പാചകവാതക വിതരണത്തിൽ നിയന്ത്രണം; ഹോട്ടൽ മേഖലയ്ക്ക് കടുത്ത പ്രതിസന്ധി

പാചകവാതക വിതരണത്തിൽ നിയന്ത്രണം; ഹോട്ടൽ മേഖലയ്ക്ക് കടുത്ത പ്രതിസന്ധി

ന്യൂഡൽഹി: പ്രകൃതിവാതക വിതരണത്തിന് നിയന്ത്രണം ഏർപ്പെടുത്തി പുതിയ ഉത്തരവ് പുറത്തിറക്കി കേന്ദ്ര സർക്കാർ.

2026-ലെ പ്രകൃതിവാതക (വിതരണ നിയന്ത്രണം) ഉത്തരവ് മാർച്ച് 9-ന് പുറത്തിറക്കി. ഔദ്യോഗിക ഗസറ്റിൽ  പ്രസിദ്ധീകരിച്ചതോടെ ഉടൻ ഉത്തരവ് പ്രാബല്യത്തിൽ വന്നതായി സർക്കാർ അറിയിച്ചു.

ഉപഭോക്താക്കളെ മുൻഗണനാ വിഭാഗങ്ങളാക്കി

പുതിയ ഉത്തരവ് പ്രകാരം ഗ്യാസ് ഉപഭോക്താക്കളെ വിവിധ മുൻഗണനാ വിഭാഗങ്ങളായി തിരിച്ചു. ഓരോ മേഖലയിലേക്കുള്ള വിതരണം മുൻകാല ഉപഭോഗത്തെ അടിസ്ഥാനമാക്കി നിശ്ചയിക്കും.

ദൈനംദിന ജീവിതത്തിനും ഊർജ്ജ വിതരണത്തിനും നിർണായകമായ മേഖലകൾക്ക് ഏറ്റവും ഉയർന്ന മുൻഗണന നൽകും.

ഉയർന്ന മുൻഗണന ലഭിക്കുന്ന മേഖലകൾ:

• ഗാർഹിക പൈപ്പ് നാച്ചുറൽ ഗ്യാസ് (PNG)
• ഗതാഗതത്തിനുള്ള കംപ്രസ്ഡ് നാച്ചുറൽ ഗ്യാസ് (CNG)
• LPG ഉത്പാദനം
• പൈപ്പ്ലൈൻ പ്രവർത്തനങ്ങൾക്ക് ആവശ്യമായ ഇന്ധനം

ഹോട്ടലുകൾക്ക് LPG വിതരണ നിയന്ത്രണം

ഈ ഉത്തരവിന്റെ ഭാഗമായി ഹോട്ടലുകൾക്കും റെസ്റ്ററന്റുകൾക്കും പാചകവാതക ലഭ്യതയ്ക്ക് നിയന്ത്രണം വരാനിടയുണ്ട്.

ഗ്യാസ് വിതരണം ഗാർഹിക ഉപഭോക്താക്കൾക്ക് മുൻഗണന നൽകുന്ന രീതിയിലായിരിക്കും.

വിതരണം ഉറപ്പാക്കാൻ സമിതി

വിതരണം സുഗമമാക്കാൻ ഇന്ത്യൻ ഓയിൽ, ഭാരത് പെട്രോളിയം, ഹിന്ദുസ്ഥാൻ പെട്രോളിയം എന്നീ പൊതുമേഖലാ എണ്ണക്കമ്പനികളുടെ എക്സിക്യൂട്ടീവ് ഡയറക്ടർമാർ ഉൾപ്പെട്ട പ്രത്യേക സമിതി കേന്ദ്ര സർക്കാർ നിയോഗിച്ചു.

മൂന്ന് വർഷത്തിന് ശേഷം വീട് തുറന്നപ്പോൾ ഞെട്ടി; അകത്ത് മുഴുവൻ പ്രാവുകൾ, വീഡിയോ വൈറൽ

ആശുപത്രികൾക്കും വിദ്യാഭ്യാസ സ്ഥാപനങ്ങൾക്കും ഇളവ്

ആശുപത്രികൾക്കും വിദ്യാഭ്യാസ സ്ഥാപനങ്ങൾക്കും LPG വിതരണം തടസ്സപ്പെടരുതെന്ന് കേന്ദ്ര മന്ത്രി ഹർദിപ് സിങ് പുരി നിർദേശം നൽകി.

ഹോട്ടലുകൾ, റെസ്റ്ററന്റുകൾ തുടങ്ങിയ മേഖലകളിൽ നിന്നുള്ള പരാതികൾ സമിതി പരിശോധിക്കും.

സിലിണ്ടർ ബുക്കിംഗിൽ ഇടവേള

ഗാർഹിക LPG സിലിണ്ടർ ബുക്കിംഗിന് 25 ദിവസത്തെ ഇടവേള നിർബന്ധമാക്കിയതായും സർക്കാർ അറിയിച്ചു.

കേരളത്തിൽ ഹോട്ടലുകൾക്ക് പ്രതിസന്ധി

തെക്കൻ കേരളത്തിലെ പല പ്രദേശങ്ങളിലും വാണിജ്യ സിലിണ്ടറുകളുടെ ക്ഷാമം ഹോട്ടൽ മേഖലയെ ബാധിച്ചതായി ഹോട്ടൽ ഉടമകളുടെ സംഘടന വ്യക്തമാക്കി.

ചില എണ്ണക്കമ്പനികൾ വാണിജ്യ സിലിണ്ടർ വിതരണം നിയന്ത്രിക്കാൻ ഏജൻസികൾക്ക് ഇമെയിൽ അയച്ചതായും റിപ്പോർട്ടുകളുണ്ട്.

English Summary:

The central government has issued a Natural Gas (Allocation Control) Order 2026, prioritizing gas supply to essential sectors like household PNG, CNG for transport, LPG production, and pipeline operations. The move could restrict LPG supply to hotels and restaurants as domestic consumers are given priority. A committee comprising executives from IOC, BPCL, and HPCL will oversee distribution. Hospitals and educational institutions will continue to receive uninterrupted LPG supply.