25000 രൂപ നിക്ഷേപിച്ചാൽ മാസം അഞ്ച് ലക്ഷം; തട്ടിപ്പിൽ ജയസൂര്യക്ക് പങ്കുണ്ടോ? ഇഡി ചോദ്യം ചെയ്യുന്നു

25000 രൂപ നിക്ഷേപിച്ചാൽ മാസം അഞ്ച് ലക്ഷം; തട്ടിപ്പിൽ ജയസൂര്യക്ക് പങ്കുണ്ടോ? ഇഡി ചോദ്യം ചെയ്യുന്നു

കൊച്ചി: ‘സേവ് ബോക്സ് ബിഡ്ഡിങ് ആപ്പ്’ നിക്ഷേപ തട്ടിപ്പുമായി ബന്ധപ്പെട്ട് നടൻ ജയസൂര്യയെ എൻഫോഴ്സ്മെന്റ് ഡയറക്ടറേറ്റ് (ഇ.ഡി) ചോദ്യം ചെയ്യുന്നു.

സേവ് ബോക്സ് ആപ്പിന്റെ ബ്രാൻഡ് അംബാസഡറായി ജയസൂര്യ പ്രവർത്തിച്ചിരുന്നോയെന്നും, ഇതുമായി ബന്ധപ്പെട്ട സാമ്പത്തിക ഇടപാടുകൾ ഉണ്ടായിട്ടുണ്ടോയെന്നുമാണ് ഇ.ഡി പരിശോധിക്കുന്നത്.

നിക്ഷേപത്തിന്റെ പേരിൽ കോടികൾ തട്ടിയെന്ന കേസിൽ സേവ് ബോക്സ് ആപ്പിന്റെ ഉടമയും തൃശൂർ സ്വദേശിയുമായ സ്വാതിക് റഹീമിനെ 2023ൽ തൃശൂർ ഈസ്റ്റ് പൊലീസ് അറസ്റ്റ് ചെയ്തിരുന്നു. സിനിമ മേഖലയുമായി അടുത്ത ബന്ധമുള്ള വ്യക്തിയായിരുന്നു സ്വാതിക് റഹീം.

2019ൽ ആരംഭിച്ച ഓൺലൈൻ ലേല ആപ്പായ സേവ് ബോക്സ്, ഇന്ത്യയിലെ ആദ്യ സംരംഭമാണെന്ന തരത്തിൽ വലിയ പ്രചാരണം നേടിയിരുന്നു. ചലച്ചിത്ര മേഖലയിലെ നിരവധി പ്രമുഖർ ഉദ്ഘാടന ചടങ്ങിൽ പങ്കെടുത്തതും ശ്രദ്ധേയമായിരുന്നു.

ഇലക്ട്രോണിക് ഉപകരണങ്ങൾ ലേലത്തിലൂടെ സ്വന്തമാക്കൽ, ആമസോൺ മാതൃകയിൽ പ്രവർത്തിക്കുന്ന ‘സേവ് ബോക്സ് എക്‌സ്പ്രസ്’ ഡെലിവറി ഫ്രാഞ്ചൈസി, സ്റ്റാർട്ട്‌അപ്പ് നിക്ഷേപ പദ്ധതികൾ, ഇന്ത്യയിലെ ആദ്യ ക്രിപ്റ്റോ ഏജൻസി ആരംഭിക്കൽ തുടങ്ങിയ പദ്ധതികൾ വാഗ്ദാനം ചെയ്ത് കോടിക്കണക്കിന് രൂപയാണ് നിക്ഷേപകരിൽ നിന്ന് സ്വാതിക് പിരിച്ചതെന്നാണ് ആരോപണം.

25,000 രൂപ നിക്ഷേപിച്ചാൽ മാസം അഞ്ച് ലക്ഷം രൂപ വരെ വരുമാനം ലഭിക്കുമെന്ന വാഗ്ദാനവും ഇയാൾ നടത്തിയിരുന്നു.

എന്നാൽ ലാഭം ലഭിക്കാതായതോടെ പരാതികൾ ഉയരുകയും തുടർന്ന് 2023ൽ അറസ്റ്റ് നടക്കുകയും ചെയ്തു. ഈ കേസാണ് നിലവിൽ എൻഫോഴ്സ്മെന്റ് ഡയറക്ടറേറ്റ് അന്വേഷിക്കുന്നത്.

ചലച്ചിത്ര മേഖലയുമായുള്ള ബന്ധം ഉപയോഗിച്ചാണ് തട്ടിപ്പ് നടത്തിയതെന്നാണ് അന്വേഷണ സംഘത്തിന്റെ കണ്ടെത്തൽ. സിനിമ പ്രവർത്തകരോടൊപ്പമുള്ള ചിത്രങ്ങൾ പ്രചാരണത്തിനായി ഉപയോഗിച്ചിരുന്നു.

രണ്ട് സിനിമകളിൽ അഭിനയിക്കുകയും ഒരു ചിത്രത്തിന്റെ നിർമാണത്തിൽ പങ്കാളിയാവുകയും ചെയ്ത സ്വാതിക്കുമായി നിരവധി സിനിമ പ്രവർത്തകർക്ക് ബന്ധമുണ്ടായിരുന്നെങ്കിലും,

ജയസൂര്യ ബ്രാൻഡ് അംബാസഡറിനോട് സമാനമായ നിലയിൽ പ്രവർത്തിച്ചിരുന്നോയെന്ന കാര്യമാണ് ഇ.ഡി വിശദമായി പരിശോധിക്കുന്നത്.

ഇതിന്റെ ഭാഗമായാണ് ഈ മാസം 24നും എൻഫോഴ്സ്മെന്റ് ഡയറക്ടറേറ്റ് ജയസൂര്യയെ ചോദ്യം ചെയ്തത്. സ്വാതിക്കുമായി ബന്ധപ്പെട്ട സാമ്പത്തിക ഇടപാടുകളും അന്വേഷണ പരിധിയിലുണ്ട്.

English Summary

The Enforcement Directorate has questioned actor Jayasurya in connection with the ‘Save Box’ bidding app investment fraud case. The probe focuses on whether Jayasurya acted as the brand ambassador for the app and if he had any financial dealings with its founder Swathik Rahim, who was arrested in 2023 for allegedly cheating investors of crores by promising high returns.

save-box-investment-fraud-ed-questions-actor-jayasurya

Save Box scam, Jayasurya, Enforcement Directorate, investment fraud, Swathik Rahim, Kerala scam, bidding app fraud, Malayalam cinema