മാലിന്യം നീക്കാൻ വന്ന് സ്വർണം ‘വാരി’; കോർപ്പറേഷൻ ജീവനക്കാരുടെ ഐഡി കാർഡ് ധരിച്ചെത്തിയ കവർച്ചാ സംഘം പിടിയിൽ!
തിരുവനന്തപുരം: ഫ്ളാറ്റിൽ അതിക്രമിച്ചു കയറി വയോധികയുടെ ഏഴര പവൻ സ്വർണാഭരണങ്ങൾ കവർന്ന കേസിൽ സ്ത്രീകൾ അടങ്ങിയ അഞ്ചംഗ സംഘത്തെ ഫോർട്ട് പൊലീസ് കസ്റ്റഡിയിലെടുത്തു.
മണക്കാട് മുക്കോലക്കൽ ക്ഷേത്രം സമീപമുള്ള ശ്രീശിവം അപാർട്ട്മെന്റിലെ അഞ്ചാം നമ്പർ ഫ്ളാറ്റിലാണ് കവർച്ച നടന്നത്. ഇന്നലെ രാവിലെ 11 മണിയോടെയായിരുന്നു സംഭവം.
ഇവിടെ വാടകയ്ക്ക് താമസിക്കുന്ന 64 വയസുള്ള സ്ത്രീയാണ് ആക്രമണത്തിനിരയായത്.
കഴുത്തിൽ തിരിച്ചറിയൽ കാർഡുകൾ തൂക്കി കോർപ്പറേഷൻ ജീവനക്കാരാണെന്ന് വിശ്വസിപ്പിച്ചാണ് ഒരു സ്ത്രീയും പുരുഷനും വീടിന്റെ വാതിലിൽ എത്തിയത്.
മാലിന്യനിർമാണവുമായി ബന്ധപ്പെട്ട കാര്യങ്ങൾ സംസാരിക്കാനാണെന്ന് പറഞ്ഞ് വയോധികയെ ആശയക്കുഴപ്പത്തിലാക്കിയതിനിടെയാണ് സംഘത്തിലെ മറ്റു അംഗങ്ങൾ വാതിൽ തള്ളിത്തുറന്ന് അകത്ത് കടന്നത്.
വയോധികയെ ആക്രമിച്ച് തള്ളിയിട്ട ശേഷം കഴുത്തിലും കൈകളിലുമുണ്ടായിരുന്ന ഏഴര പവൻ സ്വർണാഭരണങ്ങൾ സംഘം കവർന്നു. മകൻ ജോലിക്ക് പോയ സമയത്ത് വീട്ടിൽ വയോധിക ഒറ്റയ്ക്കാണെന്ന് ഉറപ്പാക്കിയ ശേഷമായിരുന്നു കവർച്ച.
സംഭവം നടന്നതിന് മണിക്കൂറുകൾക്കുള്ളിൽ തന്നെ പൊലീസ് പ്രതികളെ പിടികൂടുകയായിരുന്നു. നിലവിൽ അഞ്ചുപേർ കസ്റ്റഡിയിലുണ്ടെന്നും ഇവരെ വിശദമായി ചോദ്യം ചെയ്യുകയാണെന്നും പൊലീസ് അറിയിച്ചു.
കവർച്ചയ്ക്ക് ദിവസങ്ങൾക്ക് മുമ്പ് തന്നെ സംഘം ഫ്ളാറ്റും പരിസരവും നിരീക്ഷിച്ചിരുന്നുവെന്നും കഴിഞ്ഞ ചൊവ്വാഴ്ച ഇവർ വീണ്ടും സ്ഥലത്തെത്തി വയോധികയുടെ നീക്കങ്ങൾ നിരീക്ഷിച്ചിരുന്നുവെന്നും പൊലീസ് വ്യക്തമാക്കി.
English Summary
Five members, including women, were taken into custody by Fort Police after robbing a 64-year-old woman of 7.5 sovereigns of gold ornaments by forcibly entering her flat in Thiruvananthapuram. The gang posed as corporation staff, gained entry, assaulted the victim and fled with the jewellery. Police said the group had been conducting prior surveillance and were arrested within hours of the incident.
thiruvananthapuram-flat-robbery-elderly-woman-gold-police-custody
Thiruvananthapuram, flat robbery, elderly woman attacked, gold theft, Fort police, crime news, Kerala crime, apartment robbery
