തിരുവനന്തപുരം: മുഖ്യമന്ത്രി പിണറായി വിജയന് ഇന്ന് 80-ാം പിറന്നാൾ. രണ്ടാം പിണറായി സര്ക്കാരിന്റെ നാലാം വാര്ഷിക ആഘോഷങ്ങൾക്കിടെയാണ് ഇക്കുറി മുഖ്യമന്ത്രിയുടെ ജന്മദിനവും.
എന്നാൽ പതിവുപോലെ ആഘോഷങ്ങളില്ലാതെയാണ് ഇത്തവണത്തെയും പിറന്നാള് കടന്നുപോകുന്നത്. അതേസമയം മുഖ്യമന്ത്രി സ്ഥാനത്ത് പിണറായി വിജയന് നാളെ 9 വര്ഷം പൂര്ത്തിയാക്കുകയാണ്. ഏറ്റവും കൂടുതല് കാലം സംസ്ഥാന മുഖ്യമന്ത്രി പദവിയില് ഇരുന്ന രണ്ടാമത്തെ നേതാവെന്നുള്പ്പെടെയുള്ള റെക്കോർഡ് കൂടിയാണ് പിണറായി വിജയൻ സ്വന്തമാക്കുന്നത്.
ഔദ്യോഗിക രേഖകള് പ്രകാരം 1945 മാര്ച്ച് 21നാണ് മുഖ്യമന്ത്രിയുടെ പിറന്നാള്. എന്നാല് തന്റെ യഥാര്ത്ഥ ജന്മദിനം 1945 മെയ് 24 ആണെന്ന് 2016ല് ഒന്നാം പിണറായി സര്ക്കാര് സത്യപ്രതിജ്ഞ ചെയ്യുന്നതിന്റെ തലേ ദിവസം പിണറായി വിജയന് തന്നെയാണ് പുറത്തു വിട്ടത്.
കണ്ണൂര് പിണറായിയിൽ മുണ്ടയില് കോരന്റെയും കല്യാണിയുടെയും മകനായാണ് പിണറായി വിജയന് ജനിച്ചത്. ശാരദാ വിലാസം എല്പി സ്കൂളിലും പെരളശ്ശേരി ഗവ. ഹൈസ്കൂളിലും തലശ്ശേരി ബ്രണ്ണന് കോളജിലുമായിരുന്നു വിദ്യാഭ്യാസം പൂർത്തിയാക്കിയത്. ബ്രണ്ണന് കോളജില് ബിഎ ഇക്കണോമിക്സിനു പഠിക്കുമ്പോള് കേരള സ്റ്റുഡന്സ് ഫെഡറേഷന് കണ്ണൂര് ജില്ലാ സെക്രട്ടറിയായി.
തുടർന്ന് 1964 ല് കെഎസ്എഫ് സംസ്ഥാന കമ്മിറ്റിയംഗമായി. വിദ്യാര്ഥി രാഷ്ട്രീയത്തില് നിന്ന് യുവജന പ്രസ്ഥാനത്തിലെത്തിയ പിണറായി വിജയൻ പിന്നീട് കെഎസൈ്വഎഫ് സംസ്ഥാന പ്രസിഡന്റായും ഉയർന്നു. 1967 ല് സിപിഎമ്മിന്റെ തലശ്ശേരി മണ്ഡലം കമ്മിറ്റി സെക്രട്ടറിയായി.
1968ല് പാര്ട്ടി ജില്ലാ കമ്മിറ്റിയംഗമായി. 1972 ല് ജില്ലാ സെക്രട്ടറിയേറ്റിലേക്കും 1978ല് സംസ്ഥാന കമ്മിറ്റിയിലേക്കും അദ്ദേഹം തിരഞ്ഞെടുക്കപ്പെട്ടു.
ദേശീയപാത നിർമാണത്തിൽ വൻ അഴിമതിയെന്ന് കോൺഗ്രസ്; കിലോമീറ്ററിന് 45 കോടി രൂപയ്ക്ക് കരാർ എടുത്ത അദാനി പകുതി കാശിന് ഉപകരാർ നൽകി
