേതാവുമായ പ്രേം സിങ് തമാങ്. തങ്ങള്‍ മറ്റ് സംസ്ഥാനങ്ങളെ പോലെയല്ല. ആര്‍ട്ടിക്കിള്‍ 371 (എഫ്) പ്രകാരം തങ്ങള്‍ക്ക് പ്രത്യേക പരിരക്ഷയുണ്ട്. പ്രത്യേക പരിരക്ഷയുള്ള സംസ്ഥാനങ്ങളില്‍ യുസിസി നടപ്പിലാക്കില്ലെന്ന് റാങ്‌പോയില്‍ നടന്ന രാഷ്ട്രീയ യോഗത്തില്‍ അദ്ദേഹം വ്യക്തമാക്കി.
‘നിങ്ങള്‍ ഈ വിഷയത്തില്‍ ആശങ്കപ്പെടേണ്ടതില്ല. യുസിസി ചെയര്‍മാന്‍ കിരണ്‍ റിജിജുവുമായും കേന്ദ്രവുമായും നിരന്തരം ബന്ധപ്പെടുന്നുണ്ട്. വടക്കുകിഴക്കന്‍ സംസ്ഥാനങ്ങളില്‍ യുസിസി നടപ്പാക്കരുതെന്ന് ഈ കമ്മിറ്റി ശുപാര്‍ശ ചെയ്തിട്ടുണ്ട്,’ പ്രേം സിങ് തമാങ് പറഞ്ഞു.
യുസിസി നടപ്പാക്കുന്നതിനെതിരെ സിക്കിം അസംബ്ലി പ്രമേയം പാസാക്കുമോ എന്ന് വ്യക്തമല്ലെങ്കിലും ചില സംസ്ഥാനങ്ങള്‍ അങ്ങനെ ചെയ്യാന്‍ തുടങ്ങിയിട്ടുണ്ട്. കഴിഞ്ഞ ചൊവ്വാഴ്ച കേരള മുഖ്യമന്ത്രി പിണറായി വിജയന്‍ യുസിസിയ്ക്കെതിരെ സഭയില്‍ പ്രമേയം അവതരിപ്പിച്ചിരുന്നു. ഇത് കേന്ദ്രത്തിന്റെ ഭാഗത്തുനിന്ന് ‘ഏകപക്ഷീയവും തിടുക്കത്തിലുള്ളതുമായ’ നടപടിയാണെന്നാണ് അദ്ദേഹം പറഞ്ഞത്.
ഈ വര്‍ഷം ഫെബ്രുവരിയില്‍ മിസോറാം നിയമസഭയും സമാനമായ പ്രമേയം പാസാക്കിയിരുന്നു. വൈവിധ്യത്തെ ആഘോഷിക്കുന്ന ‘ഇന്ത്യ എന്ന ആശയത്തിന്’ എതിരാണ് യുസിസി എന്ന് മേഘാലയ മുഖ്യമന്ത്രി കോണ്‍റാഡ് സാംഗ്മയും പ്രസ്താവിച്ചിരുന്നു.
