കൊച്ചിയിൽ യുവതിക്ക് നേരെ പീഡനശ്രമം
കൊച്ചി നഗരമധ്യത്തിൽ എറണാകുളം സൗത്ത് റെയിൽവേ സ്റ്റേഷന് സമീപം ആൺസുഹൃത്തിനൊപ്പം എത്തിയ യുവതിക്ക് നേരെ ഉണ്ടായ ക്രൂരമായ പീഡനശ്രമം കേരള മനസാക്ഷിയെ നടുക്കുന്നതാണ്.
കഴിഞ്ഞ ചൊവ്വാഴ്ച രാത്രി പത്തു മണിയോടെ സൗത്ത് റെയിൽവേ സ്റ്റേഷൻ വിവേകാനന്ദ റോഡിൽ വർഷങ്ങളായി പൂട്ടിക്കിടക്കുന്ന ബ്യു മോണ്ടേ ഹോട്ടൽ കെട്ടിടത്തിലാണ് നാടകീയവും ഭയാനകവുമായ സംഭവങ്ങൾ അരങ്ങേറിയത്.
എം.ബി.എ ബിരുദധാരിയും സ്വകാര്യ സ്ഥാപനത്തിലെ എച്ച്.ആർ ഉദ്യോഗസ്ഥയുമായ ഇരുപത്തിനാലുകാരിയാണ് മൂന്നംഗ സംഘത്തിന്റെ അതിക്രമത്തിന് ഇരയായത്. സംഭവത്തിൽ തിരുവനന്തപുരം സ്വദേശി ഡാനിഷ്, കൊല്ലം സ്വദേശി രാഹുൽ എന്നിവരെ പോലീസ് പിടികൂടിയിട്ടുണ്ട്.
യുവതിയും സുഹൃത്തും ആളൊഴിഞ്ഞ ഹോട്ടൽ കെട്ടിടത്തിന്റെ മുകൾ നിലയിലേക്ക് പോയ സമയത്ത് താഴത്തെ നിലയിൽ മദ്യപിച്ചുകൊണ്ടിരുന്ന പ്രതികൾ ഇവരെ പിന്തുടരുകയായിരുന്നു. കെട്ടിടത്തിന്റെ പത്താം നിലയിൽ വെച്ച് പ്രതികൾ യുവതിയെ തടഞ്ഞുനിർത്തുകയും കത്തിമുനയിൽ ഭീഷണിപ്പെടുത്തി പീഡിപ്പിക്കാൻ ശ്രമിക്കുകയും ചെയ്തു.
പ്രതികളിൽ ഒരാളായ ഡാനിഷ് യുവതിയോട് ശാരീരിക ബന്ധത്തിന് ആവശ്യപ്പെട്ടെങ്കിലും യുവതി അതിനെ ശക്തമായി എതിർത്തു. തുടർന്ന് ആൺസുഹൃത്തിനെ കൊലപ്പെടുത്തുമെന്ന് ഭീഷണിപ്പെടുത്തി യുവതിയെ പ്രതികൾ വിവസ്ത്രയാക്കുകയായിരുന്നു.
ഏതാണ്ട് ഒരു മണിക്കൂറോളം നീണ്ടുനിന്ന ക്രൂരമായ അതിക്രമത്തിനിടയിലും യുവതി ധീരമായി പോരാടി. തന്നെ ഉപദ്രവിക്കാൻ ശ്രമിച്ച ഡാനിഷിന്റെ കൈയ്യിൽ യുവതി ശക്തമായി കടിച്ചു പരിക്കേൽപ്പിച്ചു. ഈ ചെറുത്തുനിൽപ്പിനിടയിൽ ലഭിച്ച ചെറിയ ഇടവേളയിൽ പ്രതികളെ തള്ളിമാറ്റി യുവതിയും സുഹൃത്തും അവിടെനിന്നും രക്ഷപെടാൻ ശ്രമിച്ചു.
പത്താം നിലയിൽ നിന്നും ഫയർ എസ്കേപ്പ് ഗോവണി വഴി പൂർണ്ണ നഗ്നയായി ഓടി ഇറങ്ങിയാണ് യുവതി തന്റെ ജീവനും മാനവും രക്ഷിച്ചത്. കെട്ടിടത്തിന് താഴെ എത്തിയപ്പോൾ ആൺസുഹൃത്ത് തന്റെ ജാക്കറ്റ് നൽകി യുവതിയുടെ ശരീരം മറയ്ക്കുകയായിരുന്നു.
യുവതി ഉടൻതന്നെ പോലീസ് ഹെൽപ്പ് ലൈൻ നമ്പറിൽ വിളിച്ച് സഹായം തേടി. വിവരം അറിഞ്ഞെത്തിയ സെൻട്രൽ പോലീസ് ഇരുവരെയും സ്റ്റേഷനിലേക്ക് മാറ്റി. പീഡനശ്രമത്തിന് ശേഷം പ്രതികൾ യുവാവിന്റെ ബാഗുമായി അവിടെനിന്നും കടന്നുകളഞ്ഞു.
സംഭവം നടന്ന ഹോട്ടൽ കെട്ടിടത്തിന്റെ പരിസരത്തുള്ള സിസിടിവി ദൃശ്യങ്ങൾ പരിശോധിച്ച പോലീസിന് പ്രതികൾ ബൈക്കിൽ എത്തുന്ന ദൃശ്യങ്ങൾ ലഭിച്ചു.
വാഹനത്തിന്റെ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് ഡാനിഷിനെയും രാഹുലിനെയും പിടികൂടാൻ സാധിച്ചത്. മൂന്നാമത്തെ പ്രതിക്കായി പോലീസ് തിരച്ചിൽ ഊർജിതമാക്കിയിരിക്കുകയാണ്.
ക്രൂരമായ ആക്രമണത്തെത്തുടർന്ന് മാനസികമായി തകർന്ന നിലയിലായിരുന്ന യുവതിക്ക് പോലീസ് വിദഗ്ധ കൗൺസിലിംഗ് നൽകി.
ഇതിന് ശേഷമാണ് യുവതിയുടെ മൊഴി രേഖപ്പെടുത്തിയത്. നഗരമധ്യത്തിൽ ഇത്രയും തിരക്കുള്ള ഒരു സ്ഥലത്ത് വർഷങ്ങളായി പൂട്ടിക്കിടക്കുന്ന വലിയ കെട്ടിടങ്ങൾ സാമൂഹിക വിരുദ്ധരുടെ താവളമായി മാറുന്നത് വലിയ സുരക്ഷാ ഭീഷണിയാണ് ഉയർത്തുന്നത്.
പ്രതികളെ ഉടൻ കോടതിയിൽ ഹാജരാക്കുമെന്നും ഒളിവിൽ കഴിയുന്ന മൂന്നാമനായി അന്വേഷണം വ്യാപിപ്പിച്ചിട്ടുണ്ടെന്നും കൊച്ചി സിറ്റി പോലീസ് അറിയിച്ചു.
