കൊച്ചി: ഉമാ തോമസ് എംഎൽഎയ്ക്ക് അപകടമുണ്ടായ സംഭവത്തിൽ അറസ്റ്റിലായ മൂന്നു പ്രതികൾക്കും ഇടക്കാല ജാമ്യം അനുവദിച്ചു. മൃദംഗ വിഷന് സിഇഒ ഷമീര്, പന്തല് നിര്മാണ ജോലികള് ചെയ്ത മുളന്തുരുത്തി സ്വദേശി ബെന്നി, ഏകോപനം നടത്തിയ കൃഷ്ണകുമാര് എന്നിവര്ക്കാണ് ജാമ്യം ലഭിച്ചത്. മജിസ്ട്രേറ്റിൻ്റെ വസതിയിൽ ഹാജരാക്കിയപ്പോഴാണ് പ്രതികൾക്ക് ജാമ്യം അനുവദിച്ചത്.(Uma Thomas MLA accident; Interim bail for three accused)
ഇവരുടെ ജാമ്യപേക്ഷ കോടതി മൂന്നാം തീയതി പരിഗണിക്കും. പരിപാടിയിൽ വൻ സുരക്ഷാ വീഴ്ചയുണ്ടായതായി പൊലീസ്, ഫയർ ഫോഴ്സ്, പൊതുമരാമത്ത് വകുപ്പ് എന്നീ വിഭാഗങ്ങൾ സംയുക്ത റിപ്പോർട്ട് നൽകിയിരുന്നു. സ്റ്റേജ് നിർമിച്ചത് അപകടകരമായ രീതിയിലാണ്, അധികമായി നിർമിച്ച ഭാഗത്ത് വേണ്ടത്ര ഉറപ്പില്ലായിരുന്നു. വിഐപി പവലിയന്റെ ഭാഗത്ത് ആംബുലൻസ് ഇല്ലാതിരുന്നത് വൈദ്യസഹായം വൈകാൻ കാരണമായെന്നും റിപ്പോർട്ടിൽ ചൂണ്ടിക്കാട്ടിയിരുന്നു.
