കൊച്ചി: പെരുമ്പാവൂർ സ്വദേശിനിയായ റിയല് എസ്റ്റേറ്റ് ഇടപാടുകാരിയുടെ കൊലപാതകത്തില് പ്രതി പിടിയില്. എറണാകുളം കാക്കനാട് സ്വദേശിയായ ഗിരീഷ് കുമാര് ആണ് പിടിയിലായത്. ഇന്ഫോപാര്ക്കിലെ ജീവനക്കാരനാണ് പിടിയിലായ ഗിരീഷ് കുമാര്.
ജെയ്സിയുടെ സ്വര്ണ്ണവും പണവും മോഷ്ടിക്കാന് വേണ്ടിയായിരുന്നു കൊലപാതകമെന്ന് അന്വേഷണ ഉദ്യോഗസ്ഥർ പറയുന്നു.
കൊല്ലപ്പെട്ട ജെയ്സി എബ്രഹാമിന്റെ അടുത്ത പരിചയക്കാരന് കൂടിയാണ് ഗിരീഷ്. ഹെല്മെറ്റ് ധരിച്ച് അപ്പാര്ട്മെന്റില് എത്തിയ യുവാവിന്റെ ദൃശ്യങ്ങള് സിസിടിവിയില് നിന്നും അന്നു തന്നെ പൊലീസിന് ലഭിച്ചിരുന്നു. ഈ ദൃശ്യങ്ങളുടെ അടിസ്ഥാനത്തിലാണ് പൊലീസ് അന്വേഷണം നടത്തിയത്.
കൊലപാതകം നടന്ന ദിവസം ഇയാള് അപ്പാര്ട്ട്മെന്റിലേക്കെത്തുന്നതും രണ്ടു മണിക്കൂറിന് ശേഷം തിരിച്ചു പോകുന്നതുമാണ് സിസിടിവിയിൽ പതിഞ്ഞത്.
ജെയ്സിയുടെ ആഭരണങ്ങളും രണ്ടു മൊബൈല് ഫോണുകളും കാണാതായിരുന്നു. തലയില് പത്തോളം മുറിവുകളുണ്ടെന്നും തലയ്ക്കു പിന്നില് വളരെ ആഴത്തിലുള്ള വലിയ മുറിവുണ്ടെന്നും ആദ്യമെ കണ്ടെത്തി.
ഭര്ത്താവുമായി അകന്നു കഴിഞ്ഞിരുന്ന ജെയ്സി ഒരു വര്ഷമായി കളമശ്ശേരിയിലെ അപ്പാര്ട്ടമെന്റിലാണ് താമസം. കാനഡയിലുള്ള ജെയ്സിയുടെ മകള് നാട്ടിലെത്തിയിട്ടുണ്ട്. കളമശ്ശേരി കൂനംതൈയിലുള്ള അപ്പാര്ട്മെന്റിലാണ് ജെയ്സിയെ കഴിഞ്ഞ ദിവസം മരിച്ച നിലയില് കണ്ടെത്തിയത്.
സംഭവം കൊലപാതകമെന്ന് പൊലീസ് നേരത്തേ തന്നെ കണ്ടെത്തിയിരുന്നു. പോസ്റ്റ്മോര്ട്ടം റിപ്പോര്ട്ടിലാണ് കൊലപാതകം സ്ഥിരീകരിച്ചത്. ശുചിമുറിയില് ആയിരുന്നു ജെയ്സിയുടെ മൃതദേഹം കണ്ടെത്തിയത്. കാനഡയില് ജോലിയുള്ള ഏക മകള് അമ്മയെ ഫോണില് വിളിച്ചിട്ട് കിട്ടാതായപ്പോള് പൊലീസിനെ അറിയിക്കുകയായിരുന്നു. പൊലീസെത്തി വാതില് പൊളിച്ച് അകത്തു കയറിയപ്പോഴാണ് ജെയ്സിയുടെ മൃതദേഹം കണ്ടെത്തിയത്.
തലയിലുള്ള ആഴത്തിലുള്ള മുറിവു കണ്ടതോടെ പൊലീസിനു കൊലപാതകമാണോ എന്ന് ആദ്യഘട്ടത്തില് തന്നെ സംശയം ഉണ്ടായി. മുഖം വികൃതമായ രീതിയിലായിരുന്നു. പിന്നീട് കളമശേരി മെഡിക്കല് കോളജില് നടത്തിയ പോസ്റ്റ്മോര്ട്ടത്തിലാണ് തലയ്ക്കേറ്റ ഗുരുതരമായ പരിക്കാണ് മരണകാരണമെന്ന് പൊലീസ് സ്ഥിരീകരിച്ചത്.
