കൊച്ചി: പിവി അൻവർ എംഎൽഎയ്ക്കെതിരെ നിയമനടപടികളിലേക്ക് ഡിഎംകെ കേരളഘടകം. പാർട്ടിയുടെ പേരും, പതാകയും അൻവർ ദുരുപയോഗം ചെയ്യുന്നതായി ഭാരവാഹികളായ നൗഷാദ് വയനാട്,മൂന്നാർ മോഹൻദാസ്, ആസിഫ് എന്നിവർ പറഞ്ഞു. അൻവറിനെ DMK കേരള ഘടകം അംഗീകരിക്കുന്നില്ലെന്നും പാർട്ടി നേതൃത്വം യാതൊരു ചർച്ചയും നടത്തിയിട്ടില്ലെന്നും പാർട്ടി പരാതി ഉന്നയിച്ചിട്ടുണ്ട്.
എന്നാൽ തന്നെ സഖ്യകക്ഷിയാക്കണം എന്നാവശ്യപ്പെട്ട് പി വി അൻവർ ഡിഎംകെ കേരള ഘടകത്തെ സമീപിച്ചെങ്കിലും കേരളത്തിലും തമിഴ്നാട്ടിലും ദേശീയ തലത്തിലും സിപിഎം ഡിഎംകെയുടെ സഖ്യകക്ഷിയാണ്, അത്തരം ഒരു പാർട്ടിയുടെ വിമതനെ സഖ്യകക്ഷിയായി ഉൾപ്പെടുത്താൻ സാധിക്കില്ലെന്ന നിലപാട് ഡിഎംകെ വക്താവ് ടി കെ എസ് ഇളങ്കോവൻ നേരത്തെ തന്നെ വ്യക്തമാക്കിയിരുന്നു.
ഇതിനെ തുടർന്നാണ് ഡെമോക്രാറ്റിക് മൂവ്മെന്റ് ഓഫ് കേരള (ഡിഎംകെ) എന്ന പേരിൽ പുതിയ സംഘടന രൂപീകരിക്കുന്ന കാര്യം അൻവർ പ്രഖ്യാപിച്ചത്. ഇതൊരു രാഷട്രീയ പാർട്ടിയല്ല, സോഷ്യൽ മൂവ്മെന്റ് മാത്രമാണെന്നും അൻവർ വാർത്താസമ്മേളനത്തിൽ വ്യക്തമാക്കിയിരുന്നു.
ഡിഎംകെയിൽ ചേരുന്നതിനെക്കുറിച്ചുള്ള ചർച്ച സംബന്ധിച്ച വാർത്തകൾ ഡിഎംകെ എൻആർഐ വിഭാഗം സെക്രട്ടറിയും രാജ്യസഭാ എംപിയുമായ പുതുഗൈ എംഎം അബ്ദുള്ളയും നിഷേധിച്ചിരുന്നു. അൻവറും താനും ദീർഘകാല സുഹൃത്തുക്കളാണെന്നും തങ്ങൾ തമ്മിലുള്ള കൂടിക്കാഴ്ച സൗഹൃദപരമായിരുന്നു എന്നും പുതുഗൈ അബ്ദുള്ള പറഞ്ഞിരുന്നു.
English Summary
DMK Kerala unit to take legal action against PV Anwar MLA
