സഞ്ജുവിന് ഇത് ലാസ്റ്റ് ചാൻസ്! അഹമ്മദാബാദിൽ ഇന്ന് ഡച്ച് വേട്ടയോ? ഇന്ത്യ – നെതർലൻഡ്സ് പോരാട്ടം ഇന്ന്!
അഹമ്മദാബാദ്: ടി20 ലോകകപ്പിലെ ഗ്രൂപ്പ് ഘട്ടത്തിലെ അവസാന മത്സരത്തിൽ ഇന്ത്യ ഇന്ന് നെതർലൻഡ്സിനെ നേരിടും. ഗുജറാത്തിലെ അഹമ്മദാബാദ് സ്റ്റേഡിയത്തിൽ രാത്രി 7 മണിക്കാണ് മത്സരം തുടങ്ങുക.
ഗ്രൂപ്പിലെ എല്ലാ മത്സരങ്ങളും ജയിച്ച് സൂപ്പർ എട്ടിലേക്ക് കടക്കാനുള്ള ആത്മവിശ്വാസത്തോടെയാണ് സൂര്യകുമാർ യാദവ് നയിക്കുന്ന ഇന്ത്യൻ ടീം കളത്തിലിറങ്ങുന്നത്.
ഇതിനോടകം മൂന്ന് മത്സരങ്ങളിലും വിജയം നേടി സൂപ്പർ എട്ടിൽ സ്ഥാനം ഉറപ്പിച്ച ഇന്ത്യ, റിസർവ് താരങ്ങൾക്ക് അവസരം നൽകുന്നതിനായി ടീമിൽ ചില മാറ്റങ്ങൾ വരുത്താൻ സാധ്യതയുണ്ട്.
പ്രധാന ബൗളർമാരായ ജസ്പ്രീത് ബുമ്രക്കും വരുൺ ചക്രവർത്തിക്കും വിശ്രമം നൽകുകയും പകരം മുഹമ്മദ് സിറാജിനെയും അർഷ്ദീപ് സിങിനെയും ഉൾപ്പെടുത്തുകയും ചെയ്യാനിടയുണ്ട്.
ലോകകപ്പിലെ ആദ്യ രണ്ട് മത്സരങ്ങളിലും റണ്ണില്ലാതെ പുറത്തായ ഓപ്പണർ അഭിഷേക് ശർമ ഫോമിലേക്കു മടങ്ങിവരുന്നത് ഇന്ത്യയ്ക്ക് നിർണായകമാണ്. നെതർലൻഡ്സിനെതിരായ മത്സരം അദ്ദേഹത്തിന് മികച്ച അവസരമാകാം.
ഇഷാൻ കിഷന് വിശ്രമം നൽകി സഞ്ജു സാംസണിന് അവസരം നൽകാനും സാധ്യതയുണ്ട്.ഇന്നും അവസരം ലഭിക്കാത്ത പക്ഷം തുടർന്നുള്ള മത്സരങ്ങളിലും സഞ്ജുവിന് പുറത്തിരിക്കേണ്ടിവരുമെന്നതാണ് സൂചന.
സൂപ്പർ എട്ടിലും തുടർന്ന് നടക്കുന്ന നോക്കൗട്ട് ഘട്ടങ്ങളിലും പരീക്ഷണങ്ങൾക്ക് ഇന്ത്യ തയ്യാറാകാൻ സാധ്യത കുറവാണ്. അതിനാൽ പ്രധാന മത്സരങ്ങളിൽ സഞ്ജുവിന് അവസരം ലഭിക്കുമെന്ന പ്രതീക്ഷ വളരെ കുറഞ്ഞിരിക്കുകയാണ്.
നിലവിലെ സാഹചര്യത്തിൽ ഇഷാൻ കിഷൻ മികച്ച ഫോമിലാണ് എന്നതും അദ്ദേഹത്തിന് ടീമിൽ മുൻതൂക്കം നൽകുന്ന ഘടകമാണ്.
ടി20 ലോകകപ്പിന് ശേഷം ശുഭ്മാൻ ഗിൽ ടീമിലേക്ക് മടങ്ങിയെത്തിയാൽ സഞ്ജുവിന് മത്സരം കൂടുതൽ കടുത്തതാകും. ടീമിൽ സ്ഥാനം ഉറപ്പിക്കാൻ ഇനി അദ്ദേഹത്തിന് മുന്നിലുള്ള പ്രധാന അവസരം ഐപിഎല്ലിലെ പ്രകടനമാണ്.
ചെന്നൈ സൂപ്പർ കിങ്സിനായി മികച്ച പ്രകടനം കാഴ്ചവെച്ചാൽ മാത്രമേ ടീമിൽ സ്ഥിര സാന്നിധ്യമാകാൻ കഴിയൂ എന്ന വിലയിരുത്തലുമുണ്ട്.
എന്തായാലും നെതർലൻഡ്സിനെതിരായ മത്സരത്തിൽ അവസരം ലഭിക്കുമെന്ന പ്രതീക്ഷയിലാണ് ആരാധകർ.
എന്നാൽ അഭിഷേക് ശർമയ്ക്ക് ഫോം വീണ്ടെടുക്കാൻ കൂടുതൽ അവസരം നൽകേണ്ട സാഹചര്യമുണ്ടായതും ഇഷാൻ കിഷൻ മികച്ച പ്രകടനം തുടരുന്നതും സഞ്ജുവിന്റെ സാധ്യത കുറയ്ക്കുന്ന ഘടകങ്ങളാണ്.
നെതർലൻഡ്സിന് ഇതുവരെ ഒരു ജയവും രണ്ട് തോൽവിയുമാണ്. പാകിസ്ഥാനോടും അമേരിക്കയോടും പരാജയപ്പെട്ട അവർ നമീബിയയെ തോൽപ്പിച്ചാണ് ഏക വിജയം സ്വന്തമാക്കിയത്.
ശക്തമായ ഇന്ത്യയെ നേരിടുമ്പോൾ മികച്ച പ്രകടനം കാഴ്ചവയ്ക്കുക എന്ന ലക്ഷ്യത്തോടെയാണ് സ്കോട്ട് എഡ്വേഡ്സ് നയിക്കുന്ന ഡച്ച് ടീം ഇറങ്ങുന്നത്.
English Summary
India faces the Netherlands in their final T20 World Cup group match in Ahmedabad. Having already qualified for the Super Eight with three wins, India may rest key players and test bench strength, while the Netherlands aim to challenge strongly despite mixed results so far.
india-vs-netherlands-t20-world-cup-match-preview
India vs Netherlands, T20 World Cup, Indian Cricket Team, Suryakumar Yadav, Match Preview, Cricket News
