വടക്കഞ്ചേരി: വടക്കഞ്ചേരിയിൽ യാത്രക്കാരിയോട് അപമര്യാദയായി പെരുമാറിയ മുൻ കെ.എസ്.ആർ.ടി.സി. ജീവനക്കാരൻ അറസ്റ്റിൽ. പുതുക്കോട് സ്വദേശി മോഹനനാണ് (57) അറസ്റ്റിലായത്. ബുധനാഴ്ച രാത്രി 10:50-നായിരുന്നു സംഭവം.
പാലക്കാട് നിന്നും തൃശ്ശൂരിലേക്ക് പോവുകയായിരുന്ന യാത്രക്കാരിയോട് വടക്കഞ്ചേരിക്ക് സമീപം എത്തിയപ്പോൾ അപമര്യാദയായി പെരുമാറുകയായിരുന്നെന്ന് വടക്കഞ്ചേരി പോലീസ് പറഞ്ഞു. ഉടൻ തന്നെ യാത്രക്കാരി കണ്ടക്ടറോട് വിവരം പറഞ്ഞു. കണ്ടക്ടറും മറ്റ് യാത്രക്കാരും ചേർന്ന് മോഹനനെ പിടിച്ച് നിർത്തി വടക്കഞ്ചേരി പോലീസിൽ വിവരം അറിയിച്ചു. തുടർന്ന് വടക്കഞ്ചേരി പോലീസെത്തി മോഹനനെ അറസ്റ്റു ചെയ്യുകയായിരുന്നു. യുവതിയുടെ മൊഴിയും രേഖപ്പെടുത്തി.
