തിരുവനന്തപുരം: ജാമ്യത്തിലിറിങ്ങിയ ഉടൻ തനിക്കെതിരെ സാക്ഷി പറഞ്ഞ അയൽവാസിയെ ഭീഷണിപ്പെടുത്തിയ പോക്സോ കേസ് പ്രതി വീണ്ടും പിടിയിൽ. അയൽവാസിയുടെ പരാതി പ്രകാരമാണ് പൂന്തുറ പള്ളിത്തെരുവ് സ്വദേശി മുഹമ്മദ് ആഷിക്കിനെ (19) പൊലീസ് വീണ്ടും അറസ്റ്റ് ചെയ്തത്.
പോക്സോ കേസ് പ്രതിയായ ആഷിക്ക് ജാമ്യത്തിലിറങ്ങിയതിന് പിന്നാലെ കേസിൽ സാക്ഷി പറഞ്ഞ അയൽവാസിയെ വീട്ടിൽക്കയറി കൊല്ലുമെന്ന് ഭീഷണിപ്പെടുത്തുകയായിരുന്നു. കഴിഞ്ഞ വർഷം ആഷിക്കിനെതിരെ പോക്സോ കേസ് രജിസ്റ്റർ ചെയ്തിരുന്നു. ഈ കേസുമായി ബന്ധപ്പെട്ട് ഇയാളുടെ അയൽവാസി പൂന്തുറ പൊലീസിൽ സാക്ഷി മൊഴി നൽകിയതാണ് പ്രകോപനത്തിന് കാരണമായത്.
അറസ്റ്റിലായ ആഷിക്ക് ജാമ്യം ലഭിച്ച് പുറത്തിറങ്ങിയതിന് പിന്നാലെയാണ് അയൽവാസിയുടെ വീട്ടിലെത്തി ഭീഷണിപ്പെടുത്തിയതെന്ന് പൊലീസ് പറഞ്ഞു. ഇതോടെ അയൽവാസി വീണ്ടും പരാതി നൽകുകയായിരുന്നു. പിന്നാലെ പൂന്തുറ പൊലീസ് ഇയാളെ പിടികൂടി. കോടതിയിൽ ഹാജരാക്കിയ പ്രതിയെ പിന്നീട് റിമാൻഡ് ചെയ്തു.
