ഹോങ്കോംഗ് വിമാനത്താവളത്തിൽ എയർ ഇന്ത്യ ഡ്രീംലൈനർ വിമാനത്തിന് സാങ്കേതിക തകരാർ
ഹോങ്കോംഗ്: ഹോങ്കോംഗ് അന്താരാഷ്ട്ര വിമാനത്താവളത്തിൽ എയർ ഇന്ത്യയുടെ ഡ്രീംലൈനർ ബോയിംഗ് 787-8 വിമാനത്തിന് സാങ്കേതിക തകരാറ് നേരിടേണ്ടി വന്നു.
വ്യാഴാഴ്ച രാവിലെ 8.50-ന് ഡൽഹിയിലേക്ക് പുറപ്പെടാനിരുന്ന AI315 സർവീസ് ആയിരുന്നു അപകടം ഒഴിവാക്കി നിലത്തിറങ്ങിയത്.
പറന്നുയരുന്നതിനുമുമ്പുള്ള അവസാനഘട്ട പരിശോധനയ്ക്കിടെ ഓൺബോർഡ് സിസ്റ്റങ്ങളിൽ അസാധാരണമായ പ്രവർത്തനം ശ്രദ്ധയിൽപ്പെട്ടതോടെയാണ് ടേക്ക് ഓഫിന് അനുമതി നിഷേധിച്ചത്.
വിമാനത്തിലെ എഞ്ചിനീയർമാർ ഉടൻതന്നെ പരിശോധന ആരംഭിക്കുകയും സുരക്ഷാ മാനദണ്ഡങ്ങൾ പാലിച്ച് ഗ്രൗണ്ട് ചെക്ക് നടത്തുകയും ചെയ്തു.
ഓൺബോർഡിലെ ഒരു ചെറിയ കംപോണെന്റ് മാറ്റിയതിനു ശേഷമാണ് തകരാറ് പരിഹരിച്ചത്. ഏകദേശം മൂന്ന് മണിക്കൂറോളം നീണ്ട പരിശോധനകൾക്ക് ശേഷം, എല്ലാ സാങ്കേതിക സുരക്ഷാ നടപടികളും പൂർത്തിയാക്കി രാവിലെ 11.30-ന് വിമാനം ഡൽഹിയിലേക്ക് പുറപ്പെട്ടു.
യാത്രക്കാരുടെ സുരക്ഷക്ക് മുൻഗണന നൽകി പ്രവർത്തിച്ചതായി എയർ ഇന്ത്യ വിശദീകരിച്ചു. സാങ്കേതിക തകരാറുണ്ടായെങ്കിലും ഒരു ഘട്ടത്തിലും യാത്രക്കാരുടെ ജീവൻ അപകടത്തിലായിരുന്നില്ല എന്നും കമ്പനി വ്യക്തമാക്കി.
എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനങ്ങൾ അന്താരാഷ്ട്ര സർവീസുകളിലെ പ്രധാന കരുത്തായാണ് പ്രവർത്തിക്കുന്നത്.
ഹോങ്കോംഗ് വിമാനത്താവളത്തിൽ എയർ ഇന്ത്യ ഡ്രീംലൈനർ വിമാനത്തിന് സാങ്കേതിക തകരാർ
ഇന്ധനക്ഷമത, ദീർഘദൂര സർവീസ് ശേഷി, ആധുനിക സാങ്കേതിക സംവിധാനങ്ങൾ തുടങ്ങിയവയാണ് ഈ മോഡലിന്റെ പ്രധാന സവിശേഷതകൾ.
എങ്കിലും, കഴിഞ്ഞ കുറച്ച് മാസങ്ങളായി എയർ ഇന്ത്യയുടെ ഡ്രീംലൈനർ വിമാനങ്ങളിൽ സാങ്കേതിക തകരാറുകൾ റിപ്പോർട്ട് ചെയ്യപ്പെട്ടുവരികയാണ്.
ഇതിനെ തുടർന്ന് കമ്പനി വിമാനങ്ങളുടെ നിരീക്ഷണവും സുരക്ഷാ പരിശോധനകളും കൂടുതൽ കർശനമാക്കിയത്. ഓരോ സർവീസിനുമുമ്പും പ്രത്യേക എൻജിനീയറിംഗ് ഓഡിറ്റുകളും റൂട്ടീൻ ടെസ്റ്റുകളും നടത്തുന്നത് നിർബന്ധമാക്കിയിട്ടുണ്ട്.
ഇതിനു മുൻപ് ഒക്ടോബർ 9-ന് വിയന്നയിൽ നിന്ന് ഡൽഹിയിലേക്ക് സർവീസ് നടത്തിയ AI154 വിമാനത്തിൽ ഓട്ടോപൈലറ്റ് സിസ്റ്റം പെട്ടെന്ന് പ്രവർത്തനരഹിതമായതിനെ തുടർന്ന് വിമാനത്തെ ദുബായിലേക്ക് തിരിച്ചുവിട്ടിരുന്നു. ഈ സംഭവം അന്താരാഷ്ട്രതലത്തിൽ വാർത്തയായി.
വിമാന സുരക്ഷയുമായി ബന്ധപ്പെട്ട ആശങ്കകൾ ഉയർന്നതോടെ പൈലറ്റുമാരുടെ സംഘടനയായ ഫെഡറേഷൻ ഓഫ് ഇന്ത്യൻ പൈലറ്റ്സ് (FIP), എയർ ഇന്ത്യയുടെ മുഴുവൻ B787 വിമാനങ്ങളും താത്കാലികമായി ഗ്രൗണ്ട് ചെയ്യണമെന്ന് സർക്കാരിനോട് ആവശ്യപ്പെട്ടിരുന്നു.
അതോടൊപ്പം, കമ്പനിയുടെയും വിമാനങ്ങളുടെയും സമഗ്രമായ സാങ്കേതിക ഓഡിറ്റ് നടത്തണമെന്നുമാണ് സംഘടനയുടെ നിലപാട്.
എയർ ഇന്ത്യ ഇതുവരെ നടത്തിയ അന്വേഷണങ്ങളിൽ ചില ചെറുതകരാറുകൾ കണ്ടെത്തിയെങ്കിലും, പ്രധാന ഘടകങ്ങളിൽ പ്രശ്നങ്ങളില്ലെന്ന് വ്യക്തമാക്കിയിട്ടുണ്ട്.
സുരക്ഷാ മാനദണ്ഡങ്ങൾ പാലിക്കുന്നതിൽ കമ്പനി പൂർണ്ണമായും പ്രതിബദ്ധമാണെന്നും, സാങ്കേതിക പിഴവുകൾ ഉടൻ പരിഹരിക്കുന്നതിൽ പ്രത്യേക ശ്രദ്ധ നൽകിയുവരികയാണെന്നും അധികൃതർ വ്യക്തമാക്കി.
