വിമാനം പറക്കുന്നതിനിടെ എയർപോർട്ടിൽ ലാൻഡ് ചെയ്യാൻ താൻ ‘സർട്ടിഫൈഡ്’ അല്ല എന്ന് വെളിപ്പെടുത്തി പൈലറ്റ്. ഇതോടെ ഒറിജിനൽ ഡെസ്റ്റിനേഷനിൽ നിന്നും വഴി തിരിച്ചുവിട്ട വിമാനം മറ്റൊരു എയർപോർട്ടിൽ ഇറങ്ങിയശേഷം വേറെ പൈലറ്റ് എത്തി വിമാനം എത്തേണ്ട സ്ഥലത്ത് എത്തിക്കുകയായിരുന്നു.(The pilot revealed in the sky that he was not certified to land the plane on the runway)
അലാസ്ക എയർലൈൻസ് വിമാനത്തിലാണ് യാത്രക്കാരെ ആശങ്കയിൽ എത്തിയ സംഭവം ഉണ്ടായത്. ജാക്സൺ ഹോൾ എയർപോർട്ടിൽ ആയിരുന്നു വിമാനം ഇറങ്ങേണ്ടിയിരുന്നത്. എന്നാൽ ലാൻഡിങ്ങിന് അല്പസമയം മുൻപാണ് തനിക്ക് ഈ എയർപോർട്ടിൽ ഇറങ്ങാൻ അനുമതി ഇല്ല എന്ന് പൈലറ്റ് വെളിപ്പെടുത്തിയത്. ഇതോടെ യാത്രക്കാർ ആശങ്കയിലായി.
തുടർന്ന് വിമാനം സാൾട്ട് ലേക്ക് എയർപോർട്ടിലേക്ക് തിരിച്ചുവിട്ടു. അവിടെ വിമാനം സുരക്ഷിതമായി ലാൻഡ് ചെയ്യുകയായിരുന്നു. ഇതിനുശേഷം ജാക്സൺ ഹോൾ എയർപോർട്ടിൽ ഇറങ്ങാൻ അനുമതി ഇല്ലാതിരുന്ന പൈലറ്റിനെ മാറ്റുകയും പകരം മറ്റൊരു പൈലറ്റ് എത്തി വിമാനം പറത്തുകയുമായിരുന്നു.
മൂന്ന് മണിക്കൂർ വൈകിയാണ് വിമാനം ജാക്സൺ ഹാൾ എയർപോർട്ടിൽ ലാൻഡ് ചെയ്തത്. ഇതുമൂലം തങ്ങൾ വളരെയധികം ബുദ്ധിമുട്ടിയതായി യാത്രക്കാർ പരാതിപ്പെട്ടു.
വിമാനം പറത്താൻ യോഗ്യതയുള്ള പൈലറ്റ് തന്നെയാണ് വിമാനം പറത്തിയതെന്നും എന്നാൽ പേപ്പർ വർക്കിൽ വന്ന അബദ്ധം മൂലമാണ് അനുമതി ഇല്ലാതായതെന്നും വിമാന കമ്പനി അധികൃതർ വിശദീകരിച്ചു.
