ചെന്നൈ: ഏഷ്യന്‍ ചാമ്പ്യന്‍സ് ട്രോഫി കിരീട നേട്ടത്തിന് ഇന്ത്യയ്ക്ക് ഇനി വേണ്ടത് ഒരു ജയം മാത്രം. നാളെ നടക്കുന്ന ഫൈനലില്‍ മലേഷ്യയെ തോല്‍പ്പിക്കണം. അങ്ങനെ സംഭവിച്ചാല്‍ നാലാമത്തെ തവണ ഇന്ത്യന്‍ ടീം ഏഷ്യന്‍ ചാമ്പ്യന്‍സ് ട്രോഫി ജേതാക്കളാകും. ഇന്ന് നടന്ന സെമി ഫൈനലില്‍ ജപ്പാനെ തകര്‍ത്താണ് ഇന്ത്യ കലാശപ്പോരിന് യോഗ്യത നേടിയത്. മറുപടിയില്ലാത്ത അഞ്ച് ഗോളിന് ജപ്പാനെ തകര്‍ത്താണ് ഇന്ത്യന്‍ ജയം.
ആദ്യ ക്വാര്‍ട്ടര്‍ ഇരുടീമുകളും ഗോള്‍ ഒന്നും നേടിയില്ല. ജപ്പാന്റെ ചില മുന്നേറ്റങ്ങള്‍ മലയാളി ഗോള്‍ കീപ്പര്‍ പിആര്‍ ശ്രീജേഷ് തടഞ്ഞിട്ടു. രണ്ടാം ക്വാര്‍ട്ടറിലാണ് ഇന്ത്യ ആക്രമണം അഴിച്ചുവിട്ടത്. 19-ാം മിനിറ്റില്‍ ആകാശ്ദീപ് സിംഗാണ് ആദ്യ ഗോള്‍ സ്വന്തമാക്കിയത്. തൊട്ടുപിന്നാലെ ഇന്ത്യയ്ക്ക് അനുകൂലമായി ഒരു പെനാല്‍റ്റി കോര്‍ണര്‍ ലഭിച്ചു. ക്യാപ്റ്റന്‍ ഹര്‍മ്മന്‍പ്രീത് സിംഗിന്റെ ഡ്രാഗ് ഫ്‌ലിക്ക് പിഴച്ചില്ല. ഇന്ത്യ 2-0 ത്തിന് മുന്നിലെത്തി. 30-ാംമിനിറ്റില്‍ ആദ്യ പകുതി അവസാനിക്കുന്നതിന് തൊട്ടുമുമ്പായി ഇന്ത്യ വീണ്ടും ലീഡ് ഉയര്‍ത്തി. മന്‍പ്രീത് സിംഗാണ് ഇന്ത്യയുടെ മൂന്നാം ഗോള്‍ നേടിയത്.
മൂന്നാം ക്വാര്‍ട്ടറില്‍ 39-ാം മിനിറ്റില്‍ ഇന്ത്യയുടെ നാലാം ഗോള്‍ പിറന്നു. മന്‍പ്രീത് സിംഗിന്റെ മത്സരത്തിലെ രണ്ടാം ഗോള്‍ നേടി. മൂന്നാം ക്വാര്‍ട്ടര്‍ അവസാനിക്കുമ്പോള്‍ ഇന്ത്യ 4-0 ത്തിന് മുന്നിലായി. 51-ാം മിനിറ്റില്‍ കാര്‍ത്തി സെല്‍വത്തിലൂടെ ഇന്ത്യ അഞ്ചിന്റെ പഞ്ചും സ്വന്തമാക്കി. 60 മിനിറ്റ് പിന്നുടുമ്പോള്‍ 5-0 ത്തിന് ഇന്ത്യന്‍ ജയം. ഇരട്ടഗോള്‍ നേടിയ മന്‍പ്രീത് സിംഗാണ് മത്സരത്തിലെ താരം.
