വിദ്യാർത്ഥിയുടെ കഴുത്തിൽ കുത്തി പ്ലസ് വൺ വിദ്യാർത്ഥി; പിതാവിനെയടക്കം പിടികൂടി പോലീസ്

ഇന്ന് വൈകിട്ടോടെയാണ് സംഭവം

കോഴിക്കോട്: പ്ലസ് വൺ വിദ്യാർത്ഥിയെ മറ്റൊരു വിദ്യാർത്ഥി കത്തികൊണ്ട് കുത്തി പരിക്കേൽപിച്ചു. കോഴിക്കോട് ഫറോക്ക് മണ്ണൂര്‍ പത്മരാജ സ്കൂളിന് സമീപത്തുവെച്ചാണ് സംഭവം. കഴുത്തിന് കുത്തേറ്റ വിദ്യാര്‍ത്ഥിയെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്.(Plus one student stabbed student in the neck; police custody)

ഇന്ന് വൈകിട്ടോടെയാണ് സംഭവം. ആക്രമണം നടത്തിയ വിദ്യാർത്ഥിയെയും കുട്ടിയേയും പോലീസ് കസ്റ്റഡിയിലെടുത്തിട്ടുണ്ട്. പത്തിന് ഇരുവരും ഒരേ സ്കൂളിലാണ് പഠിച്ചിരുന്നത്. പ്ലസ് വണ്ണിന് ഇരുവരും പ്രദേശത്തുള്ള രണ്ട് സ്കൂളിലിലാണ് പഠിക്കുന്നത്. രണ്ടുപേരും തമ്മിൽ മുമ്പുണ്ടായ തര്‍ക്കത്തെ തുടർന്ന് ഇന്നലെ സ്കൂളിലേക്ക് പോകുന്നതിനിടെ ബസിൽ വെച്ചും തര്‍ക്കമുണ്ടായിരുന്നു. ഈ തർക്കം കയ്യാങ്കളിയിലാണ് കലാശിച്ചത്.

തുടർന്ന് പറഞ്ഞു തീര്‍ക്കാൻ ഒരു വിദ്യാര്‍ത്ഥിയുടെ വീട്ടിൽ കൂട്ടുക്കാരുമായി എത്തിയതായിരുന്നു വിദ്യാര്‍ത്ഥി. ഇതിനിടെ വാക്കേറ്റം ഉണ്ടാകുകയും ആക്രമണം നടക്കുകയുമായിരുന്നു. സംഭവ സമയത്ത് വിദ്യാര്‍ത്ഥിയുടെ പിതാവ് വീട്ടിലുണ്ടായിരുന്നു. ഇതിന്‍റെ അടിസ്ഥാനത്തിൽ പിതാവിനെയും കസ്റ്റഡിയിലെടുക്കുകയായിരുന്നു.