ന്യൂഡല്ഹി: കൗണ്ടര് വഴിയെടുക്കുന്ന റെയില്വേ ടിക്കറ്റുകള് യാത്രക്കാര്ക്ക് ഓണ്ലൈന് വഴി റദ്ദാക്കാൻ അവസരം. ഐആര്സിടിസി വെബ്സൈറ്റില് ഇതിനുള്ള സൗകര്യമൊരുക്കിയിട്ടുണ്ടെന്ന് റെയില്വെ മന്ത്രി അശ്വനി വൈഷ്ണവ് അറിയിച്ചു. രാജ്യസഭയിലാണ് റെയില്വെ മന്ത്രി ഇക്കാര്യം അറിയിച്ചത്.
വെബ്സൈറ്റിന് പുറമെ 139 എന്ന ടോള് ഫ്രീ നമ്പറിലും ഈ സൗകര്യം ലഭിക്കും. എന്നാൽ ഓണ്ലൈന് വഴി ടിക്കറ്റ് റദ്ദാക്കാന് കഴിയുമെങ്കിലും യാത്രക്കാര്ക്ക് ടിക്കറ്റിന്റെ പണം ലഭിക്കണമെങ്കിൽ റിസര്വേഷന് കൗണ്ടറിൽ ബന്ധപ്പെടണം. വെയ്റ്റിങ് ലിസ്റ്റ് അടക്കമുള്ള ടിക്കറ്റുകൾ കൗണ്ടറില് നിന്നെടുക്കുന്നവര് സ്റ്റേഷനിലെത്തി തന്നെ ടിക്കറ്റ് റദ്ദാക്കേണ്ടതുണ്ടോയെന്ന ബിജെപി എംപി മേധാ വിശ്രം കുല്ക്കര്ണിയുടെ ചോദ്യത്തിനാണ് റെയിൽവേ മന്ത്രി ഇക്കാര്യം വ്യക്തമാക്കിയത്.
കൂടാതെ നിശ്ചിത സമയപരിധിക്കുള്ളില് ടിക്കറ്റ് കൗണ്ടറുകളില് എത്തിക്കുന്ന വെയ്റ്റിങ് ലിസ്റ്റിലുള്ള ടിക്കറ്റുകള് റദ്ദാക്കും. പണം കൗണ്ടര് വഴി തന്നെ റീഫണ്ടും ചെയ്യും.
എന്നാല് യാത്രക്കാരുടെ ബുദ്ധിമുട്ട് കണക്കിലെടുത്ത് കൗണ്ടര് വഴിയെടുക്കുന്ന ടിക്കറ്റുകള് ഓണ്ലൈന് വഴി റദ്ദാക്കുന്നതിനുള്ള സൗകര്യം ഒരുക്കിയിട്ടുണ്ടെന്നും മന്ത്രി പറഞ്ഞു. ഓണ്ലൈനില് റദ്ദാക്കിയ ശേഷം ഒറിജിനല് ടിക്കറ്റുമായി കൗണ്ടറിലെത്തിയാല് പണം തിരികെ ലഭിക്കും.
