അധ്യാപകർക്ക് കെ-ടെറ്റ് നിർബന്ധമാക്കിയ ഉത്തരവ് താൽക്കാലികമായി മരവിപ്പിച്ചു
തിരുവനന്തപുരം ∙ സംസ്ഥാനത്തെ സ്കൂൾ അധ്യാപകർക്ക് കെ-ടെറ്റ് (KTET) നിർബന്ധമാക്കിയ സർക്കാർ ഉത്തരവ് താൽക്കാലികമായി മരവിപ്പിച്ചതായി വിദ്യാഭ്യാസ വകുപ്പ് മന്ത്രി വി. ശിവൻകുട്ടി അറിയിച്ചു.
അധ്യാപക സംഘടനകളിൽ നിന്ന് ശക്തമായ എതിർപ്പ് ഉയർന്ന സാഹചര്യത്തിലാണ് സർക്കാർ ഇത്തരമൊരു തീരുമാനം കൈക്കൊണ്ടത്.
വിഷയത്തിൽ ആശയക്കുഴപ്പങ്ങളും തെറ്റിദ്ധാരണകളും നിലനിൽക്കുന്നുണ്ടെന്നും, അത് പരിഹരിക്കാനാണ് ഉത്തരവ് താൽക്കാലികമായി സ്റ്റേ ചെയ്തതെന്നും മന്ത്രി വ്യക്തമാക്കി.
സുപ്രീം കോടതി ഉത്തരവിന്റെ അടിസ്ഥാനത്തിലാണ് സർക്കാർ ആദ്യം കെ-ടെറ്റ് നിർബന്ധമാക്കി ഉത്തരവിറക്കിയതെന്ന് മന്ത്രി വിശദീകരിച്ചു.
അധ്യാപകർക്ക് കെ-ടെറ്റ് നിർബന്ധമാക്കിയ ഉത്തരവ് താൽക്കാലികമായി മരവിപ്പിച്ചു
എന്നാൽ, ഇതുമൂലം അധ്യാപക സമൂഹത്തിൽ ആശങ്കയും പ്രതിഷേധവും വ്യാപകമായതോടെയാണ് സർക്കാർ നിലപാട് പുനപരിശോധിക്കുന്നത്.
സുപ്രീം കോടതി വിധിക്കെതിരെ സർക്കാർ റിവ്യൂ ഹർജി നൽകുമെന്നും, അതിന്റെ നിയമനടപടികൾ പുരോഗമിക്കുകയാണെന്നും മന്ത്രി അറിയിച്ചു.
ഫെബ്രുവരി മാസത്തിൽ നടത്താൻ നിശ്ചയിച്ചിരിക്കുന്ന പ്രത്യേക കെ-ടെറ്റ് പരീക്ഷയ്ക്ക് ശേഷം വിഷയത്തിൽ കൂടുതൽ വ്യക്തത വരുത്തുന്ന പുതിയ ഉത്തരവ് സർക്കാർ പുറത്തിറക്കുമെന്ന് മന്ത്രി പറഞ്ഞു.
അധ്യാപകരുടെ സേവനവും അവകാശങ്ങളും സംരക്ഷിക്കുന്ന നിലപാടാണ് സർക്കാർ സ്വീകരിക്കുന്നതെന്നും, അധ്യാപക സമൂഹം ആശങ്കപ്പെടേണ്ട സാഹചര്യമില്ലെന്നും അദ്ദേഹം കൂട്ടിച്ചേർത്തു.
ചില സംഘടനകൾ വിഷയത്തിന്റെ യഥാർത്ഥ പശ്ചാത്തലം മനസ്സിലാക്കുന്നതിന് മുമ്പേ തന്നെ എതിർപ്പ് ഉയർത്തിയതായും മന്ത്രി വിമർശിച്ചു.
സർക്കാർ അധ്യാപകർക്കെതിരല്ല, മറിച്ച് അധ്യാപകർക്കൊപ്പമാണെന്ന സന്ദേശം ശക്തമായി നൽകാനാണ് താൻ ശ്രമിക്കുന്നതെന്നും വി. ശിവൻകുട്ടി പറഞ്ഞു.
കെ-ടെറ്റ് വിഷയത്തിൽ വ്യക്തത വരുത്തുന്നതോടെ സ്ഥാനക്കയറ്റം ഉൾപ്പെടെയുള്ള കാര്യങ്ങളിലും സംശയങ്ങൾ മാറുമെന്നും അദ്ദേഹം വ്യക്തമാക്കി.
ഈ വിഷയത്തിൽ ഏകദേശം 40,000ത്തോളം അധ്യാപകരെ ബാധിക്കുന്ന സാഹചര്യമാണുള്ളതെന്നും, അതുകൊണ്ടുതന്നെ അതീവ ജാഗ്രതയോടെയും ഉത്തരവാദിത്തത്തോടെയും മാത്രമേ സർക്കാർ മുന്നോട്ടുപോകുകയുള്ളൂവെന്നും മന്ത്രി പറഞ്ഞു.
“കുറച്ചുപേർ രക്ഷപ്പെടുമെങ്കിൽ രക്ഷപ്പെടട്ടെ” എന്ന തരത്തിലുള്ള സമീപനം സർക്കാർ സ്വീകരിക്കില്ലെന്നും, എല്ലാവരുടെയും അവകാശങ്ങൾ സംരക്ഷിക്കുന്ന സമതുലിതമായ തീരുമാനമാണ് സർക്കാർ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
കെ-ടെറ്റ് നിർബന്ധമാക്കുന്ന കാര്യത്തിൽ അധ്യാപക സംഘടനകളുമായി തുടർച്ചയായ ചർച്ചകൾ നടത്തുമെന്നും, എല്ലാവരെയും വിശ്വാസത്തിലെടുത്തുകൊണ്ടായിരിക്കും അന്തിമ തീരുമാനം എടുക്കുകയെന്നും മന്ത്രി അറിയിച്ചു.
ഇതോടെ വിഷയത്തിൽ താൽക്കാലിക ആശ്വാസമാണ് അധ്യാപക സമൂഹത്തിന് ലഭിച്ചിരിക്കുന്നത്.
