കളിക്കിടയിൽ കിണറ്റിലേക്ക് വീണ് 14-കാരൻ; രക്ഷിക്കാനിറങ്ങിയ ആളും കുടുങ്ങി! ഇരുവരെയും രക്ഷിച്ച് അഗ്നിരക്ഷാസേന
മലപ്പുറം: ഫുട്ബോൾ കളിക്കുന്നതിനിടെ കിണറ്റിൽ വീണ 14കാരനെയും രക്ഷിക്കാനിറങ്ങിയ ആളെയും അഗ്നിരക്ഷാസേന രക്ഷപ്പെടുത്തി. ചുങ്കത്തറ മാമ്പൊയിൽ സ്വദേശിയായ അദിനാനാണ് അപകടത്തിൽപ്പെട്ടത്.
ഗ്രൗണ്ടിൽ നിന്ന് പുറത്തേക്ക് പോയ പന്ത് എടുക്കാൻ ഓടുന്നതിനിടെ നിർമാണത്തിലിരുന്ന ഏകദേശം നാല്പ്പത് അടിയിലേറെ ആഴമുള്ള കിണറ്റിലേക്ക് കുട്ടി വീഴുകയായിരുന്നു. സംഭവം കണ്ടുനിന്ന പ്രദേശവാസിയായ ഒരാൾ കുട്ടിയെ രക്ഷിക്കാൻ കിണറ്റിലേക്ക് ഇറങ്ങിയെങ്കിലും ഇരുവരും കുടുങ്ങി.
വിവരം അറിഞ്ഞ് സ്ഥലത്തെത്തിയ നാട്ടുകാർ രക്ഷാപ്രവർത്തനം നടത്താൻ ശ്രമിച്ചെങ്കിലും വിജയിച്ചില്ല. തുടർന്ന് അഗ്നിരക്ഷാസേനയെ വിവരമറിയിക്കുകയായിരുന്നു.
അഗ്നിരക്ഷാസേന എത്തി വല ഉപയോഗിച്ച് ആദ്യം കുട്ടിയെയും തുടർന്ന് രക്ഷിക്കാനിറങ്ങിയ ആളെയും സുരക്ഷിതമായി പുറത്തെത്തിച്ചു.
കുട്ടിയുടെ കാലിന് പരിക്കേറ്റിട്ടുണ്ട്. ആദ്യം നിലമ്പൂർ ജില്ലാ ആശുപത്രിയിലും തുടർന്ന് കോഴിക്കോട് മെഡിക്കൽ കോളജ് ആശുപത്രിയിലും പ്രവേശിപ്പിച്ചു. ഇരുവർക്കും ഗുരുതര പരിക്കുകളില്ലെന്നാണ് വിവരം.
English Summary
A 14-year-old boy who fell into a deep well while playing football in Malappuram was rescued by the Fire Force. A local man who tried to rescue the boy also got trapped inside the well.
