സംവിധായകന്‍ ഷാജി കൈലാസിന്റെ മകന്‍ ജഗന്‍ ഷാജി കൈലാസ് സംവിധാനം ചെയ്യുന്ന ആദ്യ സിനിമയുടെ ചിത്രീകരണം തുടങ്ങി. പാലക്കാട് പോത്തുണ്ടി ഡാമിന് അരികെയുള്ള ഇറിഗേഷന്‍ ഗെസ്റ്റ് ഹൗസിലായിരുന്നു ആദ്യ ദിവസത്തെ ചിത്രീകരണം. തികച്ചും ലളിതമായ ചടങ്ങില്‍ രണ്‍ജി പണിക്കര്‍ സ്വിച്ചോണ്‍ കര്‍മം നിര്‍വഹിച്ചു. നായകനായ സിജു വില്‍സണ്‍ ഫസ്റ്റ് ക്ലാപ്പും നല്‍കി. ഇവിടെ ഒരുക്കിയ പൊലീസ് സ്റ്റേഷന്റെ സെറ്റിലായിരുന്നു ചിത്രീകരണം.
സിജു വില്‍സന്‍, രണ്‍ജി പണിക്കര്‍, ശ്രീജിത്ത് രവി, ഗൗരി നന്ദ എന്നിവരടങ്ങിയ ഒരു രംഗമായിരുന്നു ഇവിടെ ചിത്രീകരിച്ചത്. എംപിഎം പ്രൊഡക്ഷന്‍സ് ആന്‍ഡ് സെന്റ് മരിയ ഫിലിംസിന്റെ ബാനറില്‍ ജോമി ജോസഫ് പുളിങ്കുന്ന് ഈ ചിത്രം നിര്‍മിക്കുന്നു. വനാതിര്‍ത്തിയിലുള്ള ഗ്രാമത്തിന്റെ പശ്ചാത്തലത്തില്‍ ക്രൈം ത്രില്ലറായാണ് സിനിമ ഒരുങ്ങുന്നത്. പാലക്കാടും പരിസരങ്ങളിലുമായി ഒറ്റ ഷെഡ്യൂളില്‍ ഈ ചിത്രത്തിന്റെ ചിത്രീകരണം പൂര്‍ത്തിയാകും.
രണ്‍ജി പണിക്കര്‍, ഷാജി കൈലാസ്, നിഥിന്‍ രണ്‍ജി പണിക്കര്‍ എന്നിവര്‍ക്കൊപ്പം പ്രവര്‍ത്തിച്ച പരിചയസമ്പത്തുമായാണ് ജഗന്‍ സംവിധാന രംഗത്തേക്ക് ചുവടുവയ്ക്കുന്നത്. കാവല്‍, കടുവ എന്നീ സിനിമകളില്‍ ജഗന്‍ പിന്നണിയിലും സജീവമായി പ്രവര്‍ത്തിച്ചിട്ടുണ്ട്. യുവനടി അഹാന കൃഷ്ണകുമാറിനെ പ്രധാന കഥാപാത്രമാക്കി ‘കരി’ എന്ന മ്യൂസിക്കല്‍ ആല്‍ബം ഒരുക്കിയും ഏറെ പ്രേക്ഷകപ്രീതി നേടിയിരുന്നു.
ജോയ് മാത്യു, ശ്രീകാന്ത് മുരളി, കണ്ണൂര്‍ ശിവാനന്ദന്‍, ധന്യാമേരി വര്‍ഗീസ്, മാലാ പാര്‍വതി, ശാരി, കാവ്യാ ഷെട്ടി തുടങ്ങിയവരും പ്രധാന വേഷങ്ങളിലെത്തുന്നു. രചന സഞ്ജീവ് എസ്., ഛായാഗ്രഹണം ജാക്‌സന്‍ ജോണ്‍സണ്‍, എഡിറ്റിങ് ക്രിസ്റ്റി സെബാസ്റ്റ്യന്‍, കലാസംവിധാനം ഡാനി മുസ്രിസ്, മേക്കപ്പ് അനീഷ് വൈപ്പിന്‍, കോസ്റ്റ്യൂം ഡിസൈന്‍ വീണാ സ്യമന്തക്, ക്രിയേറ്റീവ് ഹെഡ് ഷഫീഖ്, കെ.കുഞ്ഞുമോന്‍. എക്‌സിക്യൂട്ടിവ് പ്രൊഡ്യൂസര്‍ ബിനീഷ് മഠത്തില്‍, പ്രൊജക്ട് ഡിസൈനേഴ്‌സ് അന്‍സില്‍ ജലീല്‍, വിശ്വനാഥ് എ.
