തിരുവനന്തപുരം: എഡിഎം നവീന് ബാബുവിന്റെ മരണവുമായി ബന്ധപ്പെട്ട് കേസില് ടി വി പ്രശാന്ത് കൈക്കൂലി നല്കിയതിന് തെളിവില്ലെന്ന് വിജിലന്സിന്റെ പ്രാഥമിക അന്വേഷണ റിപ്പോര്ട്ട്. പ്രശാന്ത് മൊഴി നൽകിയതിനപ്പുറം കൈക്കൂലി കൊടുത്തതിന് തെളിവില്ലെന്നാണ് വിജിലൻസിന്റെ കണ്ടെത്തൽ. തെളിവ് ഹാജരാക്കാനായി പ്രശാന്തിനും കഴിഞ്ഞില്ലെന്ന് വിജിലന്സ് റിപ്പോര്ട്ടില് പറയുന്നു.(Death of ADM Naveen Babu; There is no evidence that TV Prashanth give bribe)
കൈക്കൂലി കൊടുത്തെന്ന വെളിപ്പെടുത്തലില് പ്രശാന്തിനെതിരെ കേസെടുക്കാനും വകുപ്പില്ലെന്ന് വിജിലന്സ് റിപ്പോര്ട്ടില് പറയുന്നുണ്ട്. കോഴിക്കോട് വിജിലന്സ് സ്പെഷ്യല് സെല് എസ് പിയാണ് അന്വേഷണം നടത്തിയത്. എന്നാല് പ്രശാന്തിന്റെ ചില മൊഴികള് സാധൂകരിക്കുന്ന തെളിവുകളും ദൃശ്യങ്ങളുമുണ്ടെന്നും റിപ്പോര്ട്ടിൽ പറയുന്നുണ്ട്. സ്വര്ണം പണയം വെച്ചത് മുതല് എഡിഎമ്മിന്റെ ക്വാര്ട്ടേഴ്സിലേക്ക് എത്തുന്നത് വരെയുള്ള മൊഴികളില് തെളിവുകളുണ്ട്.
എന്നാല് ക്വാര്ട്ടേഴ്സിന് സമീപം എത്തിയശേഷം എന്ത് സംഭവിച്ചു എന്നതിന് തെളിവില്ല. ഒക്ടോബര് അഞ്ചിന് സ്വര്ണം പണയം വെച്ചതിന്റെ രസീത് പ്രശാന്ത് കൈമാറി. ഒക്ടോബര് ആറിന് പ്രശാന്തും നവീന് ബാബുവും നാല് തവണ ഫോണില് സംസാരിക്കുകയും ചെയ്തു. തുടർന്നാണ് പ്രശാന്ത് നവീന് ബാബു കൂടിക്കാഴ്ച നടക്കുന്നത്.
ഒക്ടോബര് എട്ടിന് ആണ് പെട്രോള് പമ്പിന് എന്ഒസി ലഭിച്ചത്. കൈക്കൂലി കൊടുത്തെന്ന കാര്യം ഒക്ടോബര് പത്തിനു വിജിലന്സിനെ അറിയിച്ചു. പ്രശാന്തിന്റെ ബന്ധുവാണ് കണ്ണൂര് വിജിലന്സ് ഡിവൈഎസ്പിയെ വിളിച്ചു പറയുന്നത്. ഒക്ടോബര് 14ന് വിജിലന്സ് സിഐ പ്രശാന്തിന്റെ മൊഴിയെടുത്തു. വിജിലന്സ് ഡിവൈഎസ്പിക്ക് അന്ന് തന്നെ റിപ്പോര്ട്ടും കൈമാറി. പ്രശാന്തിന്റെ മൊഴിയെടുത്ത കാര്യം നവീന് ബാബുവിനോട് പറഞ്ഞിട്ടില്ലെന്ന് ആണ് വിജിലന്സ് അറിയിക്കുന്നത്. ഒക്ടോബര് 15 നാണ് നവീന് ബാബുവിനെ ആത്മഹത്യ ചെയ്ത നിലയില് കണ്ടെത്തുന്നത്.
