ഡി- മണി എന്ന ഡയമണ്ട് മണി, ലക്ഷ്യമിട്ടത് ‘ആയിരം കോടിയുടെ’ ഇടപാട്; ശബരിമലയിൽ മാത്രമല്ല പത്മനാഭ സ്വാമി ക്ഷേത്രത്തിലും കണ്ണുവെച്ചു

ഡി- മണി എന്ന ഡയമണ്ട് മണി, ലക്ഷ്യമിട്ടത് ‘ആയിരം കോടിയുടെ’ ഇടപാട്; ശബരിമലയിൽ മാത്രമല്ല പത്മനാഭ സ്വാമി ക്ഷേത്രത്തിലും കണ്ണുവെച്ചു

പത്തനംതിട്ട: ശബരിമല സ്വർണക്കൊള്ള കേസിൽ നിർണായക പുരോഗതിയായി, ഡി മണിയെ പ്രത്യേക അന്വേഷണ സംഘം (എസ്ഐടി) വിശദമായി ചോദ്യം ചെയ്യുന്നു.

ഡി മണിയുടെ യഥാർത്ഥ പേര് ബാലമുരുകൻ ആണെന്ന് എസ്ഐടി സ്ഥിരീകരിച്ചതായി റിപ്പോർട്ടുകൾ വ്യക്തമാക്കുന്നു.

ചോദ്യം ചെയ്യൽ ഇന്നും തുടരുമെന്നാണ് വിവരം. പഞ്ചലോഹ വിഗ്രഹങ്ങൾ വാങ്ങിയെന്ന വിദേശ വ്യവസായിയുടെ മൊഴിയുടെ അടിസ്ഥാനത്തിലാണ് ഡി മണിയെ ചോദ്യം ചെയ്യുന്നത്.

ദിണ്ടിഗൽ സ്വദേശിയായ ബാലമുരുകൻ ‘ഡയമണ്ട് മണി’ എന്ന പേരിലാണ് അറിയപ്പെടുന്നത്.

ആദ്യകാലത്ത് വജ്രവ്യാപാരിയായിരുന്ന ഇയാളുടെ തൊഴിൽ പശ്ചാത്തലത്തിലാണ് ഈ പേര് ലഭിച്ചതെന്ന് എസ്ഐടി കണ്ടെത്തിയിട്ടുണ്ട്.

ഇന്നലെ പ്രാഥമിക ചോദ്യം ചെയ്യലിന് വിധേയനായ ഡി മണിയെ ഇന്ന് വിശദമായി ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം.

ഡി മണിക്ക് കേരളത്തിൽ ബന്ധങ്ങളുണ്ടോയെന്നും, ശബരിമലയുമായി ബന്ധപ്പെട്ട പഞ്ചലോഹ വിഗ്രഹങ്ങൾ കടത്തുന്ന ഇടപാടുകളിൽ ഇയാളും സംഘവും പങ്കെടുത്തിട്ടുണ്ടോയെന്നുമാണ് എസ്ഐടി പരിശോധിക്കുന്നത്.

കോൺഗ്രസ് നേതാവ് രമേശ് ചെന്നിത്തല നൽകിയ വിവരങ്ങളുടെ അടിസ്ഥാനത്തിൽ എസ്ഐടി മൊഴിയെടുത്ത വിദേശ വ്യവസായിയുടെ വെളിപ്പെടുത്തലുകൾ ഗുരുതരമാണ്.

ഡി മണിയും കേരളത്തിലെ ഒരു ഉന്നത വ്യക്തിയും ചേർന്ന് ശബരിമലയിൽ നിന്നുള്ള പഞ്ചലോഹ വിഗ്രഹങ്ങൾ കടത്തിയെന്നും, ഇതിന് പകരമായി ഏകദേശം 500 കോടി രൂപ രാഷ്ട്രീയബന്ധമുള്ള ആ ഉന്നതന് കൈമാറിയെന്നുമാണ് മൊഴിയിൽ പറയുന്നത്.

സ്വർണക്കൊള്ള കേസിലെ പ്രതിയായ ഉണ്ണികൃഷ്ണൻ പോറ്റിയാണ് ഇടനിലക്കാരനായതെന്നും മൊഴിയിൽ വ്യക്തമാക്കുന്നു.

ശബരിമല മാത്രമല്ല, കേരളത്തിലെ മറ്റ് ക്ഷേത്രങ്ങളെയും ലക്ഷ്യമിട്ട വലിയ ഇടപാടുകളാണ് സംഘം പദ്ധതിയിട്ടതെന്ന വെളിപ്പെടുത്തലും മൊഴിയിലുണ്ട്.

ആകെ ആയിരം കോടി രൂപയുടെ ഇടപാടാണ് ലക്ഷ്യമിട്ടിരുന്നത്. ശബരിമലയിലെ പഞ്ചലോഹ വിഗ്രഹങ്ങൾ കടത്തുന്നതിനായി 500 കോടി രൂപ കൈമാറിയതായും,

ശേഷിക്കുന്ന 500 കോടി രൂപ തിരുവനന്തപുരത്തെ പത്മനാഭസ്വാമി ക്ഷേത്രത്തിലെ അമൂല്യ വസ്തുക്കൾ കടത്താനായി നീക്കിവെച്ചിരുന്നുവെങ്കിലും അത് നടപ്പായില്ലെന്നും വിദേശ വ്യവസായി മൊഴി നൽകിയിട്ടുണ്ട്.

ഈ ആരോപണങ്ങളുടെ സത്യാവസ്ഥ കണ്ടെത്തുന്നതിനായാണ് എസ്ഐടി ഡി മണിയെ വിശദമായി ചോദ്യം ചെയ്യുന്നത്.

English Summary

The Special Investigation Team (SIT) has questioned D. Mani in connection with the Sabarimala gold robbery case and confirmed that his real name is Balamurugan. Based on the statement of a foreign businessman, the SIT is probing allegations that Mani was involved in smuggling Panchaloha idols from Sabarimala, allegedly in exchange for ₹500 crore. The investigation also looks into claims of a larger ₹1,000 crore smuggling plan involving temple valuables in Kerala.

sabarimala-gold-smuggling-d-mani-sit-interrogation

Sabarimala, Gold Smuggling, D Mani, SIT Probe, Panchaloha Idols, Kerala News, Temple Theft, Investigation