തിരുവനന്തപുരം: സംസ്ഥാനത്ത് എല്ലാ വിദ്യാർത്ഥികൾക്കും പൊതുവിദ്യാഭ്യാസ വകുപ്പ് സൗജന്യ ലാപ്ടോപ്പ് വിതരണം ചെയ്യുമെന്ന പ്രചാരണത്തിനെതിരെ വിദ്യാഭ്യാസമന്ത്രി വി ശിവൻകുട്ടി. പ്രചരിക്കുന്ന വാർത്ത വ്യാജമാണെന്നും സൈബർ തട്ടിപ്പിൽ കുടുങ്ങരുതെന്നും മന്ത്രി മുന്നറിയിപ്പ് നൽകി. ഇത്തരം പ്രചാരണങ്ങൾ വഴി അപേക്ഷകരുടെ പേരു വിവരങ്ങൾ അടക്കം ശേഖരിച്ചുകൊണ്ട് ഒരു സൈബർ തട്ടിപ്പിന് ശ്രമം നടക്കുന്നതായി ശ്രദ്ധയിൽപ്പെട്ടിട്ടുണ്ടെന്നും മന്ത്രി വി. ശിവൻകുട്ടി പറഞ്ഞു.(‘Free laptop for all students’: Minister Sivankutty says the message is fake)
ഇത്തരം തട്ടിപ്പിന് പൊതുജനങ്ങൾ ഇരയാകുന്നത് തടയാൻ അതിവേഗം നടപടികൾ കൈക്കൊള്ളാൻ പൊതുവിദ്യാഭ്യാസ വകുപ്പ് സംസ്ഥാന പൊലീസ് മേധാവിക്ക് പരാതി നൽകിയതായും മന്ത്രി അറിയിച്ചു. സാധാരണ ജനങ്ങളിലേക്ക് വാട്ട്സ്ആപ്പ് സന്ദേശമായും ഫേസ്ബുക്ക് വഴിയുമാണ് ഈ ലിങ്ക് എത്തുന്നത്. മെസ്സേജ് വഴി രജിസ്ട്രേഷന് ലിങ്ക് സഹിതമാണ് പ്രചരണം നടത്തുന്നത്.
പൊതുവിദ്യാഭ്യാസ വകുപ്പിന്റെയും സർക്കാരിന്റേയും ഔദ്യോഗിക ചിഹ്നങ്ങൾ ഉപയോഗിച്ചാണ് സന്ദേശം പ്രചരിപ്പിക്കുന്നത് എന്നത് സംഭവത്തിന്റെ ഗൗരവം വർധിപ്പിക്കുന്നു. വിദ്യാർത്ഥികളും രക്ഷിതാക്കളും വഞ്ചിതരാകാതിരിക്കണമെന്നും ജാഗ്രത വേണമെന്നും മന്ത്രി ശിവൻകുട്ടി മുന്നറിയിപ്പ് നൽകി.
