കൊല്ലം: പറമ്പിൽ ജോലിചെയ്യുന്നതിനിടെ പന്നിപ്പടക്കം പൊട്ടിത്തെറിച്ച് യുവാവിന്റെ കൈപ്പത്തി തകർന്നു. കൊല്ലം പുനലൂരിലാണ് സംഭവം. പുനലൂര് മണിയാര് എരിച്ചിക്കല് ചരുവിളവീട്ടില് മഹേഷിനാ(28)ണ് ഗുരുതരമായി പരിക്കേറ്റത്.
എരിച്ചിക്കല് കാവിന് സമീപത്തെ പാടത്ത് തിങ്കളാഴ്ച നാലുമണിയോടെയാണ് അപകടം നടന്നത്. അപകടത്തിൽ ഇയാളുടെ വലതു കൈപ്പത്തി തകരുകയും ഇടതുകൈകളിലെയും രണ്ടുവിരലുകള് അറ്റുപോവുകയും ചെയ്തു. മഹേഷിനെ തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചു.
സമീപവാസിയുടെ പാടത്ത് ജോലിക്കിടെ വരമ്പില് കടലാസില് പൊതിഞ്ഞനിലയില് കണ്ട വസ്തു പരിശോധിക്കുന്നതിനിടെയായിരുന്നു അപകടം. ഉഗ്രസ്ഫോടന ശബ്ദവും നിലവിളിയും കേട്ട് ആളുകള് ഓടിക്കൂടിയപ്പോള് കൈകള് രക്തത്തില് കുളിച്ച നിലയിലായിരുന്നു മഹേഷ് കിടന്നിരുന്നു. ഉടന്തന്നെ മഹേഷിനെ പുനലൂര് താലൂക്ക് ആശുപത്രിയിലെത്തിച്ചു. ഇവിടെനിന്ന് പ്രാഥമിക ചികിത്സ നല്കിയശേഷം മെഡിക്കല് കോളേജ് ആശുപത്രിയിൽ പ്രവേശിപ്പിക്കുകയായിരുന്നു.
