5000 കോടി രൂപയുടെ നിധി ഒളിഞ്ഞിരിക്കുന്ന ജില്ല
കാസർകോട്: വടക്കൻ കേരളത്തിൽ ഏകദേശം ₹5000 കോടി രൂപയുടെ വരുമാനം പ്രതീക്ഷിക്കുന്ന ബോക്സൈറ്റ് ഖനന പദ്ധതിക്ക് കേന്ദ്രസംഘം അനുമതി നൽകി.
കാസർകോട് ജില്ലയിലെ ബദിയടുക്ക, എൻമകജെ, കാറഡുക്ക ഗ്രാമങ്ങളിലായി ജിയോളജിക്കൽ സർവേ ഓഫ് ഇന്ത്യ (GSI) നടത്തിയ പഠനത്തിന്റെ റിപ്പോർട്ട് സംസ്ഥാന സർക്കാരിന് സമർപ്പിച്ചു.
പാറപ്രദേശങ്ങളിലുള്ള 150 ഹെക്ടർ സ്ഥലത്താണ് ഖനനം പദ്ധതിയിടുന്നത്.
ഖനനത്തിനായി വൻകിട കമ്പനികളെ കാസർകോട്ടെത്തിക്കാൻ ദേശീയതലത്തിൽ ലേലം നടത്താൻ എസ്ബിഐയെ ചുമതലപ്പെടുത്തി.
ലേല നടപടികൾക്ക് മേൽനോട്ടം വഹിക്കുന്നതിന് വ്യവസായ വകുപ്പിന്റെ പ്രിൻസിപ്പൽ സെക്രട്ടറിയുടെ അധ്യക്ഷത്വത്തിൽ ഉന്നതതല സമിതി രൂപീകരിക്കും.
ബോക്സൈറ്റ് അലുമിനിയം, സിമന്റ് തുടങ്ങിയ വ്യവസായങ്ങൾക്ക് അനിവാര്യ ഘടകമാണ്. ജി.എസ്.ഐയുടെ വിശദമായ മാപ്പിംഗ്, സാമ്പിൾ ശേഖരണം തുടങ്ങിയവയുടെ അടിസ്ഥാനത്തിൽ ലാഭകരമായ ഖനന മേഖലകൾ അടയാളപ്പെടുത്തിയിട്ടുണ്ട്.
ബോക്സൈറ്റ് ഖനനം കാസർകോട്ടിന്റെ വ്യാവസായിക വളർച്ചയ്ക്ക് വൻ ഉണർവാകും.
ഇന്ത്യയിൽ ഒഡീഷ, ഛത്തീസ്ഗഢ്, ആന്ധ്രപ്രദേശ് എന്നിവിടങ്ങളിലാണ് ഇതിന്റെ വലിയ നിക്ഷേപങ്ങൾ ഉള്ളത്.
ഇപ്പോൾ കാസർകോട് ജില്ലയിലും സമൃദ്ധമായ നിക്ഷേപം കണ്ടെത്തിയതായി റിപ്പോർട്ട് പറയുന്നു.
പഠനം നടത്തിയ സ്ഥലങ്ങളിൽ നാല് മീറ്റർ താഴ്ചയിൽ ഖനനം നടത്തിയാൽ രണ്ടു കോടി ടൺ ബോക്സൈറ്റ് ലഭിക്കുമെന്ന് കണക്കാക്കുന്നു.
ഇതിൽ 44.4% അലുമിനിയം ഓക്സൈഡ്, 5.17% സിലിക്കൺ, 22.6% ഫെറിക് ഓക്സൈഡ്, 1.76% ടൈറ്റാനിയം ഡൈഓക്സൈഡ് എന്നിവയുണ്ട്.
ഒഡീഷയിൽ ഖനനം നടത്തുന്ന വേദാന്ത ഗ്രൂപ്പ് ഉപയോഗിക്കുന്ന മണ്ണിൽ 40% അലുമിനിയമാണ്.
എന്നാൽ ബദിയടുക്കയിലെ ഉക്കിനടുക്ക മേഖലയിൽ അതിലും കൂടുതൽ അലുമിനിയം അളവ് കണ്ടെത്തിയതായി ജി.എസ്.ഐ പഠനം സൂചിപ്പിക്കുന്നു.
മുള്ളേരിയയിലും കാറഡുക്കയിലും ഖനന സാധ്യതകൾ കണ്ടെത്തിയിട്ടുണ്ട്. മുള്ളേരിയയിൽ 1.5 ചതുരശ്ര കിലോമീറ്റർ പ്രദേശത്ത് ബോക്സൈറ്റ് ലഭിക്കാമെന്നും
കാറഡുക്കയിൽ 0.2113 ദശലക്ഷം ടൺ ഉയർന്ന ഗ്രേഡ് ബോക്സൈറ്റ്, 5.1417 ദശലക്ഷം ടൺ അലുമിനിയം ലാറ്ററൈറ്റ് ലഭ്യമാകാമെന്നും റിപ്പോർട്ട് പറയുന്നു.
മുള്ളേരിയയിലെ ഖനന പ്രദേശം വനം വകുപ്പിന്റെ കാടകം റിസർവ് ഫോറസ്റ്റ് അതിർത്തിയിലാണ്.
ഉക്കിനടുക്കയിലെ ഭൂമി സർക്കാർ, സ്വകാര്യ ഉടമസ്ഥതയിലുള്ളതാണ്. സ്വകാര്യ ഭൂമിയിൽ 284 വീടുകൾ ഉൾപ്പെടുന്നതിനാൽ ഭൂമി ഏറ്റെടുക്കലിനുള്ള പാട്ടത്തുക വലുതായിരിക്കും.
ഖനനത്തിനു ശേഷം സ്ഥലം നികത്തി തിരിച്ചുനൽകുമെന്ന് അധികൃതർ വ്യക്തമാക്കിയിട്ടുണ്ട്.
English Summary:
The Central Government has approved a bauxite mining project in northern Kerala, expected to generate ₹5,000 crore in revenue. The Geological Survey of India (GSI) submitted a report identifying rich deposits across Badiyadka, Enmakaje, and Karadukka villages in Kasaragod district. Around 150 hectares of rocky terrain have been marked for mining.The SBI has been tasked with organizing a national-level auction to bring in large companies, while a high-level committee led by the Principal Secretary of Industries will oversee proceedings.Tests show deposits with 44.4% aluminium oxide, 5.17% silicon, 22.6% ferric oxide, and 1.76% titanium dioxide — richer than the bauxite mined in Odisha by Vedanta Group. Ukinadukka, Mulleria, and Karadukka areas show strong mining potential, with over 5 million tonnes of aluminium laterite identified.Some of the land overlaps private and forest reserve boundaries, affecting around 284 homes. Owners will receive compensation, and the land will be refilled and restored post-mining.
