ബഹിരാകാശയാത്രയിൽ വിപ്ലവം സൃഷ്ടിക്കാൻ ലക്ഷ്യമിട്ടുള്ള ഒരു നൂതന ആശയമാണ് ബഹിരാകാശ എലിവേറ്റർ. ഭൂമിയുടെ ഉപരിതലത്തിൽ നങ്കൂരമിട്ടിരിക്കുന്ന ഒരു കേബിൾ അല്ലെങ്കിൽ ടെതർ വഴി ബഹിരാകാശത്തേക്ക് ഏതാണ് കഴിയുന്ന ഒരു സാങ്കൽപ്പിക യാത്രാമാർഗ്ഗമാണിത്. എന്നാൽ ഇതിപ്പോൾ യാഥാർഥ്യമാകാൻ പോകുന്നു എന്ന റിപ്പോർട്ടുകളാണ് പുറത്തുവരുന്നത്. (The Japanese company is about to install a ‘space elevator’ for space travel)
ജാപ്പനീസ് സ്ഥാപനമായ ഒബായാഷി കോർപ്പറേഷൻ ആണ് സ്പേസ് എലിവേറ്റർ സ്ഥാപിക്കാനായി ശ്രമം നടത്തുന്നത്. 2012-ൽ ആണ് കമ്പനി ബഹിരാകാശ എലിവേറ്ററിനായുള്ള പദ്ധതി ആദ്യമായി പ്രഖ്യാപിച്ചത്. പരമ്പരാഗത റോക്കറ്റ് പ്രൊപ്പൽഷൻ ഇല്ലാതെ നേരിട്ട് ഭ്രമണപഥത്തിലേക്ക് വസ്തുക്കളെയും ബഹിരാകാശവാഹനങ്ങളെയും കൊണ്ടുപോകാനായി, കേബിൾ ഉപയോഗിച്ച് യാത്ര സാധ്യമാക്കാനുള്ള സാധ്യതകളാണ് കമ്പനി തിരയുന്നത്. 1895-ൽ റഷ്യൻ ശാസ്ത്രജ്ഞനായ കോൺസ്റ്റാൻ്റിൻ സിയോൾക്കോവ്സ്കി ആദ്യമായി നിർദ്ദേശിച്ച ആശയമാണിത്.
ബിസിനസ്സ് ഇൻസൈഡറിന് നൽകിയ അഭിമുഖത്തിൽ, ഒരു ഫങ്ഷണൽ സ്പേസ് എലിവേറ്റർ സൃഷ്ടിക്കാൻ തങ്ങൾക്ക് കഴിയുമെന്ന പ്രതീക്ഷയാണ് ടെക്‌നോളജി ക്രിയേഷൻ ഡിപ്പാർട്ട്‌മെൻ്റിൻ്റെ ഭാഗമായ യോജി ഇഷികാവ പങ്കുവയ്ക്കുന്നത്. കമ്പനി നിലവിൽ ഗവേഷണ വികസനം, ആദ്യ രൂപകൽപ്പന, നിർമ്മാണം, പ്രമോഷൻ എന്നിവയിൽ വ്യാപൃതരാണ്.
സാധ്യമായാൽ, ചൊവ്വയിലെത്താൻ ആറ് മുതൽ എട്ട് മാസം വരെ എടുക്കുന്നതിനുപകരം, ഒരു ബഹിരാകാശ എലിവേറ്ററിന് മൂന്നോ നാലോ മാസത്തിനുള്ളിൽ അല്ലെങ്കിൽ 40 ദിവസത്തിനുള്ളിൽ നമ്മെ അവിടെ എത്തിക്കാൻ കഴിയുമെന്ന് ശാസ്ത്രജ്ഞർ കണക്കുകൂട്ടുന്നു.
2025-ൽ 100 ബില്യൺ ഡോളറിൻ്റെ പദ്ധതിയുടെ നിർമ്മാണം ആരംഭിക്കുമെന്നും 2050-ഓടെ പ്രവർത്തനങ്ങൾ ആരംഭിക്കുമെന്നും കമ്പനി അറിയിച്ചു. പേലോഡുകൾ ബഹിരാകാശത്തേക്ക് അയക്കുന്നതിനുള്ള ചെലവും പാരിസ്ഥിതിക ആഘാതവും ഗണ്യമായി കുറയ്ക്കാനുള്ള അതിൻ്റെ കഴിവാണ് ബഹിരാകാശ എലിവേറ്ററിൻ്റെ പ്രാഥമിക നേട്ടം.
വലിയ അളവിലുള്ള ഇന്ധനം ആവശ്യമായതും ഗണ്യമായ ഉദ്വമനം ഉൽപ്പാദിപ്പിക്കുന്നതുമായ റോക്കറ്റുകളിൽ നിന്ന് വ്യത്യസ്തമായി, ഒരു ബഹിരാകാശ എലിവേറ്ററിന് ഇലക്ട്രിക് മോട്ടോറുകൾ ഉപയോഗിച്ച് ചരക്കുകളും യാത്രക്കാരും ടെതറിലൂടെ നീക്കാൻ കഴിയും, ഇത് കൂടുതൽ സുസ്ഥിരവും സാമ്പത്തികവുമായ നേട്ടം നൽകും.
എന്നാൽ, ഇത് സാധ്യമല്ല എന്നന്വ ഒരു വിഭാഗം പറയുന്നത്. ഇതിനായുള്ള എഞ്ചിനീയറിംഗ് വെല്ലുവിളികളാണ് പ്രധാന പ്രശ്നം. ടെതറിനുള്ള മെറ്റീരിയലിന് അസാധാരണമായ ശക്തി-ഭാരം അനുപാതം ഉണ്ടായിരിക്കണം. നിലവിലുള്ള ഏതെങ്കിലും മെറ്റീരിയലിനെക്കാൾ വളരെ ശക്തിയേറിയ മെറ്റീരിയൽ വേണം ഇതിനായി ഉപയോഗിക്കാൻ.
കൂടാതെ ഇതിന്റെ സ്ഥിരത, കാലാവസ്ഥാ ആഘാതം, ബഹിരാകാശ അവശിഷ്ടങ്ങൾ നീക്കം ചെയ്യൽ തുടങ്ങി നിരവധി പ്രശ്നങ്ങളാണ് ചൂണ്ടിക്കാട്ടപ്പെടുന്നത്.ഈ വെല്ലുവിളികൾക്കിടയിലും, ബഹിരാകാശ എലിവേറ്റർ എന്ന ആശയം ശാസ്ത്രജ്ഞരെയും എഞ്ചിനീയർമാരെയും ഒരുപോലെ ത്രസിപ്പിക്കുന്നതാണ്.
Read also: പാഞ്ഞു വരുന്ന ട്രെയിനിനു മുന്നിൽനിന്ന് സെൽഫിയെടുക്കാൻ ശ്രമം; യുവതിക്ക് ദാരുണാന്ത്യം: SHOCKING VIDEO
