ഇന്ത്യൻ റെയിൽവേയുടെ ‘ക്രൗഡ് പുള്ളേഴ്സ്’ കേരളത്തിൽ! ആദ്യ നാല് സ്ഥാനങ്ങളും കേരളത്തിന്!
തിരുവനന്തപുരം: പ്ലാറ്റിനം ജൂബിലി ആഘോഷിക്കുന്ന ദക്ഷിണ റെയിൽവേയ്ക്ക് അഭിമാന നേട്ടം. രാജ്യത്തെ ഏറ്റവും കൂടുതൽ ഒക്യുപെൻസിയുള്ള എക്സ്പ്രസ് ട്രെയിനുകളിൽ ആദ്യ പത്തിൽ ഒൻപത് ട്രെയിനുകളും ദക്ഷിണ റെയിൽവേ ഓടിക്കുന്നതോ അതിന്റെ പരിധിയിൽ സർവീസ് നടത്തുന്നവയോ ആണ്.
ഈ പട്ടികയിലെ ആദ്യ നാല് സ്ഥാനങ്ങളും കേരളത്തിലൂടെ ഓടുന്ന ട്രെയിനുകൾക്കാണ്. ഏറ്റവും കൂടുതൽ ഒക്യുപെൻസിയുള്ള ട്രെയിനായി പരശുറാം എക്സ്പ്രസ് (കന്യാകുമാരി–മംഗളൂരു) ഒന്നാം സ്ഥാനത്തെത്തി. 267.67 ശതമാനമാണ് ഒക്യുപെൻസി. റിസർവ്ഡ് സീറ്റിൽ ഒരേസമയം പല യാത്രക്കാരും മാറിമാറി യാത്ര ചെയ്യുന്ന നിലയിലാണിത്.
തിരുവനന്തപുരം–ഇൻഡോർ എക്സ്പ്രസ് (266.24%), മംഗളൂരു–കന്യാകുമാരി പരശുറാം (261.23%), തിരുവനന്തപുരം–ന്യൂഡൽഹി കേരള എക്സ്പ്രസ് (259.88%) എന്നിവയാണ് രണ്ടാമത് മുതൽ നാലാം സ്ഥാനങ്ങളിൽ.
വിവേക് എക്സ്പ്രസ്, ഹിമസാഗർ എക്സ്പ്രസ്, ജാംനഗർ–തിരുനെൽവേലി, എറണാകുളം–ഒഖ, ഗാന്ധിധാം–നാഗർകോവിൽ എക്സ്പ്രസ് എന്നിവയും പട്ടികയിൽ ഇടംപിടിച്ചു.
വന്ദേഭാരത് ട്രെയിനുകളിലും നേട്ടം
രാജ്യത്തെ വന്ദേ ഭാരത് എക്സ്പ്രസ് ട്രെയിനുകളിൽ ഏറ്റവും കൂടുതൽ ഒക്യുപെൻസിയുള്ള ആദ്യ 10 സർവീസുകളിൽ നാലെണ്ണം കേരളത്തിൽനിന്നുള്ളവയാണ്. തിരുവനന്തപുരം–മംഗളൂരു വന്ദേഭാരത് (187.78%) ഒന്നാം സ്ഥാനത്ത്.
ഇതിനു പിന്നാലെ വാരണാസി–മീററ്റ്, മംഗളൂരു–തിരുവനന്തപുരം, കാസർകോട്–തിരുവനന്തപുരം എന്നിവയാണ് പ്രധാന സ്ഥാനങ്ങളിൽ.
വരുമാനവും പ്രകടനവും ഉയർന്നു
2025–26 സാമ്പത്തിക വർഷത്തിൽ വന്ദേഭാരത് ട്രെയിനുകളിൽ നിന്നുള്ള വരുമാനം 15.22 കോടിയിൽ നിന്ന് 45.37 കോടി രൂപയായി ഉയർന്നു. കറന്റ് റിസർവേഷൻ സംവിധാനം മെച്ചപ്പെടുത്തിയതാണ് ഇതിന് പ്രധാന കാരണം.
- കറന്റ് റിസർവേഷൻ യാത്രക്കാർ: 2.14 ലക്ഷം ➝ 6.01 ലക്ഷം
- അധിക വരുമാനം: 735.78 കോടി രൂപ
- റിസർവ്ഡ് ട്രെയിൻ ഒക്യുപെൻസി: 96% (ദേശീയ ശരാശരി 87%)
- തത്കാൽ ക്വോട്ട ഉപയോഗം: 92% (ദേശീയ ശരാശരി 71%)
സ്പെഷൽ ട്രെയിനുകളിലും ദക്ഷിണ റെയിൽവേയാണ് മുന്നിൽ. ഒരു ട്രിപ്പിൽ ശരാശരി 1312 യാത്രക്കാരാണ് യാത്ര ചെയ്തത് (ദേശീയ ശരാശരി 894).
English Summary
Southern Railway, celebrating its Platinum Jubilee, dominates India’s busiest train routes. Nine out of the top ten most occupied express trains operate under it, with Kerala routes leading. Vande Bharat services from Kerala also rank among the most crowded, while revenue and passenger numbers have significantly increase
Southern Railway, Kerala Trains, Vande Bharat, Indian Railways, Train Occupancy, Railway News, Transport India
