ഉറക്കത്തിൽ സ്വപ്നം കാണാത്തവരായി ആരെങ്കിലുമുണ്ടോ. നല്ലതും ചീത്തയുമായ നിരവധി സ്വപ്നങ്ങൾ ആണ് നാം കാണുന്നത്. ചിലത് സന്തോഷം തരുമെങ്കിലും ചില സ്വപ്നങ്ങൾ ദുഃഖത്തിലേക്ക് നയിക്കുകയും ചെയ്യും. ഉറക്കമെഴുന്നേറ്റു കഴിയുമ്പോൾ ഓർമയിൽ നിൽക്കുന്ന സ്വപ്നങ്ങളും മറന്നു പോകുന്ന സ്വപ്നങ്ങളുമുണ്ട്. ഒരു വ്യക്തിയുടെ മനസിനുള്ളിൽ സംഭവിക്കുന്ന അനിയന്ത്രിതമായ വികാരങ്ങൾ, ആശയങ്ങൾ, സങ്കൽപങ്ങൾ തുടങ്ങി ഉണർന്നിരിക്കുമ്പോൾ നമ്മുടെ മനസിലൂടെ കടന്നുപോകുന്ന കാര്യങ്ങളും ചിന്താസരണിയിലെ വികാരവിചാരങ്ങളുമെല്ലാം സ്വപ്നങ്ങളിലൂടെ നാം കാണുന്നത്. ഭാവിയെക്കുറിച്ചുള്ള ഒരു മുന്നറിയിപ്പ് കൂടിയായിരിക്കും സ്വപ്നങ്ങൾ എന്നും പറയാറുണ്ട്.
മനുഷ്യർക്ക് പുറമെ പക്ഷികളോ മൃഗങ്ങളോ മറ്റു ജീവജാലങ്ങളോ സ്വപ്നത്തിൽ തെളിയാറുണ്ട്. എന്നാൽ, ഓരോ സ്വപ്നങ്ങളും നമുക്ക് തരുന്നത് ഓരോ സൂചനകളാണ്. അവനവനെ തന്നെയോ മൃഗങ്ങളെയോ സ്വപ്നം കാണുകയാണെങ്കിൽ ആ വ്യക്തിയുടെ ശീലങ്ങളെക്കുറിച്ചും ആ ശീലങ്ങൾ നല്ലതോ ചീത്തയോ എന്നതിനെക്കുറിച്ചും അയാളുടെ മനസ് സംവദിക്കാൻ ശ്രമിക്കുന്നതിന്റെ സൂചനയാണ് നൽകുന്നത്. മൃഗങ്ങൾ ആക്രമിക്കുന്നതോ വേട്ടയാടുന്നതോ തരത്തിലുള്ള സ്വപ്നങ്ങളാണ് കാണുന്നതെങ്കിൽ ചില ശീലങ്ങൾക്കു നിങ്ങൾ അടിമപ്പെട്ടിട്ടുണ്ടെന്നും ആ ശീലങ്ങൾ നിങ്ങൾക്കു ഗുണകരമല്ലെന്നു ഉപബോധ മനസ്സ് മുന്നറിയിപ്പ് നൽകുകയാണ്.
മരണ സ്വപ്നങ്ങൾ കാണുന്നത് ദോഷമോ?
മരണ സ്വപ്നങ്ങൾ കാണുന്നവരും ചുരുക്കമല്ല. ഇത്തരം സ്വപ്നങ്ങൾ ഉറക്കമുണർന്നാലും മനസ്സിൽ നിന്ന് മായില്ല. മരണം സ്വപ്നം കാണുന്നത് നല്ലതാണെന്നും അത് ദീർഘായുസിന്റെ സൂചനയാണെന്നും ചിലർ പറയാറുണ്ട്. എന്നാൽ അത് ശരിയായ ചിന്തയല്ല. കാരണം ഒരു ജീവിതചക്രത്തിന്റെ അവസാനത്തെയാണ് മരണം അടയാളപ്പെടുത്തുന്നത്. വ്യക്തിയുമായി ബന്ധപ്പെട്ട എന്തെങ്കിലും കാര്യത്തിന്റെയോ, എന്തെങ്കിലും ശീലത്തിന്റെയോ അവസാനത്തെയാണ് മരണം സ്വപ്നം കാണുന്നതിലൂടെ സൂചിപ്പിക്കപ്പെടുന്നത്. ആരെങ്കിലും എന്തെങ്കിലും കാരണത്താൽ മരണപ്പെടുന്നതായി കണ്ട സ്വപ്നം ഉറങ്ങിയെഴുന്നേറ്റതിന് ശേഷവും ഓർമയിൽ നിൽക്കുന്നുണ്ടെങ്കിൽ സ്വപ്നം കണ്ട വ്യക്തിയുടെ ജീവിതത്തിൽ വലിയൊരു മാറ്റത്തിന് സാധ്യതയുണ്ടെന്നുള്ള സൂചന നൽകുന്നു. ചില സമയങ്ങളിൽ സ്വപ്നത്തിലൂടെ നമുക്ക് മുമ്പിൽ തെളിയുന്നത് ഭാവിയിൽ നമ്മെ കാത്തിരിക്കുന്ന കാര്യങ്ങളാകും. സ്വപ്നം കണ്ട കാര്യങ്ങൾ യഥാർത്ഥത്തിൽ കൺമുമ്പിൽ സംഭവിക്കുന്ന നിമിഷത്തിലൂടെ ചിലരെങ്കിലും ചിലപ്പോഴെങ്കിലും കടന്നു പോയിട്ടുമുണ്ട്.
സ്വപ്നത്തിൽ ധരിക്കുന്ന വസ്ത്രങ്ങൾ
സ്വപ്നത്തിൽ നിങ്ങൾ കടുംനിറത്തിലുള്ള വസ്ത്രങ്ങൾ അണിഞ്ഞാണ് കാണുന്നതെങ്കിൽ ഉല്ലാസം നിറഞ്ഞതും കുട്ടികളുടേതുപോലുള്ള നിങ്ങളുടെ സ്വഭാവത്തെയാണ് പ്രതിനിധാനം ചെയ്യുന്നത്. നഗ്നരായാണ് കാണുന്നതെങ്കിൽ ജീവിതത്തിലെ തെരഞ്ഞെടുപ്പുകളിൽ ആ വ്യക്തി വിജയിക്കുന്നു എന്നതിന്റെ സൂചനയാണത്. ഔദ്യോഗിക വസ്ത്രം ധരിച്ചാണ് കാണുന്നതെങ്കിൽ സ്വകാര്യ ജീവിതത്തേക്കാൾ നിങ്ങൾ മുൻഗണന നൽകുന്നത് ഔദ്യോഗിക ജീവിതത്തിനായിരിക്കുമെന്നും സ്വപ്നം സൂചിപ്പിക്കുന്നു.
Read Also: പുരികക്കൊടികള്‍ പറയും നിങ്ങളുടെ സ്വഭാവം
