രാഹുല്‍ മാങ്കൂട്ടത്തിന്റെ രണ്ടാമത്തെ കേസില്‍ പരാതിയില്‍ സംശയം; വൈരുദ്ധ്യങ്ങള്‍ കോടതി ചൂണ്ടിക്കാട്ടുന്നു

തിരുവനന്തപുരം: യുവതിയുടെ രണ്ടാമത്തെ ലൈംഗിക പീഡന പരാതിയുമായി ബന്ധപ്പെട്ട് രാഹുല്‍ മാങ്കൂട്ടത്തെതിരെ ഉയര്‍ന്ന കേസില്‍ പ്രഥമദൃഷ്ട്യാ സംശയങ്ങള്‍ നിലനില്‍ക്കുന്നുവെന്ന് തിരുവനന്തപുരം പ്രിന്‍സിപ്പല്‍ സെഷന്‍സ് കോടതി വ്യക്തമാക്കി.

മുന്‍കൂര്‍ ജാമ്യം അനുവദിച്ച ഉത്തരവിന്റെ കൂടുതല്‍ വിശദാംശങ്ങളാണ് ഇപ്പോള്‍ പുറത്തുവരുന്നത്.

കോടതി നിരീക്ഷിച്ചതനുസരിച്ച്, പരാതിക്കാരി നല്‍കിയ മൊഴിയിലും എഴുത്തില്‍ നല്‍കിയ പരാതിയിലും ഗൗരവമായ വൈരുദ്ധ്യങ്ങളുണ്ട്.

പൊലീസ് സ്റ്റേഷനിൽ പരാതി നൽകാതെ കെപിസിസിയെ സമീപിച്ചത് എന്തുകൊണ്ട്?

എന്തുകൊണ്ട് പൊലീസ് സ്റ്റേഷനില്‍ നേരിട്ട് പരാതി നല്‍കാതെ കെപിസിസി പ്രസിഡന്റിനാണ് ആദ്യം പരാതി നല്‍കിയതെന്നും പരാതിനല്‍കാന്‍ ഏറെ വൈകിയതിന്റെ യുക്തി എന്താണെന്നും കോടതി ചോദിച്ചു.

പരാതിയില്‍ താമസത്തിന് യുവതി ചൂണ്ടിക്കാട്ടുന്ന കാരണങ്ങള്‍ തമ്മിലും വലിയ പൊരുത്തക്കേടുകളുണ്ടെന്ന് കോടതി വ്യക്തമാക്കി.

രാഹുലിനെയും അദ്ദേഹത്തിന്റെ സുഹൃത്തുക്കളെയും പേടിച്ചതിനാലാണ് പരാതി നല്കാന്‍ വൈകിയതെന്ന് യുവതി പറയുമ്പോള്‍, മറ്റൊരു ഭാഗത്ത് രാഹുല്‍ ഭാവിയില്‍ വിവാഹം ചെയ്യും എന്ന പ്രതീക്ഷയിലാണ് കാത്തിരുന്നത് എന്നും പറയുന്നു.

കുടുംബത്തെ ബാധിക്കുമെന്ന ആശങ്കയും വൈകിയതിന്റെ ഒരു കാരണമായി യുവതി ചൂണ്ടിക്കാട്ടിയിട്ടുണ്ട്.

വോട്ട് ചിത്രീകരിച്ച യൂത്ത് കോൺഗ്രസ് നേതാവിനെതിരെ കേസ്

ആദ്യ പരാതി പൊലീസിന് അല്ല; കെപിസിസി പ്രസിഡന്റിന് — കോടതി ചൂണ്ടിക്കാണിക്കുന്നു

ആദ്യ പരാതി പൊലീസിനല്ല, കെപിസിസി പ്രസിഡന്റിനാണ് നല്‍കിയതെന്ന വസ്തുതയും കോടതി പ്രത്യേകം പരാമര്‍ശിച്ചു.

ഇതെല്ലാം പരിഗണിച്ചപ്പോള്‍ ആരോപണത്തിന്റെ സംശയം തോന്നുന്നുവെന്നതാണ് ഉത്തരവില്‍ രേഖപ്പെടുത്തിയിരിക്കുന്നത്.

അതേസമയം, രാഹുലിനെതിരെ ഉയര്‍ന്ന കുറ്റാരോപണങ്ങള്‍ ഗൗരവമുള്ളതാണെന്ന് കോടതി പറഞ്ഞു.

ഉപാധികളോടെ മുൻകൂർ ജാമ്യം; സർക്കാർ ഹൈക്കോടതിയിൽ അപ്പീൽ നൽകും

രണ്ടാമത്തെ കേസില്‍ ഉപാധികളോടെ മുന്‍കൂര്‍ ജാമ്യം അനുവദിക്കപ്പെട്ടിരുന്നു. ഈ ജാമ്യത്തിന് എതിരെ ഹൈക്കോടതിയില്‍ അപ്പീല്‍ നല്‍കാന്‍ സര്‍ക്കാര്‍ തീരുമാനിച്ചിട്ടുണ്ട്.

ഈ കേസിന്റെ വിശദമായ നിയമനടപടികള്‍ക്കും തുടർ അന്വേഷണങ്ങള്‍ക്കും ശേഷം മാത്രമേ യാഥാര്‍ഥ്യത്തിന്റെ മുഴുവന്‍ ചിത്രവും വ്യക്തമാകുകയുള്ളുവെന്ന് നിരീക്ഷിക്കുന്നു.

English Summary

The Thiruvananthapuram Principal Sessions Court questioned the credibility of the second sexual harassment complaint against Rahul Mankootathil, pointing out contradictions in the victim’s statements and reasons for the delay in filing the complaint. The court noted that the first complaint was submitted to the KPCC president instead of the police, raising doubts about the allegations.