മലപ്പുറം: മലപ്പുറം പെരിന്തൽമണ്ണയിൽ പത്താംക്ലാസ് വിദ്യാർത്ഥികൾ തമ്മിൽ ഏറ്റുമുട്ടി. താഴെക്കോട് പി ടി എം ഹയർ സെക്കൻഡറി സ്കൂളിൽ പരീക്ഷ എഴുതുന്നതിനായി വന്ന മലയാളം മീഡിയം വിദ്യാർത്ഥികളും , ഇംഗ്ലീഷ് മീഡിയം വിദ്യാർത്ഥികളും തമ്മിലാണ് സംഘർഷം ഉണ്ടായത്. മുന്ന് വിദ്യാർത്ഥികൾ ചേർന്നാണ് ആക്രമണം നടത്തിയത്.
വിദ്യാർത്ഥികൾ തമ്മിലുള്ള ആക്രമണത്തിൽ മൂന്നുപേർക്ക് കുത്തേറ്റു. ഒരു വിദ്യാർത്ഥിയുടെ തലയ്ക്ക് സാരമായി പരിക്കേറ്റിട്ടുണ്ട്. വിദ്യാർത്ഥികളിൽ ഒരാൾ കത്തി ഉപയോഗിച്ച് ആക്രമണം നടത്തുകയായിരുന്നുവെന്നാണ് ലഭിക്കുന്ന വിവരം.
പത്താം ക്ലാസ്സ് വിദ്യാർത്ഥികളായ ഫർഹാൻ, മുഹമ്മദ് അജ്മൽ, മുഹമ്മദ് റിസ് ലാൻ എന്നിവർക്കാണ് ആക്രമണത്തിൽ പരിക്കേറ്റത് . പരിക്കേറ്റ വിദ്യാർത്ഥികളെ ഉടൻ തന്നെ മഞ്ചേരി മെഡിക്കൽ കോളേജ് ആശുപത്രിയിലേക്ക് മാറ്റി.
കത്തികൊണ്ട് ആക്രമണം നടത്തിയ വിദ്യാർത്ഥിയെ നേരത്തെ സ്കൂളിൽ നിന്ന് പുറത്താക്കിയിരുന്നതാണ്. പരീക്ഷ എഴുതുന്നതിനായ് മാത്രമാണ് സ്കൂളിൽ വരാൻ അനുവാദം നൽകിയിരുന്നത്.
ഒൻപതാം ക്ലാസ്സിൽ പഠിക്കുന്ന കാലം മുതലേ വിദ്യാർത്ഥികൾ തമ്മിൽ വാക്ക് തർക്കം നിലനിന്നിരുന്നതായാണ് ലഭിക്കുന്ന വിവരം. സംഭവത്തിൽ പോലീസെത്തി തുടർ നടപടികൾ സ്വീകരിച്ചു.
