മക്കളെ സ്കൂൾ ബസിൽ കയറ്റിവിട്ട ശേഷം കാമുകനോടൊപ്പം നാടുവിട്ട യുവതിയെയും കാമുകനേയും പൊലീസ് അറസ്റ്റ് ചെയ്തു. തിരുവനന്തപുരം വിളപ്പിൽശാല ഉറിയാക്കോട് അരശുംമൂട് സ്വദേശി ശ്രീജ (28)യും ഇവരുടെ കാമുകനായ യുവാവും ആണ് അറസ്റ്റിലായത്. ശ്രീജയുടെ ഭർത്താവിന്റെ ബന്ധുക്കൾ പൊലീസിൽ പരാതി നൽകിയതിനെ തുടർന്നുള്ള അന്വേഷണത്തിലാണ് ഇരുവരെയും കണ്ടെത്തിയത്.
സംഭവത്തെക്കുറിച്ചു പോലീസ് പറയുന്നത്:
ഫെബ്രുവരി 14ന് രാവിലെ ശ്രീജ കുട്ടികളെ സ്കൂളിലേക്ക് വിടാൻ അരശുംമൂട് ജങ്ഷനിൽ എത്തിയിരുന്നു. ഒമ്പത് മണിയോടെ മൂന്നും എട്ടും വയസുള്ള കുട്ടികളെ സ്കൂൾ ബസിൽ കയറ്റിവിട്ട ശേഷം ഇവർ കാമുകനായ കോട്ടൂർ ആതിരാ ഭവനിൽ വിഷ്ണു(34)വിനോടൊപ്പം കന്യാകുമാരിയിലേക്ക് പോയി. ശ്രീജ ജോലി ചെയ്യുന്ന പ്ലേ സ്കൂളിൽ പഠിക്കുന്ന മൂന്ന് വയസ് പ്രായമുള്ള കുഞ്ഞ് വൈകുന്നേരം ബസിൽ സ്ഥിരം ഇറങ്ങുന്ന സ്ഥലത്ത് എത്തിയപ്പോൾ കൂട്ടികൊണ്ട് പോകാൻ ആരും എത്താതിരുന്നതിന് തുടർന്ന് കുഞ്ഞിനെ ശ്രീജയുടെ വീട്ടിലാക്കാൻ ബസിലെ ജീവനക്കാരി ശ്രീജയുടെ വീട്ടിൽ എത്തിയതോടെയാണ് സംഭവം പുറത്തറിഞ്ഞത്. ശ്രീജയെ കാണാതായതോടെ ജീവനക്കറി അയൽവീട്ടിൽ വിവരം അറിയിച്ചു. തുടർന്ന് നടത്തിയ അന്വേഷണത്തിലാണ് ശ്രീജ കാമുകനൊപ്പം പോയതായി കണ്ടെത്തിയത്.
