TOP NEWS
സദ്യയുടെ കൂടെ വിളമ്പുന്ന രുചിക്കൂട്ടുകള്‍ക്കൊപ്പം ചില നാടന്‍ ചേരുവകള്‍കൂടി ആയാലോ ഇത്തവണ..
ആവശ്യമുള്ള സാധനങ്ങള്‍
കടല – 1 കപ്പ്
ചേന കഷണങ്ങളാക്കിയത്-1 കപ്പ്
പച്ചക്കായ കഷണങ്ങളാക്കിയത്- 1 കപ്പ്
തേങ്ങ ചിരകിയത്- 1/2 മുറി
ജീരകം – 2 നുള്ള്
മഞ്ഞള്‍പ്പൊടി -1/2 ടീസ്പൂണ്‍
കുരുമുളക് പൊടി -2 ടേബിള്‍ സ്പൂണ്‍
എണ്ണ ,ഉപ്പ് ,കടുക്- പാകത്തിനു
ഉഴുന്നുപരിപ്പ് -1 ടീസ്പൂണ്‍
വറ്റല്‍ മുളക് -3 എണ്ണം
കറിവേപ്പില -1 തണ്ട്
ശര്‍ക്കര – ഒരു ചെറിയ കഷണം
ചെറിയ ഉള്ളി – 3 എണ്ണം വട്ടത്തില്‍ അരിഞ്ഞത്
തയാറാക്കുന്ന വിധം:
കടല കുതിര്‍ത്ത് ലേശം ഉപ്പ്,മഞ്ഞള്‍ പൊടി ഇവ ചേര്‍ത്ത് വേവിച്ച് വയ്ക്കുക.ചേന, കായ ഇവ കുറച്ച് കട്ടിയുള്ള ചതുര കഷ്ണങ്ങളായി അരിഞ്ഞെടുക്കുക. തേങ്ങ ചിരകിയതില്‍ നിന്നും 5 ടേബിള്‍ സ്പൂണ്‍ തേങ്ങ മാറ്റി വക്കുക.ബാക്കി തേങ്ങ , ജീരകം ,2 നുള്ള് മഞ്ഞള്‍പൊടി ഇവ ഒരുപാട് അരഞ്ഞ് പോകാതെ ലേശം തരുതരുപ്പായി അരച്ച് എടുക്കുക.പച്ചമുളക് ചേര്‍ക്കുന്നുണ്ടെങ്കില്‍ അരക്കുമ്പോള്‍ ചേര്‍ക്കാം.പാന്‍ അടുപ്പില്‍ വച്ച് ചേന, കായ കഷ്ണങ്ങള്‍, മഞ്ഞള്‍പൊടി, ഉപ്പ് ഇവ ചേര്‍ത്ത് വേവിക്കാന്‍ വയ്ക്കുക.
ചേന കുറച്ച് വേവ് കൂടുതല്‍ ആണെങ്കില്‍ ആദ്യം ചേന വേവിക്കാന്‍ വയ്ക്കുക.നല്ല പോലെ വെന്ത ശേഷം മാത്രം കായ ചേര്‍ക്കുക. ചേന, കായ ഇവ വെന്ത് വരുമ്പോള്‍ കുരുമുളക് പൊടി ,കടല വേവിച്ചത് ഇവ ചേര്‍ത്ത് ഇളക്കി അടച്ച് വച്ച് വേവിക്കുക.ശേഷം ശര്‍ക്കര ചേര്‍ത്ത് ഇളക്കുക. വെള്ളം നന്നായി വലിഞ്ഞ് തുടങ്ങുമ്പോള്‍ അരപ്പ് ,പാകത്തിനു ഉപ്പ് ഇവ ചേര്‍ത്ത് നന്നായി ഇളക്കി അടച്ച് വച്ച് വേവിച്ച് വെള്ളം ഒക്കെ നന്നായി വലിഞ്ഞ പരുവത്തില്‍ തീ ഓഫ് ചെയ്യാം.
ഇനി പാനില്‍ എണ്ണ ചൂടാക്കി കടുക്, ഉഴുന്ന് പരിപ്പ്, വറ്റല്‍മുളക്,ചെറിയുള്ളി, മാറ്റിവച്ച 5 ടേബിള്‍ സ്പൂണ്‍ തേങ്ങ ,കറിവേപ്പില ഇവ ചേര്‍ത്ത് നന്നായി ചുവക്കെ മൂപ്പിക്കുക. കരിയാതെ ശ്രദ്ധിക്കണം.നന്നായി മൂത്ത ശേഷം 1 നുള്ള് കുരുമുളക്‌പൊടി കൂടെ ചേര്‍ത്ത് ഇളക്കി ഇത് കറിയിലേക്ക് ചേര്‍ത്ത് ഇളക്കി 10 മിനുറ്റ് അടച്ച് വച്ച ശേഷം ഉപയോഗിക്കാം. അങ്ങനെ നമ്മുടെ സ്വാദിഷ്ടമായ കൂട്ടുകറി തയ്യാറായി കഴിഞ്ഞു.
