ട്രംപ് ഇറാനുമായി യുദ്ധത്തിലേക്ക്, പിന്നെ തോൽവി? ചൈനീസ് പ്രൊഫസറുടെ പഴയ പ്രവചനം വൈറൽ

ട്രംപ് ഇറാനുമായി യുദ്ധത്തിലേക്ക്, പിന്നെ തോൽവി? ചൈനീസ് പ്രൊഫസറുടെ പഴയ പ്രവചനം വൈറൽ

അമേരിക്ക–ഇറാൻ സംഘർഷം കടുപ്പിക്കുന്ന സാഹചര്യത്തിൽ ഒരു ചൈനീസ് പ്രൊഫസറുടെ പഴയ പ്രവചനം സോഷ്യൽ മീഡിയയിൽ വീണ്ടും വൈറലാകുന്നു.

2024-ൽ നടത്തിയ പ്രവചനത്തിൽ ഡോണൾഡ് ട്രംപ് ഇറാനുമായി യുദ്ധത്തിലേക്ക് പോകുമെന്നും ഒടുവിൽ പരാജയപ്പെട്ട് പിൻമാറുമെന്നും അദ്ദേഹം പറഞ്ഞിരുന്നു.

യുഎസ്–ഇറാൻ സംഘർഷം ശക്തമാകുന്നതിനിടെ ചൈനീസ് പ്രൊഫസർ ജിയാങ് സ്യൂക്കിൻ നടത്തിയ പഴയ പ്രവചനങ്ങൾ വീണ്ടും ചർച്ചയാകുന്നു.

തന്റെ യുട്യൂബ് ചാനലായ ‘പ്രെഡിക്റ്റീവ് ഹിസ്റ്ററി’ വഴിയാണ് അദ്ദേഹം ലോക രാഷ്ട്രീയ സംഭവങ്ങളെക്കുറിച്ച് നിരീക്ഷണങ്ങളും പ്രവചനങ്ങളും നടത്തുന്നത്.

2024-ൽ ഒരു ഓൺലൈൻ ക്ലാസിനിടെ സ്യൂക്കിൻ നടത്തിയ മൂന്ന് പ്രധാന പ്രവചനങ്ങളാണ് ഇപ്പോൾ വീണ്ടും ശ്രദ്ധ നേടുന്നത്.

ഡോണൾഡ് ട്രംപ് വീണ്ടും അമേരിക്കൻ പ്രസിഡന്റാകും, അമേരിക്ക ഇറാനുമായി യുദ്ധത്തിലേക്ക് കടക്കും, അവസാനം യുദ്ധത്തിൽ ട്രംപ് പരാജയപ്പെടും എന്നായിരുന്നു അദ്ദേഹത്തിന്റെ പ്രവചനം.

ഇതിൽ ആദ്യ രണ്ട് കാര്യങ്ങളും സംഭവിച്ചതോടെ മൂന്നാമത്തെ പ്രവചനത്തിനായി കാത്തിരിക്കുകയാണ് അദ്ദേഹത്തിന്റെ അനുയായികൾ.

യേൽ സർവകലാശാലയിൽ നിന്ന് ഫിലോസഫിയിലും ചരിത്രത്തിലും ബിരുദം നേടിയ സ്യൂക്കിൻ, ചൈനയിലെ വിദ്യാഭ്യാസ പരിഷ്‌കരണ പദ്ധതികളിലും പങ്കാളിയായ വ്യക്തിയാണ്.

ലോക രാഷ്ട്രീയ സംഭവങ്ങളെ ചരിത്രപരമായ മാതൃകകളും ഭൂമിശാസ്ത്രപരമായ സാഹചര്യങ്ങളും ആവർത്തിക്കുന്ന രീതികളും അടിസ്ഥാനമാക്കിയാണ് അദ്ദേഹം വിശകലനം നടത്തുന്നത്.

അമേരിക്കയ്ക്ക് ഇറാനെതിരായ യുദ്ധത്തിൽ വിജയം നേടുക എളുപ്പമല്ലെന്ന് സ്യൂക്കിൻ പറയുന്നു. ഇറാന്റെ മലയോര ഭൂപ്രകൃതിയും ഭൗമശാസ്ത്രപരമായ പ്രത്യേകതകളും വിദേശ സൈന്യങ്ങൾക്ക് വലിയ വെല്ലുവിളിയാകും എന്നാണ് അദ്ദേഹത്തിന്റെ വിലയിരുത്തൽ.

ചരിത്രത്തിൽ ഏഥൻസിന്റെ സിസിലിയൻ എക്സ്പെഡിഷൻ (Sicilian Expedition) പോലെ വലിയ പരാജയം അമേരിക്ക നേരിടേണ്ടി വരാമെന്നും അദ്ദേഹം മുന്നറിയിപ്പ് നൽകുന്നു.

ഇറാൻ വർഷങ്ങളായി ഒരു വലിയ യുദ്ധത്തിനായി തയ്യാറെടുക്കുകയാണെന്നും സ്യൂക്കിൻ ചൂണ്ടിക്കാട്ടുന്നു.

കഴിഞ്ഞ വർഷം നടന്ന 12 ദിവസത്തെ ആക്രമണ-പ്രത്യാക്രമണങ്ങൾ അമേരിക്കയുടെയും ഇസ്രയേലിന്റെയും സൈനിക തന്ത്രങ്ങളെ ഇറാൻ മനസിലാക്കാൻ സഹായിച്ചുവെന്നാണ് അദ്ദേഹത്തിന്റെ വിലയിരുത്തൽ.

ഇറാന്റെ കൂട്ടാളികളായ ഹൂതി, ഹിസ്ബുല്ല, ഹമാസ് എന്നീ പ്രോക്സി ഗ്രൂപ്പുകൾ അമേരിക്കൻ സൈനിക നീക്കങ്ങളെ ദുർബലപ്പെടുത്താനുള്ള തന്ത്രങ്ങൾ വികസിപ്പിച്ചിട്ടുണ്ടെന്നും അദ്ദേഹം പറയുന്നു.

ഈ യുദ്ധം ദീർഘകാലം നീണ്ടുനിൽക്കാൻ സാധ്യതയുണ്ടെന്നും അത് ആഗോള രാഷ്ട്രീയ സമവാക്യങ്ങൾ മാറ്റിമറിക്കുമെന്നും സ്യൂക്കിൻ മുന്നറിയിപ്പ് നൽകുന്നു.

ഇതുവരെ നടത്തിയ പ്രവചനങ്ങളിൽ പലതും യാഥാർഥ്യമായതോടെ, അമേരിക്കയുടെ തോൽവി സംബന്ധിച്ച മൂന്നാമത്തെ പ്രവചനവും ശരിയാകുമോ എന്നതാണ് ഇപ്പോൾ അദ്ദേഹത്തിന്റെ അനുയായികൾ ശ്രദ്ധിക്കുന്ന പ്രധാന കാര്യം.

ENGLISH SUMMARY

A prediction made by Chinese professor Jiang Xueqin about a possible US–Iran war is going viral online. In a 2024 lecture, he predicted that Donald Trump would return to power, the US would go to war with Iran, and eventually lose the conflict. With the first two predictions already realized, his followers are now closely watching whether the third one will also come true.