പത്തനംതിട്ട: എരുമേലി മുക്കൂട്ടുതറയില് ശബരിമല തീര്ത്ഥാടകര് സഞ്ചരിച്ച വാഹനം നിയന്ത്രണം വിട്ട് തോട്ടിലേക്ക് മറിഞ്ഞ് മൂന്ന് തീര്ഥാടകര്ക്ക് പരിക്കേറ്റു. കർണാടക സ്വദേശികളായ ശ്രീകാന്ത്, മണികണ്ഠന്, തൃപ്പണ്ണന് എന്നിവര്ക്കാണ് പരിക്കേറ്റത്.
ഇന്ന് രാവിലെയാണ് അപകടം നടന്നത്. തീര്ഥാടനം കഴിഞ്ഞ് കർണാടകയിലേക്ക് മടങ്ങുന്നതിനിടെ, മുക്കൂട്ടുതറയില് വളവ് തിരിഞ്ഞ് വരുമ്പോഴാണ് നിയന്ത്രണം വിട്ട് വാഹനം തോട്ടിലേക്ക് മറിഞ്ഞത്.
സംഭവ സ്ഥലത്തിന് തൊട്ടടുത്ത് ഉണ്ടായിരുന്ന മോട്ടോര് വാഹന വകുപ്പ് സേഫ് സോണ് അധികൃതരാണ് വാഹനാപകടത്തില്പെട്ടവരെ രക്ഷിച്ചത്.
ബാംഗ്ലൂർ സ്വദേശിയായ ശ്രീകാന്തിനെ കോട്ടയം മെഡിക്കല് കോളേജ് ആശുപത്രിയിലും മറ്റ് രണ്ടുപേരെ എരുമേലിയിലെ സ്വകാര്യ ആശുപത്രിയിലും പ്രവേശിപ്പിച്ചു. ഇവരുടെ പരിക്ക് ഗുരുതരമല്ല. ഡ്രൈവര് ഉറങ്ങിപ്പോയതാണ് വാഹനത്തിന്റെ നിയന്ത്രണം വിട്ട് അപകടത്തിൽ പെടാൻ കാരണമെന്നാണ് മോട്ടോര് വാഹന വകുപ്പിന്റെ നിഗമനം.
