ക്ഷേമപെൻഷൻ 3000, കുടുംബങ്ങൾക്ക് 25 ലക്ഷം ഇൻഷുറൻസ്; യുഡിഎഫ് പ്രകടന പത്രിക പുറത്തിറങ്ങി

ക്ഷേമപെൻഷൻ 3000, കുടുംബങ്ങൾക്ക് 25 ലക്ഷം ഇൻഷുറൻസ്; യുഡിഎഫ് പ്രകടന പത്രിക പുറത്തിറങ്ങി

കൊച്ചി: നിയമസഭാ തെരഞ്ഞെടുപ്പിനെ മുന്നിൽ കണ്ടു യുഡിഎഫ് പ്രകടന പത്രിക പുറത്തിറക്കി. തെലങ്കാന മുഖ്യമന്ത്രി രേവന്ത് റെഡ്ഡിയാണ് പത്രിക പ്രകാശനം ചെയ്തത്. ‘കേരളം ജയിക്കും, യുഡിഎഫ് നയിക്കും’ എന്ന മുദ്രാവാക്യത്തോടെയാണ് പ്രധാന വാഗ്ദാനങ്ങൾ അവതരിപ്പിച്ചത്.

സ്ത്രീകൾക്ക് കെ.എസ്.ആർ.ടി.സി ബസുകളിൽ സൗജന്യ യാത്ര, കോളജ് വിദ്യാർത്ഥിനികൾക്ക് പ്രതിമാസം 1000 രൂപ ധനസഹായം, ക്ഷേമപെൻഷൻ 3000 രൂപയായി വർധിപ്പിക്കൽ എന്നിവയാണ് പ്രധാന പ്രഖ്യാപനങ്ങൾ. കൂടാതെ, എല്ലാ കുടുംബങ്ങൾക്കും 25 ലക്ഷം രൂപവരെ ‘ഉമ്മൻചാണ്ടി ആരോഗ്യ ഇൻഷുറൻസ്’ നൽകുമെന്നും പത്രികയിൽ പറയുന്നു.

യുവജനങ്ങൾക്ക് ബിസിനസ് ആരംഭിക്കാൻ 5 ലക്ഷം രൂപ വരെ പലിശരഹിത വായ്പ, മുതിർന്ന പൗരന്മാർക്കായി പ്രത്യേക വകുപ്പ്, സ്ത്രീകളും കുട്ടികളും ഉൾപ്പെടുന്ന ആരോഗ്യ പദ്ധതികൾ എന്നിവയും ഉൾപ്പെടുത്തിയിട്ടുണ്ട്. ഷീ ഹോസ്പിറ്റൽ, അമ്മവാടി പദ്ധതി, ട്രൈബൽ ഹെൽത്ത് ക്ലസ്റ്ററുകൾ, തീരദേശ മേഖലകളിൽ കോസ്റ്റൽ ഹെൽത്ത് കെയർ യൂണിറ്റുകൾ എന്നിവയും വാഗ്ദാനങ്ങളിലുണ്ട്.

വിദ്യാഭ്യാസ മേഖലയിലും മാറ്റങ്ങൾ ലക്ഷ്യമിട്ട്, ക്യാംപസുകളിലെ റാഗിങ് തടയാൻ പ്രത്യേക നിയമം കൊണ്ടുവരും. ‘സിദ്ധാർത്ഥൻ സ്റ്റുഡന്റ് ഡിസ്ട്രസ് ആപ്പ്’ നടപ്പാക്കുകയും, ഉയർന്ന വിദ്യാഭ്യാസ രംഗത്തെ രാഷ്ട്രീയ സ്വാധീനം കുറയ്ക്കാൻ അക്കാദമിക് സിന്‍ഡിക്കേറ്റ് രൂപീകരിക്കുമെന്നും പ്രഖ്യാപിച്ചു.

ആരോഗ്യ മേഖലയെ ശക്തിപ്പെടുത്തുന്നതിനായി സർക്കാർ ആശുപത്രികളിൽ ബെഡ് ഉറപ്പാക്കൽ, മൊബൈൽ കീമോതെറാപ്പി യൂണിറ്റുകൾ, സൗജന്യ മാമോഗ്രാം, ഡയാലിസിസ് സേവനങ്ങൾ എന്നിവ നടപ്പാക്കും. കൂടാതെ, ആശാ വർക്കർമാരുടെ വേതനം വർധിപ്പിക്കുകയും അങ്കണവാടി കുട്ടികൾക്ക് സ്ഥിരമായ മെഡിക്കൽ പരിശോധന ഉറപ്പാക്കുകയും ചെയ്യും.

സംസ്ഥാനത്തെ ടൂറിസം, വ്യവസായം, എം.എസ്.എം.ഇ മേഖലകൾ വികസിപ്പിക്കാൻ പ്രത്യേക പദ്ധതികളും പത്രികയിൽ ഉൾപ്പെടുത്തിയിട്ടുണ്ട്. കേരളത്തെ ലോകോത്തര ആരോഗ്യ കേന്ദ്രമാക്കി മാറ്റുകയെന്നതാണ് യുഡിഎഫിന്റെ ലക്ഷ്യമെന്ന് നേതാക്കൾ വ്യക്തമാക്കി.

English Summary:
TheUDF, Kerala Election, Manifesto, Welfare Pension, KSRTC, Raghavan Reddy, Kerala Politics, Election 2026 UDF released its election manifesto promising welfare pension hike to ₹3000, free travel for women in KSRTC buses, ₹1000 monthly aid for female college students, and free health insurance up to ₹25 lakh for all families. The manifesto also includes interest-free loans for youth, healthcare expansion, education reforms, and infrastructure development.