വെളിച്ചെണ്ണയുടെ പകരക്കാരൻ; ആവശ്യകത കൂടിയതോടെ വ്യാജൻ ഇറങ്ങി
തിരുവനന്തപുരം: വെളിച്ചെണ്ണയുടെ വില കുതിച്ചുയർന്നതോടെ ലിറ്ററിന് 200 രൂപയ്ക്കടുത്ത് വിലയുള്ള, ആരോഗ്യത്തിന് ദോഷമില്ലാത്ത തവിടെണ്ണയിലേക്ക് ജനങ്ങൾ മാറുന്നു.
ആവശ്യകത കൂടുന്നതോടൊപ്പം വിപണിയിൽ വ്യാജ തവിടെണ്ണയും നിറയുകയാണ്.
തവിടിൽ രാസവസ്തുക്കൾ ചേർത്ത് തയ്യാറാക്കുന്ന ഇത്തരം എണ്ണ പ്രധാനമായും ആന്ധ്ര, കർണാടക, തമിഴ്നാട് സംസ്ഥാനങ്ങളിൽ നിന്നാണ് എത്തുന്നത്.
ലിറ്ററിന് 120-140 രൂപയ്ക്ക് ലഭിക്കുന്ന ഈ എണ്ണയിൽ യഥാർത്ഥ ഗുണമേന്മ ലഭിക്കാനാകില്ല.
ഭക്ഷ്യസുരക്ഷാ വകുപ്പിന്റെ വിലയിരുത്തലിൽ, അന്യസംസ്ഥാനങ്ങളിൽ നിന്ന് വരുന്ന തവിടെണ്ണയിൽ ആരോഗ്യത്തിനു ഹാനികരമായ രാസവസ്തുക്കൾ കലർന്നിരിക്കാനുള്ള സാധ്യത ഉയർന്നതായി കണ്ടെത്തിയിട്ടുണ്ടെങ്കിലും പരിശോധന ഇനിയും ആരംഭിച്ചിട്ടില്ല.
എണ്ണയുടെ അളവ് വർധിപ്പിക്കാൻ ചേർക്കുന്ന രാസവസ്തുക്കൾ ഹൃദയാരോഗ്യത്തിനും രക്തസമ്മർദ്ദത്തിനും ദോഷകരമാണ്.
പഴക്കം ചെന്നതോ ഗുണമേന്മ കുറഞ്ഞതോ ആയ തവിടിനെ നല്ലതെന്ന് തോന്നിപ്പിക്കുന്ന തരത്തിലുള്ള രാസപ്രക്രിയകളും അപകടകരമാണെന്ന് വിദഗ്ധർ ചൂണ്ടിക്കാണിക്കുന്നു.
സംസ്കരിച്ച ഗുണമേന്മയുള്ള അരിയുടെ തവിടിലാണ് നല്ല തവിടെണ്ണ ലഭിക്കുക. എന്നാൽ മികച്ച തവിടിനൊപ്പം മോശം തവിട് ചേർത്തും എണ്ണ നിർമ്മിച്ചു വിപണിയിൽ എത്തിക്കുന്ന പ്രവണതയും ഉണ്ട്.
ശുദ്ധമായ തവിടെണ്ണ ഹൃദയാരോഗ്യത്തിന് ഗുണകരമാണെന്ന് പഠനങ്ങൾ വ്യക്തമാക്കുന്നു. 38% മോണോ അൺസാച്ചുറേറ്റഡ് ഫാറ്റി ആസിഡും, 37% പോളി അൺസാച്ചുറേറ്റഡ് ഫാറ്റി ആസിഡും, 25% സാച്ചുറേറ്റഡ് ഫാറ്റി ആസിഡുമാണ് തവിടെണ്ണയിൽ അടങ്ങിയിരിക്കുന്നത്.
മോണോ ഫാറ്റുകൾ നല്ല കൊളസ്‌ട്രോൾ വർധിപ്പിക്കാനും പോളി ഫാറ്റുകൾ മോശം കൊളസ്‌ട്രോൾ കുറയ്ക്കാനും സഹായിക്കും. ആന്റിഓക്സിഡന്റുകൾ ചർമ്മാരോഗ്യത്തിനും ഗുണകരമാണ്.
English Summary
With coconut oil prices rising, many consumers in Thiruvananthapuram are shifting to rice bran oil, which costs around ₹200 per litre and is considered healthier. However, the increasing demand has led to a surge in adulterated rice bran oil coming from Andhra Pradesh, Karnataka and Tamil Nadu, sold at ₹120–₹140 per litre — a price too low for genuine quality. Food safety officials warn of harmful chemicals used to increase quantity and enhance appearance, posing risks to heart health and blood pressure. Genuine rice bran oil made from good-quality rice bran contains beneficial MUFA, PUFA and antioxidants that help improve cholesterol levels and skin health.
fake-rice-bran-oil-health-risk
തവിടെണ്ണ, വ്യാജഎണ്ണ, ഭക്ഷ്യസുരക്ഷ, ആരോഗ്യഭീഷണി, വെളിച്ചെണ്ണവില, കേരളം
