റോഡിലേയ്ക്ക് മറിഞ്ഞു വീണ അധ്യാപകൻ്റെ മേൽ ലോറി കയറിയിറങ്ങി
ഇടുക്കി/പുളിയൻമല : ബൈക്ക് ഓട്ടോറിക്ഷയിൽ ഇടിച്ച് റോഡിലേയ്ക്ക് മറിഞ്ഞു വീണ അധ്യാപകൻ്റെ മേൽ ലോറി കയറിയിറങ്ങി മരിച്ചു.
കുമളി മുരിക്കടി സ്വദേശിയും പുളിയൻമല ക്രൈസ്റ്റ് കോളജ് അധ്യാപകനുമായ ജോയ്സ് പി. ഷിബു ( 25) ആണ് മരിച്ചത്.
വ്യാഴാഴ്ച രാവിലെ 8.15 ഓടെ പുളിയൻമല -തൊടുപുഴ റോഡിൽ പുളിയൻമല കമ്പനിപ്പടിയിലാണ് അപകടമുണ്ടായത്.
പുളിയൻമല ഭാഗത്തു നിന്നും കട്ടപ്പന ഭാഗത്തേയ്ക്ക് വരികയായിരുന്ന ജോയ്സിൻ്റെ ബൈക്ക് മുന്നിൽ പോകുകയായിരുന്ന ഓട്ടോറിക്ഷയിൽ ഇടിച്ച ശേഷം റോഡിലേയ്ക്ക് മറിയുകയായിരുന്നു. ഈ സമയം എതിരെ വന്ന ലോറി ദേഹത്തു കൂടി കയറിയിറങ്ങി.
ഇതുവഴിയെത്തിയ യാത്രക്കാരും മറ്റും ചേർന്ന് ഉടൻ തന്നെ ആശുപത്രിയിലെത്തിക്കാൻ ശ്രമിച്ചെങ്കിലും ഗുരുതരമായി പരുക്കേറ്റ ജോയ്സ് തൽക്ഷണം മരിക്കുകയായിരുന്നു.
ക്രൈസ്റ്റ് കോളേജിലെ പൂർവ വിദ്യാർഥി കൂടിയായ ജോയ്സ് ബി. ബി.എ അധ്യാപകനായി ജോലി ചെയ്യുകയായിരുന്നു.
മൃതദേഹം ഇരുപതേക്കർ താലൂക്ക് ആശുപത്രിയിൽ സൂക്ഷിച്ചിരിക്കുന്നു. വണ്ടൻമേട് പോലീസ് സ്ഥലത്തെത്തി മേൽ നടപടികൾ സ്വീകരിച്ചു.
