അവശിഷ്ടങ്ങൾ തേടി മായയും മർഫിയും എയ്ഞ്ചലും; ഇരുപതടി താഴ്ചയിൽ നിന്നുപോലും മനുഷ്യഗന്ധം തിരിച്ചറിയാനുള്ള കഴിവുണ്ടെന്ന് പൊലീസ്

Thrissur: വെടിക്കെട്ട് ദുരന്തത്തിൽ ചിതറിപ്പോയ മനുഷ്യശരീര ഭാഗങ്ങൾ കണ്ടെത്തുന്നതിൽ കേരള പൊലീസിന്റെ കഡാവർ നായ്ക്കൾ നിർണായക പങ്കുവഹിച്ചു. ‘മായ’, ‘മർഫി’, ‘എയ്ഞ്ചൽ’ എന്നീ പ്രത്യേക പരിശീലനം നേടിയ നായ്ക്കൾ മൂന്നു സി.ഐമാരുടെ നേതൃത്വത്തിൽ നടത്തിയ തിരച്ചിലിൽ നിരവധി അവശിഷ്ടങ്ങൾ കണ്ടെത്തി.

ഈ നായ്ക്കൾക്ക് ഇരുപതടി താഴ്ചയിൽ നിന്നുപോലും മനുഷ്യഗന്ധം തിരിച്ചറിയാനുള്ള കഴിവുണ്ടെന്ന് പൊലീസ് വ്യക്തമാക്കി. കൊച്ചിയിൽ നിന്ന് മായയെയും മർഫിയെയും, ഇടുക്കിയിൽ നിന്ന് എയ്ഞ്ചലിനെയും സ്ഥലത്തെത്തിച്ചു. ബെൽജിയം മലിനോയിസ് ഇനത്തിൽപ്പെട്ടവയാണ് ഇവ.

പരിശീലനം നേടിയ കഡാവർ നായ്ക്കൾക്ക് 20 അടി വരെ മണ്ണിനടിയിലും 30 മീറ്റർ വരെ വെള്ളത്തിനടിയിലുമുള്ള മൃതദേഹങ്ങളുടെ ഗന്ധം തിരിച്ചറിയാൻ കഴിയും. ദുരന്തനിവാരണ പ്രവർത്തനങ്ങളിൽ ഇവയുടെ സഹായം ഏറെ നിർണായകമാണ്.

മുൻപ് തെലങ്കാനയിലെ ടണൽ ദുരന്തത്തിലും, പെട്ടിമുടി, കൊക്കയാർ, വയനാട് ഉരുൾപൊട്ടലുകളിലും ഇവയുടെ സേവനം ഉപയോഗിച്ചിരുന്നു. ഇലന്തൂർ നരബലി കേസിന്റെ അന്വേഷണത്തിലും ഇവ പൊലീസിനെ സഹായിച്ചിട്ടുണ്ട്.

കേരള പൊലീസിനുള്ള ബെൽജിയം മലിനോയിസ് ഇനത്തിൽപ്പെട്ട 36 നായ്ക്കളിൽ മായ, മർഫി, എയ്ഞ്ചൽ എന്നിവയാണ് മനുഷ്യശരീര അവശിഷ്ടങ്ങൾ കണ്ടെത്തുന്നതിൽ വിദഗ്ധരായ ‘ഹ്യൂമൻ റിമെയിൻസ് ഡിറ്റക്ഷൻ ഡോഗ്സ്’. കൂടാതെ കൊലപാതകവും മോഷണവും അന്വേഷിക്കാൻ 17 നായ്ക്കളും സ്ഫോടകവസ്തുക്കൾ കണ്ടെത്താൻ 13 നായ്ക്കളും സംഘത്തിലുണ്ട്.

ബെൽജിയം മലിനോയിസ് നായ്ക്കളുടെ മൂക്കിൽ 300 ദശലക്ഷത്തിലധികം ഘ്രാണ സെൻസറുകളുണ്ട്. മനുഷ്യനിൽ ഇത് ഏകദേശം ആറു ദശലക്ഷം മാത്രമാണ്. മനുഷ്യശരീരം ജീർണിക്കുമ്പോൾ ഉണ്ടാകുന്ന നൂറുകണക്കിന് രാസസംയുക്തങ്ങളുടെ ഗന്ധം വർഷങ്ങളോളം നിലനിൽക്കുന്നതും ഇവ തിരിച്ചറിയാൻ കഴിവുള്ളതാണ്.

English Summary
In Thrissur, specially trained cadaver dogs of the Kerala Police—Maya, Murphy, and Angel—played a crucial role in locating scattered human remains after the fireworks disaster.

kerala-police-cadaver-dogs-thrissur-fireworks-disaster-search

Kerala Police, Cadaver Dogs, Thrissur, Fireworks Disaster, Rescue Operation, Belgian Malinois, Forensic, Kerala News